Den Bybel met groter neersticheyt ghecorrigeert (Liesveltbijbel 1542)

¶ Dye toecoemst Pauli in Tyrum ende in Cesariam, ende hoe Paulus so minlick ontfanghen wert in Hierusalem vanden Christen Ende hoe die Ioden sochten hem te dooden, ende vanden seluen geuanghen wert.

Dat .xxi. Capittel.

1

⁺ALst nv gheschiede, dat wi van hem aftreckende, wech voeren, so quamen wy rechts loops tot Coum, ende den nauolghenden dach tot Rodis,

+ A vers 1

2

ende van daer tot Pataram Ende een schip gheuonden hebbende dat in Phenicen varen soude, traden wi daer in ende voeren.

3

Mer als wy Cypren int ghesicht quamen, lieten wijse ter slincker hant ende scheepten in Syriam, ende voeren tot Tyron, Want daer soude dat scip die ware wt legghen.

4

Ende als wy daer discipulen vonden, bleuen wy daer seuen daghen, die seyden Paulo door den gheest, dat hi niet op en soude reysen tot Hierusalem.

5

Ende het gheschiede, doen wi die daghen ouerbracht hadden, reysden wi wt, ende wandelden, ende si alle met huysvrouwen ende kinderen gheleyden ons tot buyten der voorstadt, ende nederknielende in dat oeuer, baden.

6

Ende als wi malcanderen gheseegent hadden, ghinghen wy te schepe, mer si lieden keerden weder totten haren.

7

⁺Ende wi die schipuaert volbrocht hebbende van Tiro, quamen tot Ptolomaida, ende die broeders gegroet hebbende, bleuen wi eenen dach bi haer.

+ B vers 7

8

Des anderen daechs daer na quamen wi dye met Paulo waren tot Cesarien, Ende ghingen in dat huys Philippi des Euangelisten, die een vanden seuen was, ende bleuen bi hem.

9

Die selue hadde vier dochteren dye maechden waren ende propheteerden.

10

Ende als wi daer meer daghen bleuen, soo ouerquam daer een Propheet van Iudea, ghenaemt Agabus.

11

Doen dese tot ons was ghecomen, nam hi den gordel Pauli, ende bant sijn handen ende voeten, ende seyde. ⁺ Dit seyt die heylighe gheest, die man wiens dat gordel is, sullen die Ioden also binden tot Hierusalem, ende sullen hem inder Ioden handen leueren

+ C vers 11

12

Als wi dit hoorden, baden wi hem, ende oock die van dier plaetsen waren, dat hi niet op en reysde tot Hierusalem.

13

Doen antwoorde Paulus ende seyde, Wat doet ghi dat ghi weent, ende mijn herte bedroeft, want ic ben bereet niet alleen my te laten binden, mer ooc te steruen te Hierusalem om den name des HEEREN Iesu,

14

Doenment hem niet en const ontgheuen, lieten wi hem gewerden, seggende. Den wille des HEREN geschiede.

15

Ende na den seluen dagen bereit sijnde, reisden wi op tot Hierusalem.

16

Daer quamen ooc sommige vanden discipulen van Cesarien met ons, met haer brengenden eenen van Cypren, genaemt Manason, eenen ouden discipule die ons herberghen soude.

17

Doen wi nv tot Hierusalem quamen, ontfinghen ons die broeders gheerne.

18

Mer des anderen daechs ghinck Paulus in tot Iacobum, ende die ouders quamen aldaer,

19

ende alsoo hijse ghegroet hadde, so vertelde hi deen nae dander, wat God door sinen dienst onder die Heydenen ghedaen hadde.

20

Doen si dat hoorden, presen si den HEHRE, ende seyden tot hem. Broeder, ghi siet, hoe veel duysent Ioden datter sijn die geloouich ghewoorden sijn, ende sijn alle neerstige nauolgers der wet.

