Den Bybel met groter neersticheyt ghecorrigeert (Liesveltbijbel 1542)

Die Apostel prijst hier die verheffelicheydt der liefden der profitelicheyt ende stantafticheyt.

Dat .xiij. Capittel.

1

⁺AL waert dat ick met menschelijcken ende met Engelen tongen sprake, ende hadde die liefde niet, so waer ic een luydende metael oft een clinckende belle,

+ A vers 1

2

Ende al conste ic propheteren, ende wiste alle verborgentheyden ende alle kennisse, ende hadde ic alle ^a geloue, also dat ic bergen versette, ende en hadde die liefde niet, so en waer ic niet, Ende al waert dat ic alle mijn goet den armen gaue,

a geloue, is hier sulcke viericheyt ende sterckte, also datmen mirakel dede.

3

ende liet mijn lichaem bernen, ende en hadde die liefde niet soo en waert nyet profitelick.

4

Die liefde is lancmoedich ende vriendelic, die liefde en benijt niet, die liefde en verscalct niet, si en blaest haer seluen niet op,

5

si en doet niet oneerbaerlic, si en soect dat haer niet, si en laet haer niet verbitteren, si en denct niet archs, si en verblijt haer niet ouer die ongerechticheyt,

6

mer si verblijt haer om der waerheit

7

⁺si verdraget al, si geloouet al, si hopet al, si lijdet al,

+ B vers 7

8

Die liefde en verualt nemmermeer, daer toch die prophetien ophouden sullen, ende tongen ophouden sullen, ende die kennisse ophouden sal.

9

Want ons weten is een stuc werck, ende ons propheteren is een stuckelic werc,

10

Wanneer comen sal dat volcomen, so sal dat stuckelic werc ophouden.

11

Doen ic een kint was, ⁺ doen sprac ic als een kint, ende ordeelde gelijc een kint, ende hadde kints begrijp, Maer doen ic een man wert, dede ic af wat kintselijc was.

+ C vers 11

12

Wi sien nv door eenen spiegel, in een doncker woordt, mer dan van aensicht tot aensicht. Nv ter tijt bekenne ic onperfectelic, mer dan sal ict bekennen gelijc ick bekent ben,

13

Nv blijuet gelooue, hopinge, liefde, dese drie, mer die liefde is die grootste onder dese. *