Den Bybel met groter neersticheyt ghecorrigeert (Liesveltbijbel 1542)

¶ Hoe Ihesus Lazarum vander doot verwecte, ende die opperste der priesteren daerom eenen raet teghen Iesum hielden.

Dat .xi. Capittel.

1

⁺† DAer lach een crancke, ghenoemt Lazarus van Bethanien, inden casteelken Marie, ende haerder suster Martha,

+ A vers 1

2

Maria wast die den HERE ghesalft hadde met saluen, ende sijn voeten ghedroocht met haren hayre, der seluer broeder Lazarus lach sieck.

3

Doen seynden sijn susteren tot hem, ende deden hem seggen, HERE, siet, dien ghi lief hadt die leyt cranc.

4

Doen Iesus dat hoorde, so seyde hi, Die crancheit en is niet totter doot, mer totten prijse Gods, op dat die sone Gods daer door ghepresen soude worden,

5

Iesus hadde Martham lief ende haer suster ende Lazarum.

6

Als hi nv hoorde dat hi cranck was, so bleef hi twee dagen in die plaetse daer hi was.

7

Daer na seyde hi tot sinen discipulen,

8

Laet ons weder in Iudea gaen. Sijn discipulen seyden tot hem, Meester,

9

laest wouden die Ioden v steenighen, ende ghi wilt weder derwaerts? Iesus antwoorde,

10

En sijnder nyet twaelf vren binnen den daghe? ⁺ Wie des daechs wandelt, die en stoot hem niet, want hi siet dat licht deser werelt,

+ B vers 10

11

Maer so wie des nachts wandelt, die stoot hem, want daer en is gheen licht in hem. Dit seyde hi, ende daer na seyde hi tot haer, Lazarus onse vrient slaept, maer ic gae, op dat ick hem soude verwecken.

12

Doen seyden sijn discipulen, HERE slaept hi, so salt beteren met hem,

13

Maer Iesus seyde van sijn doot, maer si meynden dat hi vanden lichamelijcken slaep sprac.

14

Doen seyde hen Iesus vry wt,

15

Lazarus is ghestoruen, ende ick ben vrolijck om uwent wille, dat ic daer niet geweest en ben, op dat ghi gheloouen soudt, Mer laet ons tot hem gaen.

16

Doen seyde Thomas die Dydimus genaemt is tot den discipulen, Laet ons met hem gaen, dat wi met hem steruen.

17

Doen quam Iesus ende vandt hem dat hi vier daghen inden graue gheleghen hadde,

18

Bethanien was bi Hierusalem bi vijfthien stadien,

19

Ende veel Ioden waren tot Martham ende Mariam ghecomen, ⁺ om haer te troosten, van haren broeder.

+ C vers 19

20

Als Martha nv hoorde dat Iesus quam, so ghinc si hem teghen, Maer Maria bleef thuys sittende.

21

Doen sprack Martha tot Iesum, HERE hadt ghi hier geweest, mijn broeder en waer niet ghestoruen,

22

Mer ic weet ooc noch, dat wat ghi van God bidt, dat sal v God gheuen.

23

Iesus seyde tot haer, V broeder sal verrijsen.

24

Martha seyde tot hem, Ic weet wel dat hi verrijsen sal in die verrijsenisse, inden laetsten dage.

25

Iesus seyde tot haer, Ick ben die verrijsenisse ende dat leuen, Wie in mi ghelooft, die sal leuen, al waert dat hi ooc storue,

26

ende die daer leeft, ende gelooft in mi die en sal inder eewicheyt niet steruen,

27

Gelooft ghi dat. Sy seyde tot hem, HERE ia, Ic heb ghelooft dat ghi sijt Cristus, die sone Gods die in de werelt comen soude.

28

Ende doen si dat gheseyt hadde, so ghinck si wech, ende riep haer suster Maria heymelijc, ende seyde,

29

⁺Dye meester is daer ende roept v. Dye selue als si dat hoorde, stont si haestelic op, ende quam tot hem,

+ D vers 29

30

Want Iesus en was noch niet in dat casteelken ghecomen, mer hi was noch in die plaetse daer hem Martha ontmoette

31

Die Ioden die bi haer inden huyse waren ende troostense, doen si sagen dat Maria haestelijc op stont, ende wt ghinck, so volchden si haer na ende seyden, Si gaet totten graue om dat si daer weenen soude.