21

⁺Si hebben van v ghehoort dat ghy een afkeer van Moyse leert allen den Ioden die onder die Heydenen sijn, segghende, si en souden haer kinderen niet besnijden, noch ooc na die gewoonte niet leuen,

+ D vers 21

22

Wat is dan nv? die menichte moeten ymmer te samen comen, wandt het sal haer ter ooren comen dat ghi ghecomen sijt, daerom doet nv tghene dat wi v segghen.

23

Wi hebben vier mannen dye hebben een ^a ghelofte op

a Gheloofte.

[p. *]

haer neemt die selue tot v, ⁺ ende laet v met haer reynigen, ⁺ ende waget dien cost aen haer lieden, dat si haer hoofden bescheeren,

+ E vers 23

+ biden hebreen was een gifte diemen gode geloofde ende offerde ie. vij. b. nu. vi.a.

24

ende si sullent alle verstaen dat niet en si dat si van v gehoort hebben, mer dat ghi ooc wandelt ende hout die wet,

25

Want den gelouighen wt den Heydenen hebben wy gescreuen ende besloten dat si des gheen houden en souden, dan hem alleen wachten vanden afgoden offer, ende vanden bloede, vanden versticten, ende van oncuysheyt.

26

Doen nam Paulus die mannen tot hem, ende liet hem des anderen daechs met hen reynighen, ende ghinck inden tempel vercondighen die veruullinghe der daghen der reynigen, so langhe tot dat voor een yegelijck van haer den offer gheoffert wert

27

Maer doen die seuen dagen bycans voleynt waren, sagen hem die Ioden van Asia inden tempel, ⁺ ende beroerden dat geheel volck, ende sloegen die handen aen hem, roepende,

+ F vers 27

28

Ghi mannen van Israhel helpt dit is die mensce die alle menscen in allen plaetsen leert tegen ons volc, wet, ende tegen dese plaetse. Daer toe heeft hi die Griecken ooc inden tempel geleyt, ende heeft dese heylige plaetse gemeyn gemaect

29

Want si hadden Trophimum den Epheser met hem inden tempel ghesien, den welcken si meynden dat Paulus inden tempel hadde geleyt,

30

ende die gehele stadt wert beroert, ende daer gesciede eenen toeloope des volcx. Ende si namen Paulum ende trocken hem wt den tempel, ende terstont worden die dueren ghesloten

31

⁺Maer doen si hem sochten te dooden, quam dat geroep voor den ouersten hooftman, hoe dat geheel Hierusalem gheturbeert was,

+ G vers 31

32

Die welcke van stonden aen crijschknechten ende hooftlieden tot hem nam ende liep daer onder. Doen si den hooftman ende dye crijschknechten saghen, hielden si op van Paulum te slaen.

33

Als die hooftman naerder bi quam, nam hy hem, ende hiet hem binden met twee ketenen, ende vraechde wie hi ware, ende wat hi gedaen hadde.

34

Deene riep dit int volc, dander dat. Mer doe hi niet sekers bekennen en conste om des geruchs wille, hiet hi hem inden heyrleger leyden,

35

ende doen hi aen die trappen was geuielt dat hi vanden knechten ghedragen wert, om dat gewelt des volcx,

36

want daer volchde veel volcx na roepende, doet hem wech

37

Als Paulus nv inden heyrleger ingeleyt wert, seyde hi totten hooftman, mach ic met v spreken? Hi seyde, Condi griecx?

38

En sidi niet die Egiptenaer, die voor desen dagen eenen oploop gemaect hebt, ende leydet wt in die woestine vier duysent heymelike moorders?

39

Paulus seyde, ick ben een Iootsch man, van Tharsen, een borger eender vermaerder stadt in Cilicia Ic bid v, oorlooft mi te spreken totten volcke.

40

Als hijt hem oorloofde, Paulus staende op die trappen, wencte den volcke metter hant, Ende een groote stilte sijnde, sprac hi tot haer in Hebreeusch, seggende