Den Bybel met groter neersticheyt ghecorrigeert (Liesveltbijbel 1542)

¶ Hoe die HERE Iesus sijn discipulen trooste, ende vermaendese sijn gheboden te houden.

Dat .xiij. Capittel.

[afbeelding]

1

⁺VOor die feest van Paesschen, doen Iesus bekende dat sinen tijt ghecomen was, dat hi wt deser werelt totten vader soude gaen, ⁺ also hi die sine die inder werelt waren, hadde bemint, soo beminde hijse tot in dat eynde toe.

+ A vers 1

+ lu. xxij a

2

Ende na dat auonmael, doen nv die duuel Iudas Simon Iscariots int herte had gegeuen dat hi hem verraden soude,

3

Iesus wiste dat hem die vader al in sijn handen hadde ghegeuen, ende dat hi van Gode ghecomen was, ende tot God ghinc,

4

so stont hi vanden auontmael op, ende leyde sijn cleederen af, ende nam een dwale, ende omgorde hem,

5

daer na goot hi water in een becken, ende begonst den discipulen die ^a voeten te wasschen, ende droochdese metter dwalen daer hi mede omgordt was.

a door die voeten te wasschen meynt de scrift allen dienst die wt liefden gheschiet. i.Reg. xxv.g

6

Doen quam hi tot Symon Peeter, Ende die selue seyde tot hem, HERE, soudt ghi my mijn voeten wasschen?

7

Iesus antwoorde ende seyde tot hem, Dat ic doe, dat en weedt ghi nv niet, maer ghi sult dat namaels beuinden.

8

Doen seyde Petrus tot hem, Ghi en sult mi die voeten nemmermeer wasschen, Iesus antwoorde hem, Ist dat ic v niet en wassche, so en hebdy geen deel met mi,

9

⁺Symon Petrus seyde tot hem, HERE, niet die voeten alleen, mer ooc dye handen ende dat hooft,

+ B vers 9

10

Iesus seyde tot hem, Wie ghewasschen is, die en behoeft niet dan die voeten te laten wasschen, want hi is heel reyn, Ende ghi sijt reyn, mer niet alle,

11

Want hi wist sinen verrader wel, daerom seyde hi, ghi en sijt niet alle reyn.

12

Doen hi nv haer voeten ghewasschen hadde, ende sijn cleederen ghenomen, so sette hi hem weder neder, ende seyde tot haer luyden, Weet ghi wat ick v gedaen hebbe?

13

Ghi heet mi meester ende HERE, ende ghi segt wel daer aen, want ick bent ooc.

14

Ist dat ic nv, v meester ende HERE, v die voeten ghewasschen hebbe, so sult ghi ooc malcanderen die voeten wasschen.

15

Ick heb v een exempel ghegeuen, dat ghi doet so ic v ghedaen hebbe. *

16

⁺Voorwaer voorwaer segghe ick v, die knecht en is niet groter dan sijn heere, ⁺ noch die Apostel grooter dan die hem ghesonden heeft,

+ C vers 16

+ psal. xl.

17

Ist dat ghy dit weet, salich sijt ghi ist dat ghijt doet,

18

Ic en segghe niet van v allen, ick weet welcke ick vercoren hebbe, Maer op dat die scrift veruult werde, Die mijn broot eet, die treet mi met voeten,

19

Nv segghe ict v eert gheschiet, op dat wanneert gheschiet is, dat ghijt gelooft dat ict ben.

20

Voorwaer voorwaer ic seg v, wie v ontfangt, ist dat ic yemanden seynde, die ontfangt mi, Ende so wie mi ontfangt, die ontfangt dien, die mi ghesonden heeft.

21

Doen Iesus dit gheseyt hadde, so verschudde hy hem inden gheest, ende tuychde, ende seyde. ⁺ Voorwaer voorwaer segge ick v,

+ Matth xxvi.c. lu. xx.c.

22

een onder v sal my verraden. Doen saghen hen die discipulen onder malcanderen aen, ende haer wert banghe vanden welcken hi sprac.

23

Mer daer was een onder sijn discipulen die ter tafelen sadt, op den schoot Iesu, den welcken

[p. *]

[afbeelding]

Iesus lief hadde,

24

dien wencte Symon Petrus, dat hi hem vragen soude, wie dat waer, van dien hi seyde,

25

Want die selue lach op die borst Iesu,

26

ende seyde tot hem, HERE wie ist? Iesus antwoorde, Die ist, dyen ic den bete insteke ende geue. Ende hi stac den bete in, ende gaf hem Iude Simon Iscarioth,

27

Ende na den bete voer die duuel in hem

Doen seyde Iesus tot hem,

28

Wat ghi doet, dat doet geringe, Mer dat en wist niemant aen die tafel, waer toe hijt hem seide.

29

Sommige meynden om dat Iudas die borsse hadde, dat Iesus tot hem seide, coopt dat ons van noode is op die feest, oft dat hy den armen yet gheuen soude.

30

Doen hi den beet genomen hadde, ginc hi terstont wt, ende het was nacht.

31

Doen hi wtgegaen was seide Iesus Nv is des menschen sone verclaert, ende God is verclaert in hem,

32

⁺Is God in hem verclaert, so sal hem God ooc verclaren in hem seluen, ende sal hem terstont verclaren.

+ D vers 32

33

† Lieue kinderen, ic ben noch een corte wijle bi v, Ghi sult mi soecken, ende so ic totten Ioden seyde, daer ic henen gae, daer en moecht ghi niet comen, ende ic seg v nv

34

Een nyeu gebot gheue ic v, dat ghy malcanderen lief hebt, so ic v lief gehadt hebbe,

35

Daer bi sal yegelic bekennen, dat ghi mijn discipulen sijt, ist dat ghi liefde onder malcanderen hebt.

36

Symon Petrus seyde tot hem, HERE, waer gaet ghi henen? Iesus antwoorde hem, Daer ic henen gae, en moechdi mi nv niet volgen, mer ghi sult mi hier namaels volgen.

37

Petrus seyde tot hem, HERE, waerom en mach ic v nv niet volgen? Ick wil mijn leuen bi v laten. ⁺

+ Matth xiiij. b lu. xxij c

38

Iesus antwoorde hem, Sout ghi v leuen bi mi laten? Voorwaer voorwaer ic seg v, die haen en sal niet crayen tot dat ghi mi driemael hebt versaect *