Den Bybel met groter neersticheyt ghecorrigeert (Liesveltbijbel 1542)

¶ Dat wy niet oordeelen en sullen die ghebreken van allen menschen. Dat wy gheen roosen voor dye vercken stroyen en sullen Dat wy bidden, soecken, ende cloppen sullen, Van den bomen te kennen, dye goede vruchten draghen, Ende vanden huyse dat opten steen oft opt sant getimmert is.

Dat .vij. Capittel

1

⁺† EN oordeelt nyet, ⁺ op dat ghi niet geoordeelt en wort,

+ A vers 1

+ Lu. vi.f ro. ij.a mar. iiij c.

2

want met sulcken oordeel als ghy oordeelt, sult ghi geordeelt worden, ende met wat maten dat ghi meet, soe sult ghi ghemeten worden,

3

Wat siet ghy een splinter in ws broeders ooghe, ende den balc dye in v ooghe is, dye en wordt ghi niet ghewaer?

4

Oft hoe dorfdy seggen tot uwen broeder, hout, laet my wt dijn ooge werpen den splinter, ende siet, in dijn ooge is eenen balck?

5

Ghy ypocrijt, trect eerst den balck wt v ooge ende daer nae besiet, hoe ghy dye splintere wt ws broeders ooge trecken moecht.

6

Ghi en sult dat heylichdom den ^a honden niet gheuen, noch uwe peerlen voor die vercken nyet worpen op dat si die selue met haren voeten niet en vertreden ende haer nyet tot uwaerts en keeren, ende v verschoren.

a byde honden ende die verckens verstaetmen die vianden des woorts Gods phi. iij.a

7

Bidt, ende v sal ghegheuen worden, soect, ende ghi sult vinden, clopt ende v sal opgedaen worden,

8

Want wye daer bidt, dye ontfanct, ende wie soeckt dye vindt, ende wye clopt, dyen wort op ghedaen.

9

Wye isser onder v menschen, welcken sijn sone bidt om broot, dye hem eenen steen bieden sal?

10

Oft die hem bidt om eenen visch ende hem een serpent bieden sal?

11

Ist dan dat ghi, die doch arch sijt, uwen kinderen goede ghauen cont gheuen, ⁺ hoe veel meer sal dan uwe vader, dye in dye hemelen is, goede ghauen gheuen, den ghenen dye hem bidden?

+ Luc. xi b Iaco. i a.

12

Hieromme alle dat ghy wilt, dat v dye menscen doen sullen, dat doet haer oock, dat is dye wedt ende dye Propheten.

13

⁺Ghaet in door dye enge poorte, ⁺ wandt dye poorte is wijt, ende den wech is breet, dye daer afleit totter verdoemenisse, ende veel sijnder die door dese poorte gaen

+ C vers 13

+ Lu. vi.c

14

Ende dye poorte is enghe, ende dye wech is smal, die totten leuen leyt, ende luttel sijnder diese vinden.

15

† Wacht v voor den ^b valschen Propheten, dye tot v comen in schaeps cleeren, want inwendich sijn si grijpende woluen, aen haer vruchten sult ghijse kennen

b Valsche propheten sijn predicanten die dat woordt Goods verkeeren. Scaeps cleedren, dats wtwendige gheueysde heylicheyt. ac. xx f.

16

Machmen ooc wijndruyuen vergaderen vanden doornen, oft vijgen vanden dijstelen?

17

Also een yegelic goede boom brenct goede vruchten, mer een quade boom brenct quade vruchten.

18

Eenen goeden boom, en can geen quade vruchten brengen,

19

ende een quade boom en can gheen goede vruchten brenghen. Alle boomen, dye gheen goede vruchten en brenghet, sal af gehouden, ende int vier gheworpen worden,

20

Daerom so sult ghy dese kennen aen haer vruchten,

21

Niet alle dye tot mi segghen, HERE HERE, en sullen int rijck der hemelen comen, Maer dye ghene die doen den wille mijns vaders, dye in die hemelen is.

22

In dyen dage sullen veel menschen tot my seggen HERE, HERE, en hebben wy nyedt in uwen name ghepropheteert, ende in uwen naem dye duyuelen wt gheworpen? Ende en hebben wy nyet door uwen naem veel crachten ende duechden volbracht? Ende dan sal ic haer lieden belijden, want ick v noch noyt ghekent en hebbe,

23

gaet van my alle dye daer boosheydt doen.

24

Daerom een yeghelijc dye dese mijne woorden hoort ende doetse, ⁺ sal geleken worden eenen wijsen man dye sijn huys op eenen steen tymmert,

+ lu. iiij.g

25

ende daer is eenen reghen neder ghedaelt, ende daer sijn stromen gecomen, ende winden gewayt, ende stieten tegen dat huys, ende sijn huys en is niet geuallen, want het was op eenen steen

[p. *]

gefondeert.

26

Ende wie dese mijn woorden hoort, ende niet en doet, ⁺ is eenen sotten man gelijc, die sijn huys opt sant getimmert heeft,

+ Luc. iiij c

27

op welc huys dat den reghen geuallen is, ende die stromen daer aen gecomen sijn, ende dye winden hebben ghewaeyt, ende stieten tegen dat huys, ende het is ter neder geworpen, ende den val hier af is groot geweest.

28

Ende het is geschiet, doen Iesus dese leeringe voleyndt hadde, ⁺ dat die scaren des volcx haer seer verwonderden ouer zijn leeringe,

+ Mar. i c Luc. iiij c

29

Want hi leerde als macht ende auctoriteyt daer toe hebbende, ende niet gelijc der scriftgeleerden.

[afbeelding]