Den Bybel met groter neersticheyt ghecorrigeert (Liesveltbijbel 1542)

Hoe si teghen Iesum murmureerden, ende Iesus op die hoochtijt daghen opclam inden tempel, ende daer selue leerde ende preecte.

Dat .vij. Capittel.

[afbeelding]

1

⁺DAer na tooch Iesus om in Galilea, want hi en woude nyet in Iudea omtrecken, om dat hem die Ioden sochten te dooden.

+ A vers 1

2

Het was nae der Ioden feestdach der louer tabernaculen,

3

Doen seyden sijn broeders tot hem: Gaet van hier, ende gaet in Iudeen, op dat v discipulen ooc sien mogen die wercken die ghi doet

4

Wie vry int openbaer sijn wil, dye en doet niet heymelicks Wildi sodanige dingen doen, soo openbaert v voor der werelt,

5

Want ooc zijn broeders en geloofden nyet in hem.

6

Doen seyde Ihesus tot haer: Mijnen tijt en is noch niet, mer uwen tijt is altoos bereyt.

7

Dye werelt en can v niet haten, mer si haet mi, want ic ghetuyge van haer, dat haer wercken quaet zijn,

8

Gaet ghi op die feeste, Ic en wil noch niet gaen op dye feeste, want mijnen tijt en is noch niet veruult.

9

Doen hy dat tot hen gheseyt hadde, so bleef hi in Galilea,

10

Als sijn broeders op waren ghegaen, doen ghinc hi op der feesten, nyet openbaerlijck mer al heymelijc,

11

Doen sochten hem die Ioden in die feestdach, ende seyden: Waer is dye?

12

Ende daer was een groote murmuracie van hem onder dat volc, Sommige seyden, hi is goet, mer dye ander seyden, neen, maer hy verliet dat volc,

13

Nochtans en sprac nyemant vry van hem, om der vreesen wille der Ioden.

[afbeelding]

14

† Mer midden inder feesten ginc Iesus op inden tempel, ⁺ ende leerde,

+ B vers 14

15

Ende die Ioden verwonderden haer, seggende, Hoe can dese die scrift, die hi nyet geleert en heeft

16

Iesus antwoorde haer, ende seyde, Mijn leeringe en is niet mijn, mer des geens dye mi gesonden heeft.

17

Ist dat yemant sinen wille wil doen, dye sal bekennen oft dese leeringhe van God si, oft dat ic van my seluen spreke,

18

Wye van hem seluen spreect, die soect zijn eygen prijs, Mer wie den prijs des geens soect die hem ghesonden heeft, die is warachtich, ⁺ ende daer en is geen ongerechticheyt in hem.

+ C vers 18

19

En heeft Moyses v die wet niet gegeuen, ende nyemant onder v en hout die wet? Waerom soect ghi my te dooden?

20

Dat volc antwoorde ende seyde, Ghi hebt den duuel, Wie soect v te dooden?

21

Iesus antwoorde ende seyde, Ick heb een werck gedaen, ende ghi verwondert v alle

22

Moyses heeft v die besnijdenisse daerom gegeuen, nyet dat si van Moyses is, mer vanden Vader, Nochtans besnijt ghi die menschen op den Sabboth,

23

Ist dat een mensche die besnijdinge ontfangt op den Sabboth, also dat die wet Mosi nochtans niet ghebroken en wert, wert ghi dan op mi gram, dat ic den gheheelen mensche op den Sabboth, ghesont heb gemaect?

24

En oordeelt niet na dat ^a aensien mer oordeelt een gerecht oordeel.

a Aensicht, dat is dat gene dat ghi van buyten siet. Deut. i.

25

Doen seyden sommige van Hierusalem, En is hi dat nyet dien si sochten te dooden?

26

Ende siet, hi spreect openbaerlick, ende si en seggen hem niet, Kennen hem onse ouerste nv recht, dat hi die oprechte Christus is?

