Den Bybel met groter neersticheyt ghecorrigeert (Liesveltbijbel 1542)

Die Apostel verworpt die dwalinge der Corinthen, om dat si sommige dienaers der kercken te vele toescrijuen. Ende hi spreket van die tymmeringe op hout, hoy, stoppelen, Ende hoe dat die wijsheyt der werelt sotheyt is voor God.

Dat .iij. Capittel

1

⁺LIeue broeders, daerom en const ic met v niet spreken, als met geestelike menschen mer als met vleescelike ghelijc ionghe kinderen in cristo.

+ A vers 1

2

Melc heb ic v te drincken gegeuen ende geen spise, want tot noch toe, en mochti der spisen niet, noch ooc en muechdyse niet, want ghi sijt noch vleescelic,

3

Want als onder v benijdinge, tweedracht ende stridinghe is, sijt ghi dan niet vleeschelic, ende wandelt na menschelijcker wijse?

4

Wanneer die een seyt, Ic hoor Paulus toe, dye ander ic hoor Apollo toe, Sidi dan niet vleescelic.

5

⁺Wie is Paulus. Of wie is Apollo? si zijn dienaers, door welcke ghi geloouich sijt geworden, ende een yegelic als de HERE gegeuen heeft,

+ B vers 5

6

Ic heb geplant, Appollo heuet nat gemaect, mer God heeft den wasdom gegheuen,

7

Also en is nv, noch die daer plant, noch die dat nat maect yet, Mer God die den wasdom gheeft.

8

Mer die plant, ende die nat maect, sijn deen gelijc dander, ⁺ Mer een yegelick sal sinen loon ontfangen na sinen arbeyt,

+ C vers 8

9

Want wi sijn Gods hulpers, ghi sijt Gods ackerwerc, ende ^a Gods timmeringe,

a Gods timmeringe is tvolc dat geleert is int geloue cristi, door gods leringen ende die liefde sijns naeste.

10

Ic van Gods ghenaden die mi gegeuen is, hebt fundament geleyt, als een wijs timmermeester, een ander timmert daer op, Mer een yegelijc sie toe hoe hi daer op timmere

11

Want een ander fundament en mach nyemant leggen, dan dat geleyt is, dat is Christus Iesus

12

So wie daer op timmert gout, siluer, dierbaer ghesteenten, hout, hoy, stoppelen, eens yegelicx werck sal openbaer worden.

13

^b Des HEREN dach salt claer maken, want het sal in den viere geopenbaert werden ende dat vier sal eens yegelijcken werc proeuen, hoe danich dat is,

b De dach des heren is hier den dag de. tribulatien ps. xvi a

14

So wyens werc bliuen sal, dat hi daer op getimmert heeft, die sal loon ontfangen,

15

soo wyens werc brant die sal scade lijden, mer hi selue sal salich worden, nochtans also als doort viere

16

En weet ghi niet dat ghi den tempel Gods sijt

[p. *]

ende dat die geest Gods woont in v?

17

So wie den tempel Gods ^c sceynt, die sal God sceynden Want die tempel Gods is heilich, dat sijt ghi,

c Den tempel Gods sceynden, Dat is valsche leeringen preken in die stede der euanghelien ephe. iiij. psal xciij

18

Niemant en bedriege hem seluen. So wie hem onder v dunct wijs te sijn die werde sot op dese werelt, op dat hi wijs si

19

Want wijsheyt deser werelt is sotheyt voor Gode Het is gescreuen Ic sal die wijse begrijpen in haer loosheyt

20

Ende noch ist gescreuen. Die HERE kent der wijser menscen gedachten, dat si ydel zijn

21

Dair om en sal hem niemant vanden mensce beroemen Want het is al uwe, ist Paulus, ist Appollo, ist Petrus, ist werelt, ist leuen, ist doot, ist tegenwoordich, ist toecomende, Al ist uwe

22

mer ghi hoort Christus toe, ^{+ +} Christus hoort God

+ D vers 22

+ Col. ij.d Ro. i.c. Iob v.f.