Den Bybel met groter neersticheyt ghecorrigeert (Liesveltbijbel 1542)

Hier beghint die Epistel die Paulus sandt tot dien van Galaten

Hier wort verhaelt die godlike predestinatie die den sommighen verleent is, ende worden ouerdacht die Godlike weldaden die de Apostelen ende dien van Ephesien ghedaen sijn.

Dat .I. Capittel.

1

⁺PAulus een Apostele, niet van menschen, maer door Iesum Cristum, ende God den vader, die hem op verwect heeft vanden dooden,

+ A vers 1

2

ende alle broeders die bi mi sijn. Der vergaderinge in Galatia.

3

Genade si met v, ende vrede van God den vader ende onsen HEERE Iesu Christo,

4

die hem voor onse sonden ghegeuen heeft, dat hi ons verlossen soude van deser tegenwoordigher werelt, na den wille Gods ons vaders,

5

welcke si prijs van eewicheyt tot eewicheyt Amen.

6

⁺Mi verwondert, dat ghi v so geringe af laet keeren, van dien, die v geroepen heeft, door die genade Cristi, op een ander Euangelium,

+ B vers 6

7

so doch geen ander en is, dan daer sijn sommige, die willen v verwerren, ende willen dat Euangelium Christi verkeeren.

8

Maer al waert ooc dat wi, oft een Enghel vanden hemel v anders preecte, dan dat wi v gepredict hebben, die si veruloect,

9

Gelijc wi v nv geseyt hebben, so segghen wi ooc anderwerf, ist dat yemant v preect anders dan dat ghi ontfangen hebt, die si veruloect,

10

preke ick dan nv den menschen, oft God te dienst? of gedencke ic den menschen behaghelic te sijn? waert dat ic den menschen noch behagelic waer, so en waer ic Cristus knecht niet.

11

⁺† Mer ic doe v cont, lieue broeders dat dat Euangelium dat van mi gepreect is, ⁺ nyet menschelick en is

+ C vers 11

+ i.co. xv a act. vi.b.

12

Want ic en hebs niet van menschen ontfangen noch gheleert, mer door die openbaringhe Iesu Christi

13

Want ghi wel gehoort hebt mijn wandelinge voortijts inder iootscap, hoe ic bouen maten die vergaderinge Gods veruolchde, ende verstoordese,

14

ende nam toe in die Iootscap, bouen vele mijns ghelijcken, onder mijnder natien, ende was neerstiger dan alle dye ander, om die insettinghen der vaderen.

15

Mer doent God behaechde, die mi van mijnder moeder lichaem wtgescheyden heeft, ende geroepen door sijn genade, ⁺ dat hi sinen sone in my soude openbaren,

+ D vers 15

16

dat ic hem door dat Euangelium vercondighen soude onder die Heydenen, terstont voer ic toe, ende ick en besprac mi niet daer af, met ^a vleesch ende bloet,

a vlees ende bloet dat is menscelic vernuft ende raedt. Nu. xvi.c

17

ic en quam ooc niet in Ierusalem, tot dien die voor mi Apostelen waren, mer ic tooch in Arabia, ende ic quam wederom tot Damascum,

18

daer na ouer drie iaren quam ic in Ierusalem om te besien Petrum, ende bleef vijfthien dagen bi hem.

19

Mer der ander Apostelen en hebbe ic geen gesien, dan Iacobum des HEREN broeder.

20

Ende so wat ic scriue, God weet ic en liege v niet. *

21

Daer na quam ic in die landen Syrie ende Cylicie,

22

mer ick was onbekent, na dat aensicht, den Christeliken vergaderinghen in Iudea,

23

Mer si hadden alleen gehoort dat die ons voortijts veruolchde, dye prediket nv dat ghelooue, welck hi voortijts verstoorde, ende presen God van my.