27

Doch weten wy van waer dese is, Mer wanneer Christus comen sal, so en sal niemant weten van waer hi is.

[afbeelding]

28

Doen riep Iesus inden tempel, leerende ende seggende, Ia ghi kent mi, ende weet van waer ic ben, ende van mi seluen en ben ic niet gecomen, mer die mi gesonden heeft die is die warachtige, den welcken ghi niet en kent ⁺ Ic kenne hem, ende seyde ic dat ic hem niet en kenne, so sal ic ^a logenachtich zijn, gelijc ghi

+ D vers 28

a Logenachtich in de heylige scrifte, beteekent den ghenen die den beloften Goods niet en gelooft ende betrout, dwelcke niet gheschieden en mach sonder den gheest Gods. psa.c.xv

29

Mer ic kenne hem, want ick ben van hem, ende hi heeft my gesonden.

30

Doen sochten si hem te vangen, mer nyemant en stack die hant aen hem, want sijn vre en was noch niet gecomen,

31

Mer vele vanden volcke geloofden in hem, * Ende seyden, Wanneer Christus coemt sal hi ooc meer teekenen doen dan dese doet?

32

Ende het quam voor die Pharizeen, dattet volc sodanige dingen van hem murmureerde. † Ende die Pharizeen ende hoochste Priesters seynden knechten wt, dat si hem vanghen souden.

33

⁺Doen seide Iesus tot haer, Ic ben noch een cleyne tijt bi v, ende dan gae ic wech tot den genen die mi gesonden heeft,

+ E vers 33

34

Ghi sult mi soecken ende niet vinden, ende daer ic ben, daer en moecht ghi niet comen.

35

Doen seiden die Ioden onder malcanderen, Waer wil dese henen gaen dat wi hem niet vinden en sullen? Wil hi onder dye Griecken gaen, dye hier ende daer verstroyt liggen, ende die Griecken leeren?

36

Waer is dat een reden dat hi seyt, ghi sult mi soecken, ende niet vinden? ende daer ic ben en moecht ghi niet comen.

37

Maer inden laetsten dach der feesten, die opt heerlicste was, so trat Iesus op ende riep segghende, Wye daer dorst, die come tot mi, ende drincke,

38

⁺Wie aen mi gelooft, so die scrift seyt, van dies lijf sullen vloeyen, vloeden des leuenden waters.

+ F vers 38

39

Dat syde hi vanden gheest den welcken ontfangen souden die in hem geloofden. *

[p. *]

Want die heylige geest en was noch daer nyet, want Iesus en was noch niet verclaert.

40

† Daerom veel volcx dye dese reden hoorden, seyden, Dese is een recht propheet,

41

Die ander seyden, hy is Cristus, ⁺ Mer sommighe seyden, soude Cristus van Galileen comen?

+ mich. v a

42

⁺En seyt die scrift nyet van den saet Dauid, ende vander plecke oft casteelken Bethlehem, daer Dauid van was, sal Cristus comen?

+ G vers 42

43

Also was een tweedracht onder al dat volck om hem,

44

Dye somige woude hem vangen, meer niemant en sloech hant aen hem.

45

Die knechten quamen totten hogen priesteren ende pharizeen ende si seyden tot haer? Waerom en hebt ghi hem niet gebracht?

46

Die knechten antwoorden? Noyt en heeft mensche also ghesproken, so dese mensche.

47

Doen antwoorden die Pharizeen, sijt ghi ooc verleyt?

48

Gelooft ooc ergent een ouerste, oft pharizeus in hem?

49

Maer dat volck, dat nyet vander wet en weet, is vermaledijt.

50

Nicodemus die byder nacht tot hem quam, welcke een onder haer was, seyde tot haer lieden.

51

Ordeelt onse wet eenen mensce, eermen hem verhoort, ende bekent wat hi doet?

52

Si antwoorden ende spraken tot hem, Sidi ooc een galileesce ondersoect ende siet, van Galilea en staet gheen Propheet op,

53

ende een yegelijc ginc also thuys.