Den Bybel met groter neersticheyt ghecorrigeert (Liesveltbijbel 1542)

¶ Die Apostel stelt eerst die gheleghentheydt, hoemen bidden sal voor die van Galaten, ende bidt voor haerlieden, Godt opdragende alle haerlieder goede wercken, die si doen sullen.

Dat .iij Capittel.

1

⁺O Ghi onuerstandige Galaten wie heeft v betouert, der waerheit niet gehoorsaem te zijn? welcken Cristus Iesus voor die ooghen bethoont is, dat hi onder v gecruyst is.

+ A vers 1

2

Dat wil ic alleen van v leeren. Hebt ghi den geest ontfangen door de wercken des wets? of door de prekinge des geloofs?

3

Sijt ghi soo onuerstandich? inden geest hebt ghi begonnen, wilt ghy nv inden vleessce voort varen? Hebt ghi dan so vele te vergeefs geleden?

4

ist anders te vergeefs.

5

Dye v nv den gheest gheeft, ende doet sulcke wercken onder v, doet hijt door die wercken des wets? of door de prekinge des geloofs?

6

Gelijc † Abraham God heeft gelooft ende het is hem gerekent voor gerechticheyt,

7

so bekent ghi nv ymmer, dat die gene die daer sijn vanden gelooue, dat sijn daer Abrahams kinder

8

⁺Dat heeft die scriftuere te voren versien, dat God die heydenen door dat geloue rechtueerdicht, ⁺ Daerom vercondicht si Abraham, In dijn saet sullen alle heydenen gebenedijt worden.

+ B vers 8

+ Ia. ij.b.

9

Also worden nv, die daer zijn vanden geloue, gebenedijt metten gelouigen Abraham,

10

Want alle die met wercken des wets omme ghaen, dye sijn onder die vermaledijnge, wandt het staet gescreuen, Vermaledijt is alle man die daer niet en blijft in alle dien, dat ghescreuen is in dat boec des wets, dat hijt doe,

11

Wandt dan door die wedt nyemant gerechtuerdicht en wert voor God, so ist openbaer, dat die gerechtige sal wt sinen geloue leuen

12

† Die wet en is gheen ghelooue, maer die mensche dyese doet, die sal daer in leuen. ⁺

+ ge. xxij.b.

13

Cristus heeft ons verlost vander vermaledijnge des wets, doen hi wert vermaledijt voor ons, want het staet gescreuen,

14

Vermaledijt is alle die ghene die daer hangt aen hout, op dat die benedijnge Abrahe onder die heydenen soude comen in Cristo Iesu, ende wi also den beloofden geest ontfangen door dat gelooue.

15

⁺Lieue broeders, ⁺ ic wil na menschelicker manieren spreken. Verachtmen doch eens menschen testament niet (wanneert beuesticht is) ende en doet oock nyedt daer toe.

+ C vers 15

+ deu. xxi

16

† Nv is ymmer die beloofte Abrahe ende sinen sade toe gheseyt. Hi en spreect niet, inden saden als in velen, maer als in eenen. Ende door dijnen sade welck is Christus.

17

Maer ick segghe daer af, dat ^a testament dat van God beuesticht is op Cristum en sal niet ophouden, dat die belofte soude ophouden door die wet, welcke gegeuen is, ouer vier hondert ende dertich iaren hier nae.

a Testament, dat is den onwederroepelijcken wille Gods, den welcken hi geoordineert heuet door dat saet dat welcke Christus is waer door wi int gelooue kinderen Gods worden. Psalmo xxiiij.

18

Wandt is dat die erffenisse door die wet verworuen is, soo en sal niet door die belofte gegeuen werden, maer God heuet Abrahe door die beloften vry gheschenct.

19

Wat sal dan die wet? Si is daer tot ghedaen, dat dat ouertreden te meerder worden soude, tot dattet saet quame, dien die beloofte gheschiet is, ende is ouergegeuen vanden Engelen door die hant des middelaers,

20

Een middelaer en is niet eens eenigen middelaer, mer God is eenich.

21

Hoe? is dan die wet tegen Gods beloftenisse, dat si verre. Waert datter een wet gegeuen ware die leuendich conste maken so quame die gerechticheyt warachtich vander wet,

22

mer de scrifture heuet al besloten onder die sonde, op dat die belofte soude comen, door dat gelooue aen Iesu Cristo gegeuen dien die daer ghelouen *

23

† Eer dan dat gheloue quam so worden wi onder die wet bewaert ende be-

[p. *]

sloten tot dat geloue, dat daer gheopenbaer soude werden.

24

Daerom is die wedt onse leyder geweest, op Cristum, op dat wi door dat geloue rechtueerdich souden werden.

25

Maer nv dat ghelooue ghecomen is, en sijn wi niet meer onder den ^b leyder,

b Leyder, dat is de wet. i.corin. ix.d

26

Want ghi sijt alle Gods kinder, door dat geloue in Cristo Iesu,

27

Want hoe veel uwer gedoopt zijn, die hebben Cristum aengedaen,

28

Hier en is geen Iode noch griec, Hier en is geen eygen noch vrye, Hier en is gheen man noch wijf, want ghi sijt alte samen een in Cristo Iesu,

29

mer sijt ghi Cristen, so sijt ghi oock Abrahams saet, ende na der belofte, sijt ghi erfghenaem.