Den Bybel met groter neersticheyt ghecorrigeert (Liesveltbijbel 1542)

Die Apostel leert dat de minste ende ondersaten onderdanich sullen wesen haren ouersten, ende dat ouermits hulpe, bistant, ende liefde.

Dat .xiij. Capittel

1

⁺ENde yegelic si der ouerheyt ende macht onderdanich. Want daer en is gheen macht dan van God,

+ A vers 1

2

Die macht dye nv is, die is van God geordineert, also dat wie hem tegen die macht sedt, die wederstaet Gods ordinancie, ende die dese wederstaen, die sullen ouer haer een ordeel ontfangen,

3

want die ouerste en sijn niet den goeden wercken, mer den quaden tot vreesen Daerom wildi niet vreesen voor die macht, so doet goet, ende ghi sult lof vanden seluen hebben,

4

maer doedy quaet, so vreest. Want si en draecht dat sweert niet te vergeefs, Si is Gods dienersse, ende een wrakersse tot straffinge ouer den ghenen die quaet doen,

5

Aldus sijt nv wt noot onderdanich, niet alleen om der straffingen wille, mer ooc om der conscientien wille,

6

Daerom moet ghi ooc scot geuen, Want si zijn Gods dienaers, die sulcke bescerminge aenueerden.

7

⁺Aldus geeft nv een yegelijc wat ghi sculdich sijt, scot dyen schot toebehoort, wechgelt, dyen ghi wechgelt sculdich sijt, vreese dyen ghi vrese sculdich sijt, eere, dien ghi eere sculdich sijt.

+ B vers 7

8

† En sijt niemandt yet schuldich dan dat ghi malcanderen liefhebt, want die den anderen liefheeft, die heeft die wet veruult,

9

want datter geseyt is, Ghi en sult geen ouerspel doen, ghi en sult niet dootslaen, ghi en sult niet stelen, ghi en sult geen valsch getuych geuen, v en sal niet gelusten, ende isser noch eenich ander gebot meer, dat is in dit woort begrepen. Ghi sult liefhebben uwen naesten als v seluen

10

Die liefde en doet den naesten niet quaets. Daerom is die liefde die verullinge der wet

[p. *]

11

† Ende nv dat wetende, namelic den tijt, dat de vre daer is vanden slaep op te stane, Want nv onse salicheyt nader is, dan doen wijt geloofden.

12

Den ^a nacht is vergaen, den dach is bi gecomen. Daerom laet ons af worpen dye wercken der duysternissen, ende aendoen de wapenen des lichts,

a Nacht dat is de onwetentheyt, ende den dach is die oprechte kennisse ghegheuen, door dat euangelie i.tes. v.a

13

laet ons eerbaerlic wandelen, als inden dach, niet in eten ende suypen, niet in traecheit, ende in weeldicheyt, of dertelheyt,

14

niet in kiuen ende benijdinge, mer doet aen den HERE Iesum Cristum. * Ende en doet niet na die wijsheyt des vleeschs om sinen lust te boeten.