Den Bybel met groter neersticheyt ghecorrigeert (Liesveltbijbel 1542)

Die Apostel vermaent die ouerste ende volmaecste dat si niedt verworpen noch versmaden en sullen dye onuolmaeckste, dye welcke noch cranck int ghelooue sijn, ooc dat sise niet scandalizeren en sullen, maer payeselic stichten, treckende alleyskens tot die volmaectheyt.

Dat .xiiij. Capittel

1

⁺DIe cranc sijn int gelooue, neemt tot v ende en verwerret die conscientien niedt,

+ A vers 1

2

Die eenige gelooft dat hi alle dinc eten. mach. Mer die cranc is dye ete moes

3

Wie dat eet die en versmade den genen niet die niet en eet, ende die niet en eet, en oordeelt den ghenen niet, die eet. Want God heeft hem tot hem ghenomen.

4

Wie sidy dat ghi eenen vreemden knecht oordeelet. Hi ^a staet of valt sinen Here, ende hi mach wel opgerecht worden. Want God can hem wel oprechten.

a Staen dats int gelooue blijuen. i.cor. x.d

5

Deen acht den eenen dach voor den anderen, dander achtse alle gelijc. ⁺ Een yegelick si sijns sins seker,

+ B vers 5

6

Wie den dach ondersceyt oft achtet, die doet den HERE ende die den dach niet en ondersceyt, die doet oock den HERE, wie dat eet, die eet den HEERE ende danct God, ende die niet en eet, die en eet niet den HERE ende danct ooc God.

7

Want nyemant van ons en leeft hem seluen, noch nyemant en sterft hem seluen,

8

leuen wi so leuen wi den HEERE, steruen wi, so steruen wi den HERE. Daerom weder wi leuen oft steruen, so sijn wi des HEREN.

9

Want daer toe is Cristus ooc gestoruen ende verresen, ende weder leuende geworden, dat hi een HERE soude sijn ouer alle leuende ende doode

10

Mer ghi, wat oordeeldi uwen broeder? Oft ghi ander, wat verachti uwen broeder? Wi sullen al voor den rechterstoel Cristi geset worden. Gelijc alst ghescreuen staet,

11

so warachtelic als ic leue spreect die HEERE, So sullen voor mi alle knyen buigen, ende alle tongen sullen God belijden.

12

Daerom sal nv een yegelijck God rekenscap geuen voor hem seluen,

13

Daerom en laet ons niet meer malcanderen oordeelen.

Mer oordeelt dat veel meer, dat nyemant sinen broeder eenigen aenstoot oft erfgenisse en sette.

14

⁺Ic weet, ende ic bens seker inden HERE Iesu, datter niet gemeyns, oft onreyns en is van hem seluen, dan die dat voor gemeyn hout, dien ist gemeyn,

+ C vers 14

15

Mer ist dat v broeder ouer v spise bedroeft wort, so en wandeldi niet na der liefden.

16

Lieue en bederft dien niedt met v spijse, om wiens wille Cristus ghestoruen is.

17

Daerom maect dat onse goet niedt ghelastert en werde. Want dat rijc Gods en is niet eten oft drincken, mer gerechticheyt ende vrede, ende blijscap inden heyligen geest

18

Wie daer inne Cristum dient, die is Gode behaechlic, ende den menschen geproeft.

19

Daerom, laet ons daer na staen, tot dat ghene dat tot den vrede dient, ⁺ ende wat tot beteringe onder malcanderen dient

+ D vers 19

20

Lieue broeders, en verstoort Gods werc niet om der spisen wille, Het is warachtich al reyne, mer ten is dien niet goet, die dat eet met aenstoot sijnder conscientien,

21

Het is veel beter dat ghi gheen vleesch en eet, of geenen wijn en drinct, of yet daer hem v broeder aenstoot, oft ergert, oft cranc wert,

22

Heb dijt geloue, so hebbet bi v seluen voor God, Tis salich, dat hem nyemant consciencie en maect int gene dat hi aenmerct.

23

Daerom die daer aen twijfelt, ist dat hijt etet, die is verdoemt, Want ten gesciet wten geloue niet,

24

ende wat wten gelooue nyet en geschiet dat is sonde.