32

Als nv Maria quam daer Iesus was, ende sach hem, so viel si tot sinen voeten, ende seyde tot hem, HERE, waerdy hier geweest, mijn broeder en waer niet gestoruen.

33

Als Iesus haer sach weenen, ende die Ioden oock weenen die met haer quamen, so versuchte hi inden gheest, ende schudde hem seluen ende seyde,

34

Waer hebdy hem gheleyt? Si seyden HERE, comt, ende siet dat. Ende Iesus wert weenende. Doen seyden die Ioden,

35

Siet, hoe lief heeft hi hem ghehadt,

36

Mer sommige onder haer seyden, Heeft hi den blinden die ooghen opgedaen,

37

en const hy dan niet beschicken, dat dese niet en waer ghestoruen?

38

Maer Iesus versuchte weder in hem seluen, ende quam totten graue. Het was een gheclouen speloncke, ende eenen steen daer op gheleyt.

[afbeelding]

39

Mer Iesus seyde, Neemt den steen af, Doen seyde Martha die suster van die ghestoruen was. ⁺ HEERE hi stinct nv, want hi is vier dagen doot geweest, Iesus seyde tot haer,

+ E vers 39

40

En heb ic v niet geseyt, waert dat ghi geloofde, ghi soudt die heerlicheit Gods sien?

41

Doen hieuen si den steen af, daer die ghestoruen onder lach, Iesus sloech sijn oogen opwaerts ende seide, Vader, ic danc v dat ghi mi gehoort hebt,

42

doch ic weet dat ghi mi altijt hoort, mer om dat volc datter om staet heb ict geseyt, om dat si souden geloouen, dat ghi mi hebt geseynt.

43

Doen hi dat geseyt hadde, so riep hi luyde Lazare coemt hier wt.

44

Ende die ghestoruen quam wt ghebonden met graefdoecken aen voeten ende aen handen, ende sijn gesicht verbonden oft bedect met eenen sweetdoeck. Iesus seyde tot haer, Ontbint hem ende laet hem gaen.

45

Veel nv vanden Ioden die tot Mariam ghecomen waren, ende saghen tghene dat Iesus dede, gheloofden in hem. *

46

Maer sommige van hen ghinghen totten Pharizeen, ⁺ ende seyden haer wat Iesus ghedaen hadde.

+ Matth xxvi.a.

47

⁺† Doen vergaderden die hooghe Priesters ende

+ F vers 47

[p. *]

Pharizeen eenen raet, ende seyden, Wat doen wi? dese mensche doet veel teekenen,

48

Laten wi hem also, so sullen si alle aen hem gheloouen, So comen die Romeynen, ende nemen ons lant ende lieden,

49

Maer een onder haer genaemt Cayphas, die des seluen iaers hooghe priester was, seyde tot haer, Ghy en weet nyet noch en bedenct oock nyet,

50

het is ons beter dat een mensche sterue voor dat volc, dan dat geheele volck verderue.

51

Dat en seyde hi niet van hem seluen, mer want hi des seluen iaers hooghe Priester was, ⁺ so propheteerde hi, want Iesus soude steruen voor dat volc,

+ G vers 51

52

ende niet voor dat volc alleen, maer op dat hi die kinderen Gods, die verstroyt waren, tsamen soude brenghen,

53

Van dien dage aen so hielden si raet hoe si hem dooden mochten.

54

Iesus en wandelde niet meer int openbaer onder den Ioden, maer hy ghinck van daer, in een lant byder woestijnen, in een stadt genaemt Ephraim, ende hadde sijne wooninghe daer met sinen discipulen. *

55

Den Paesschen der Ioden was na bi, ende daer ghincker veel tot Hierusalem wt den lande voor paesschen, op dat si hen souden reynighen.

56

Doen stonden si ende vraechden na Iesum, ende spraken met malcanderen inden tempel, Wat dunct v, dat hi niet en coemt op die feeste?

57

Die ouerste Priesters ende Pharizeen hadden een ghebodt wt laten gaen, waert dat yemant wiste waer hi ware, dat hijt te kennen gaue, op dat si hem vanghen mochten.