Den Bybel met groter neersticheyt ghecorrigeert (Liesveltbijbel 1542)

¶ Hoe die gichtighe mensche sijn bedde droech. Hoe sinte Matheus gheroepen wert. Hoe die Pharizeen murmureerden. Hoe die discipulen Iohannis vraechden, waerom die discipulen Iesu niet en vasten. Hoe Iesus een vrouwe vanden loope des bloets verloste, doen hi ghinck verwecken die dochter des princen die ghestoruen was. Hoe twee blinde siende worden.

Dat .ix. Capittel

[afbeelding]

1

⁺† DOen ghinc Iesus in een scheepken, ende voer weder ouer dat water, ende quam in sijn stadt.

+ A vers 1

2

Ende siet, si brachten voor hem eenen gichtighen mensche te bedde liggende, ende na dat Iesus ghesien hadde haer geloue, so sprac hy totten gichtigen mensche, Mijn sone sijt getroost, v sonden sijn v vergheuen,

3

ende siet sommighe vanden Scriben spraken in haer seluen, Dese ^a blasphemeert.

a Blasphemeren is God lachteren oft hem seluen toe scriuen dat gode toe behoort. Ioan. x

4

Ende doen Iesus haer ghedachten sach, so heeft hi gheseyt, Waeromme denct ghi quaet in v herten?

5

Welc is lichter te segghen, uwe sonden worden v vergheuen, oft te seggen, staet op, ende wandelt.

6

Maer op dat ghy weten moecht, dat des menschen sone macht heeft, die sonden te vergheuen opter aerden So sprack hy totten gichtighen, Staet op ende neemt wech v bedde, ende gaet in v huys,

7

ende hi stont op, ende ghinc in sijn huys,

8

ende dat volc die dit sagen verwonderden hem, ende loofden God, die alsulcken macht den menschen ghegeuen heeft. *

[afbeelding]

9

⁺† Ende doen Iesus van daer ghinck, ⁺ sach hi eenen mensche sitten int Tolhuys, die Matheus genoemt was, ende sprack tot hem, Volcht my na, ende hi stont op, ende is Iesum geuolcht.

+ B vers 9

+ mar. ij.b Luc. v.f

10

Ende het is gheschiet dat Iesus in Matheus huys adt, ende siet, vele tollenaers ende sondaren, dye daer ghecomen waren, aten te samen met Iesu, ende met sijn discipulen.

11

Ende doen die Pharizeen dit saghen, so spraken si tot zijn discipulen, Waerom eet v meester metten tollenaren ende sondaren?

12

Iesus dit hoorende, heeft haer toe ghesproken, Die gesont zijn, en behoeuen gheenen medecijnmeester, maer dye ghene die cranc sijn,

13

maer gaet henen ende leert wat dat is, Ick heb een goet behaghen in ontfermhertichede, ende niet in offerhande, Ende ic en ben niet ghecomen om te roepen die rechtueerdige menschen, mer om die sondaren te roepen tot penitencie. *

14

† Doen quamen tot hem die discipulen Ioannis, seggende, Waeromme vasten wi ende die Pharizeen so vele, ende uwe discipulen en vasten nyet?

15

ende Iesus sprac tot haer, Hoe connen des bruydegoms kinderen rouwe ghedragen, alsoo langhe als die bruydegom bi haer is? Den tijt sal comen, dat den bruydegom van haer ghenomen sal worden, ende dan sullen si vasten

16

Nyemant en lapt een oudt cleet met nyeuwen laken, want hi trect den lap doch wederom van dat cleedt, ⁺ ende die schuere wordt argher.

+ Luc. v.f

17

Men vatet den most oock niet in oude flesschen, want dye flesschen souden schueren, ende dan soude den wijn wtghestort worden Maer men doet nyeuwen wijn in nieuwe flesschen, ende so worden si beyde behouden. *

[afbeelding]

18

† Ende doen Ihesus dese woorden tot haer sprack, Siet een vanden oppersten quam tot Iesum ende viel voor hem neder ende sprac, ⁺ HERE, mijn dochter is nv ghestoruen, ⁺ maer coemt, ende legghet v handt op haer, ende si sal leuen,

+ C vers 18

+ lu. viij.f mar. v.c.

19

Ende Iesus stont op ende volchde hem na.

20

Ende siet, een vrouwe dye den loop des bloets twaelf iaren ghehadt hadde, quam van achter tot hem ende heeft den zoom van sinen cleede gheraect,

21

ende si sprack in haer seluen, Mochte ick alleen sijn cleedt raken, soo sal ick ghesont zijn.

22

Doen keerde hem Iesus omme, ende sach haer, ende sprac, Betrout mijn dochtere, v ghelooue heeft v gheholpen, Ende dese vrouwe wert op die selue vre ghesont.

23

Ende als Iesus ghecomen was int huys des princen, ende ghesien hadde dye pijpers, ende die scare ouer hoop loopende, soo heeft hi tot haer lieden gheseyt,

24

Ghaet van hier, dat maechdeken en is niet doot, maer si slapet, Ende si bespotten Iesum.

25

Ende nae dat dye schare wt ghedreuen was, soo ghinck Ihesus binnen by der dochter, Ende hy nam haer metter hant, ende hy sprack, Maechdeken staet op, ende dat maechdeken is opghestaen,

26

Ende dit gheruchte is ghegaen ouer dat gheheel lant. *

27

† Ende Ihesus van daer gaende, sijn hem gheuolcht twee blinde mannen roepende, ⁺ ende segghende, O du sone Dauids ontfermt v onser,

+ D vers 27

28

ende doen Iesus int huys ghecomen was, so quamen bi hem dese blinden. Ende Iesus sprac tot haer, Gelooft ghi dat ic v dat doen mach? Si seyden tot hem, HERE ia wi,

29

Doen raecte hy haer ooghen, seggende. V gescie nae uwen gelooue, ende haer ooghen sijn gheopent.

30

Ende Ihesus verboot hen, segghende, Siet toe, dats nyemant en weet oft verneme,

31

maer si ghinghen wt, ende hebben sijn fame verbreydt, in dat gheheele landt.

32

Dese wech gegaen sijnde, siet, so brachten si tot hem eenen

[p. *]

stommen mensche, dye vanden duuel beseten was.

33

Ende na dat Iesus den duuel wt geworpen hadde, so sprack die stomme mensche. Ende die scharen des volcx hebben hen verwondert, seggende. Noyt en is desghelicx ghesien int lant van Israel. *

34

Maer die Pharizeen spraken. Door den prince der duuelen, so worpt hi dye duuelen wt.

35

Ende Iesus ginc om in allen steden, ende casteelen, ende dorpen, leerende in haer scholen, ⁺ ende prekende dat Euangelie des rijcx, ende genas int volc alle crancheyt ende ongesontheyt

+ mar. vi b Luc. x.a

36

Ende als Iesus dye scharen sach, ontfermde hi haer, want si vermoeyt ende verstroyt waren ghelijc scapen, dye gheenen herder en hebben,

37

ende doen sprac Iesus tot sinen discipulen. ^a Den oogst is groot, Mer die arbeyders sijn luttel

a Den oogst, dat sijn dye herten der menschen, bereyt om dwoort Gods te hooren.

38

Hierom so bidt den HERE des oogsts, dat hi in sinen oogst arbeyders seynden wille.