Den Bybel met groter neersticheyt ghecorrigeert (Liesveltbijbel 1542)

¶ Hoe Iesus sijn discipulen leerde ende onderwijsde.

Dat .xvi. Capittel.

1

⁺DIt heb ick tot v ghesproken, op dat ghy v niet en verarghert,

+ A vers 1

2

Si sullen v inden ban doen. Die tijt coemt, dat so wie v doodet, sal meynen God eenen dienst te doene daer aen,

3

Ende dit sullen si v daerom doen, dat si noch mijnen vader, noch mi gekent en hebben,

4

Mer dit heb ick tot v ghesproken, op dat, wanneer dye tijt comen sal, dat ghi daerom peyst, dat ict v gheseyt hebbe. Dese dinghen en heb ick v van beghinne niet gheseyt, want ick was by v. *

5

⁺† Mer nv gae ick totten ghenen die mi ghesonden heeft, ⁺ende niemant onder v en vraecht mi, waer gaet ghi henen? #

+ B vers 5

+ Matth. xxiiij.b lu. xxi.c

6

Mer om dat ick dit tot v ghesproken hebbe, so is v herte vol drucx gheworden,

7

Mer ic segge v die waerheyt, het is beter dat ic wech gae, Want ist dat ick niet wech en gae, so en comt die trooster niet tot v, Mer ist dat ic van v gae, so wil ic hem tot v seynden.

8

Ende wanneer die selue comt, die sal die werelt straffen om die ^a sonde, ende om die gherechticheyt, ende om dat oordeel,

a sonde, dat is ongelooue deu. xxx

9

Om die sonde, om dat si niet in mi en geloouen,

10

Om die gherechticheyt, om dat ick totten vader gae, ende ghi en sult mi voortaen niet sien,

11

Om dat oordeel, ⁺ om dat die prince deser werelt gheoordeelt is.

+ C vers 11

12

Ick heb v noch veel te segghen, maer ghy en connes nv niet ghedragen,

13

Mer wanneer die ghene, dye gheest der waerheyt comen sal, die sal v in alle waerheyt leyden, Want hi en sal niet van hem seluen spreken, mer wat hi hooren sal, dat sal hi spreken, ende dat toecomende is, dat sal hy v vercondighen,

14

Die selue sal mi prijsen, want vanden mijnen sal hijt nemen, ende v vercondighen.

15

Alle dat die vader heeft, dat is mijne, Daerom heb ick gheseyt, hi salt vanden mijnen nemen, ende v vercondighen. *

16

† Ouer een weynich en suldi mi niet sien, ende weder ouer een weynich so sult ghi mi sien, want ic gae totten vader.

17

Doen seyden sommige van sinen discipulen onder malcande-

[p. *]

ren, Wat is dit, dat hi seyt tot ons ouer een weynich so suldy mi niet sien, ende weder ouer een weynich soo sult ghi mi sien, ende dat ic totten vader gae? ⁺ Doen seyden si

+ D vers 17

18

wat is dit, dat hi seyt, ouer een weynich? Wi en weten niet wat hi spreect.

19

Doen mercte Iesus dat si hem vragen wouden, ende seyde tot haer, Daer af vraecht ghi lieden onder malcanderen, dat ic geseyt hebbe, ouer een cleyne wijle so en suldy mi niet sien, ende weder ouer een cleyne wijle so suldy mi sien.

20

Voorwaer voorwaer ic seg v, ghi sult weenen ende huylen, mer de werelt sal haer verblijden, ⁺ Mer ghi sult truerich ende droeue sijn, maer v droefheit sal in blijscap verandert worden.

+ Hiere. xxxi.a. Ia. iiij b

21

⁺Wanneer een vrouwe baert, so heeft si droefheit, want haer vre is gecomen, Mer als si dat kint gebaert heeft, so en denct si niet meer op den ancxt, om der bliscappen wille, dat die mensce ter werelt geboren is.

+ E vers 21

22

Ende ghi hebt nv ooc droefheit, mer ic wil v weder sien, ende v herte sal hem verblijden, ende niemant en sal v blijcap van v nemen. * Ende in dien seluen daghe en suldy niet vraghen.

23

† Voorwaer voorwaer ic seg v, ist dat ghi den vader yet bidt in mijnen name, so sal hijt v gheuen, ⁺

+ Matth. xxi.c. Lu. xi.b

24

Tot noch toe en hebdy niet ghebeden in mijnen name, Bidt so sult ghi ontfanghen, op dat uwe blijscap volcomen sy.

25

⁺Dese dingen heb ic v door ghelijckenissen gesproken, Mer den tijt coemt, dat ic nyet meer door gelijckenissen met v spreken en sal, mer vry wtuercondigen van mijnen vader,

+ F vers 25

26

Inden seluen dage sult ghi in mijnen naem bidden, Ende ic en seg v niet dat ic den vader voor v bidden wil,

27

Want hi die vader selue heeft v lief, om dat ghi my lief gehadt hebt, ende gelooft dat ic van Gode wtgegaen ben,

28

Ic ben vanden vader wtgegaen, ende ben ghecomen in die werelt, wederom so verlaet ic die werelt, ende gae totten vader.

29

Sijn discipulen seyden tot hem, Siet nv spreect ghi vry wt, ende en spreect in geen gelijckenisse

30

Nv weten wi dat ghi alle dingen weet, ten behoeft niet dat v yemant vrage, Daerom so geloouen wi dat ghy van God wtgegaen sijt.

31

Iesus antwoorde hen, Nv gelooft ghi, Siet de vre coemt, ende is alreede ghecomen, dat ghi verstroyt sult worden, ⁺ een yegelic int sine, ende mi alleen laten,

+ G vers 31

32

ende ick en ben niet alleen, ⁺ want die vader is bi mi.

+ Matth. xxvi.d. ia. xiij b

33

Dese dingen heb ic met v ghesproken, op dat ghi in mi vrede soudt hebben, Inde werelt hebdi ancxt, mer sijt ghetroost, ic heb die werelt verwonnen. *