Den Bybel met groter neersticheyt ghecorrigeert (Liesveltbijbel 1542)

Hoe Paulus gheaccuseert wert aen des Keysers rechts hoe na die beclaginghe vertrocken wort die sententie des rechts

Dat .xxiiij. Capittel

1

⁺NA vijf dagen quam die hoochste Priester Ananias af metten ouders, ende metten voorspreke Tertullo, die quamen voor den president tegen Paulum,

+ A vers 1

2

ende Paulum geroepen hebbende, begonst Tertullus te clagen seggende.

3

Dat wi onder v in groten vrede leuen, ende datter door v voorsienicheyt, alder heerlicste Felix, vele redelike daden oprechtelic bescict werden, dat ontfangen wi altijt in allen plaetsen, met alder dancbaerheit

4

Maer op dat ic v niet langer en vertrecke, so bid ick v wilt ons cortelic horen na v goedertierenheyt

5

Wi hebben desen man geuonden schadelick, ende eenen oploop verweckende, allen den Ioden ouer alle die werelt, ende die principaelste der secten der Nazarenen,

6

die daer ooc op toegeleyt heeft den tempel te ontwijden den welcken wi ooc grepen ende oordelen wouden na onse wet.

7

Mer Lysias die onderhooftman voorquam hem dat, ende ontrac hem met groot gewelt wt onsen handen

8

ende hiet sine beclagers tot v comen, van welcken ghi ondersoecken muecht, ende van allen dyen daer wi hem af besculdighen bekennen.

9

Die Ioden seyden ooc daer toe dat also ware

Mer Paulus, doen hem die President wencte te

[p. *]

spreken, antwoorde hi.

10

⁺Want ic weet dat ghi in desen volcke nv vele iaren een rechter sijt geweest, wil ic mi seluen goets moets verantwoorden,

+ C vers 10

11

in dien ghi bekennen muecht, dat niet meer dan twaelf dagen en sijn dat ic op ben gegaen tot Ierusalem om te aenbeden.

12

Ooc so en hebben si mi inden tempel niet gheuonden met yemant sprekende, oft eenigen oploop makende inden volcke, noch inden scolen, noch inder stadt.

13

⁺Si en connens ooc niet bi gebrengen, daer si mi af besculdigen.

+ D vers 13

14

Mer dat belijde ic v na dien wege die si eene secte heeten, diene ic also den God mijnder vaders dat ic alle dien gelooue dat inder wet ende inden propheten gescreuen staet,

15

ende hebbe hope in God, dat welcke si oock verwachten, te weten, dat die verrijsenisse der dooden toecomende si, beyde der gerechter, ende der ongerechter

16

inden selfden oeffene ick mi om een onuerargerde conscientie altijt tegen God ende den menscen te hebben

17

Mer na veel voorleden iaren bracht ic aelmoessen ende offerhanden mijnen volcke.

18

Daer ouer vonden si mi mi seluen reynigende inden tempel, ⁺ sonder alle rumoer ende geruchte

+ E vers 18

19

Daer waren sommige Ioden wt Asia, die welcke hier voor v souden zijn, ende mi besculdigen, ist dat si yet tegen mi hadden,

20

oft laet dese selue seggen, oft si yet onrechts aen mi beuonden hebben, want ic hier voor den raet stae,

21

dan alleen om der stemmen wille dat ic onder haer staende riep. Ic werde heden vander verrijsenisse der dooden van v lieden gheoordeelt

22

⁺Doen Felix dat verhoorde, sette hi dat wt, Want hi wiste sekerlic wel van desen wege, ende seyde, Wanneer Lisias die ouerhooftman af comt, so wil ic uwe sake vereysschen,

+ F vers 22

23

Mer hi beual den ouerhooftman Paulum te bewaren, ende ruste laten hebben, ende nyemant vanden sinen en soude verbieden oft beletten hem te dienen oft tot hem te comen.

24

⁺Mer na sommige dagen quam Felix met sijnder huysurouwen Drusilla, die een Iodinne was, ende eyschte Paulum, ende hoorde dat gelooue in Christum van hem.

+ G vers 24

25

Doen Paulus vander gherechticheyt ende cuysheyt, ende vanden toecomenden oordeel disputeerde, verscricte Felix ende antwoorde. Latet op dit pas also blijuen, gaet henen wanneer ic bequamen tijt hebbe, soo wil ick v herwaerts doen roepen,

26

daer en binnen hopende dat hem gelt van Paulo gegeuen soude werden, dat hi hem soude ontbinden. Daeromme hi hem ooc dicwil liet roepen, ende sprack met hem.

27

Twee iaer om sijnde quam Portius Festus, in Felix stede. Felix willende den Ioden een wel daet bewijsen, liet Paulum gebonden.