Den Bybel met groter neersticheyt ghecorrigeert (Liesveltbijbel 1542)

Hoe Paulus gheaccuseert wert omtrent den feestdach ende waerom dat hi te Romen gheuoert wert om dat hi begeerde te appelleren, ende hoe dat die coninc Agrippa hem seluer woude hooren

Dat .xxv. Capittel

1

⁺DOen Festus int lant gecomen was, reysde hi na drie dagen af van Cesaria tot Ierusalem,

+ A vers 1

2

doen ghingen die hoochste priesters, ende die principaelste der Ioden voor hem tegen Paulum, ende baden hem,

3

gonst begheerende teghen hem, dat hi hem liet roepen tot Hierusalem, ende leyden hem lagen om hem onder wegen te dooden.

4

Doen antwoorde Festus, dat Paulus ymmer tot Cesarien behouden soude worden, hi soude cortelic weder derwaerts reysen.

5

Daerom die onder v lieden (seyde hi) vermogen, die laet mede af reysen, ende den man beclagen, ist datter eenige misdaet in hem is.

6

⁺Mer doen hi daer meer dan thien dagen vertoeft hadde, reysde hi af tot Cesarien, ende des anderen daechs sadt hi op den rechtstoel, ende hiet Paulum halen.

+ B vers 6

7

Doen die selue daer quam, stonden die Ioden die van Ierusalem afgecomen waren om hem, ende brachten vele sware saken op, die welcke si niet en consten bewijsen.

8

Paulus hem seluen verantwoordende sprac, Ic en heb mi noch tegen die wet, noch tegen die Ioden, noch teghen den tempel noch teghen den Keyser niet besondicht

9

⁺Mer Festus willende den Ioden weldade bewijsen, antwoorde Paulo, seggende, Wildi opgaen tot Hierusalem, ende daer van desen voor mi geoordeelt worden? Paulus seyde,

+ C vers 9

10

ic stae voor des Keysers gherecht, daer moet ic geoordeelt worden, Ic en heb den Ioden geen leet gedaen, so ghi ooc alder best weet,

11

mer heb ic yemanden leet gedaen, ende yet gedaen dat der doot weerdich is, so en weygere ic mi niet te steruen Ende en isser der saken geen daer si mi af besculdigen so en can mi niemant haer lieden gheuen,

12

Ick beroepe mi op den Keyser, Doen beriet hem Festus metten rade, ende antwoorde. ⁺ Ghi hebt op den Keyser beroepen, daerom suldy totten Keyser gaen

+ D vers 12

13

Na sommige dagen quam die coninc Agrippas ende Bernice tot Cesarien, Festum te ontfangen,

14

ende doen si daer vele dagen vertoefden, so leyde Festus den coninc die sake van Paulo voor, ende seyde.

15

Daer is een man van Felix gebonden gelaten, om wiens wille die hooge priesters ende ouders der Ioden voor mi quamen doen ic te Hierusalem was, ende begeerden een vonnisse teghen hem,

16

den welcken ick antwoorde Het en is der Romeynen wijse oft gewoonte niet, dat een mensce ouer gegeuen werde te dooden, eer dat die beschuldichde sijn beschuldigers tegenwoordich hebbe, ⁺ ende plaetse ontfange, hem van dier aenspraken te verantwoorden.

+ E vers 16

17

Doen si hier te samen waren gecomen, so en sette icx niet wt, mer sadt des anderen daech op den rechtstoel, ende hiet den man voort brengen,

18

van welcken doen die besculdigers stonden, ende en brachten geen saken van misdaet aen, daer ic quaet af vermoede.

19

Si hadden sommige vragen tegen hem van haer superstitie, ende van eenen gestoruen Iesu, den welcken Paulus seyde dat hy leefde.

20

Mer ic der vragen niet verstaende, seide oft hi te Hierusalem woude reysen, ende daer van desen laten oordeelen.

21

Doen Paulus hem beriep oft appelleerde, dat hi der kennisse des keysers behouden soude worden, ⁺ so hiet ic hem houden tot dat ic hem totten Keyser seynde.

+ F vers 21

22

Agrippas seyde tot Festum, Ic woude den mensce ooc geerne hooren. Hi seyde, morgen sult ghi hem hooren.

23

Tsanderendaechs doen Agrippas ende Bernice met grooter pronckerijen quamen ende ghinghen in dat dinghuys, metten ouerhooftlieden ende principaelsten mannen der stadt, ende doent Festus hiet, wert Paulus gebracht,

24

ende Festus seyde, Agrippa lieue Coninck, ende alle ghi mannen die hier met ons sijt, daer siet ghi den man om welcken mi die gheheele menichte der Ioden gebeden heeft, beyde te Hierusalem, ende ooc hier, roepende, dat hi niet langer en mocht leuen,

25

Mer doen ic vernam dat hi niet gedaen en hadde, dat der doot waerdich ware, ende hi oock hem seluen op den Keyser beriep, soo heb ick ghesloten hem te seynden

26

⁺Van welcken ick niet sekers en hebbe den heere te scrijuen, Waerom ic hem voor v hebbe doen brenghen, ende alder meest voor v Coninck Agrippa, op dat ic hem ondersoecke, ende also hebben mach dat ic v scrijue.

+ G vers 26

27

Want het dunckt mi onredelick te sijn, eenen ghebonden te seynden, ende die sake tegen hem niet daer by.