Den Bybel met groter neersticheyt ghecorrigeert (Liesveltbijbel 1542)

¶ Die apostel berispt die van Ephesen, bethoonende die imperfectheyt der wet Moyses, ende seyt dat die rechtueerdicheydt comt wt den ghelooue, aenknoopende tprofijt dat ons vander wet coemt

Dat .iij. Capittel

1

⁺OM der saken wille ic Paulus, die gheuangen om Ihesus Cristus wille voor v heydenen,

+ A vers 1

2

nae dyen dat ghi gehoort hebt van dat ambacht der genaden dat my ghegeuen is aen v,

3

Want mi en is nyet condt gedaen die verholentheyt door openbaringhe gelijc ic bouen gescreuen hebbe opt cortste,

4

⁺daer aen, ist dat ghijt leest, mercken muecht mijn verstant in die misterie Cristi,

+ B vers 4

5

welcke en is niet condt gedaen in die voorgeleden tijden, der menscen kinderen, alst nv geopenbaert is sinen heyligen Apostelen ende den Propheten door den geest,

6

dat die heydenen sijn mede erfghenamen, ende mede ingelichaemde, ende medegenoten sijnder beloften in Cristo door dat Euangelium,

7

daer ic een dienaer af geworden ben, na der gauen wt der genaden Gods, die mi gegeuen is nae die werckinge sijnder cracht.

8

Mi den alderminsten onder alle heyligen is ghegeuen dese genade, onder die Heydenen te vercondigen die onbeuindelijcke rijcdommen Cristi,

9

⁺ende te verlichten alle menscen, welcke daer si die gemeynscap der verholentheyt, die vander werelt toe verborghen is geweest in God, die alle dingen gescapen heeft door Iesum Cristum,

+ C vers 9

10

op dat nv openbaer soude werden den heerscappien ende machtigen inden hemel, aender ghemeynten die menichfuldige wijsheyt, die Godt geuet,

11

nae die voorsienicheit vander werelt aen, welcke hi bewesen heeft in Cristo Iesu onsen HEERE

12

voor welcken wi vryheyt, ende toeganc hebben inder betrouwinge door dat gelooue aen hem.

13

† Daer om bid ic, dat ghi niet en ghebreect of af en laet, om mijnder tribulatien, wille, die ick voor v lijde, welcke si v een prijs.

14

Om dyer saken wille buyghe ic mijn knyen voor den vader ons HEREN Iesu Cristi,

15

die de rechte vader is ouer al wat vader heedt, in hemel ende in aerden

16

⁺dat hi v geue na die rijcdommen sijnder heerlicheyt met crachte sterc te werden door sinen geest aenden inwendigen mensch,

+ D vers 16

17

ende Cristum te wonen door dat geloue in uwer herten, ende door die liefde ingewortelt ende gegront te worden,

18

op dat ghi muecht begrijpen met allen heylighen, welc daer si die breyde ende die lengde, ende dye diepte, ende die hoochde,

19

oock te bekennen dye ouergaende liefde der kennissen, op dat ghi veruult wert met alderley Gods volheyt.

20

Mer die daer can oueruloediger doen bouen alle dat wi bieden oft verstaen, nae der cracht, die daer wercket in ons,

21

Dyen si prijs inder vergaderinge, dye in Cristo Ihesu is, tot alder tijt, vander eewicheydt tot eewicheyt. Amen. *