Den Bybel met groter neersticheyt ghecorrigeert (Liesveltbijbel 1542)

Die Apostel leert den Ephesen hoe datse houden sullen dye waerheyt der kercken, elc na dat hi een lidt der kercken is, haer lieden leerende alle goede manierlicheden.

Dat .iiij. Capittel

1

⁺SO vermane ic v nv Paulus geuangen inden HERE, dat ghi wandelt, alsoo uwen roepe betaemt, daer hy in gheroepen is,

+ A vers 1

2

met alle ootmoedicheit, ende saechtmoedicheyt, met lancmoedicheyt, ende verdraget dye een den anderen inder liefden,

3

ende sijt neerstich te houden die eenicheyt inden geest door den bant des vreedts,

4

Een lichaem ende eenen geest, gelijc ghy ooc geroepen sijt in eenderley hopinghe ws roepens.

5

Een HERE, een geloue, een doopsel,

6

een Godt, een vader onser allen, dye daer is bouen ons allen, ende door ons allen, ende in ons allen. *

7

⁺† Eenen yegelijcken van ons is gegeuen die genade naedsr maten der gauen Cristi

+ B vers 7

8

daerom spreeckt hi. Hi is opgeuaren in die hoochte, ende heeft geuangen geuoert die geuanckenisse, ende heeft den menscen gauen gegeuen,

9

Dat hy op gheuaren is wat ist? dan dat hi ten eersten hier is neder geuaren in die onderste plaetse der aerden,

10

Die hier neder geuaren is, dat is die selue die op geuaren is bouen alle hemelen, op dat hijt veruullen

[p. *]

souden

11

⁺Ende hi heeft sommige tot apostelen gheset, ⁺ sommige tot Propheten, somige tot Euangelisten, zommige tot harders, ende leeraers,

+ C vers 11

+ co. vij.d

12

daer mede die heyligen alte samen geuoecht souden werden door gemeynen dienst, te beteren dat lichaem Christi,

13

tot dat wy alle, die eene den anderen die hant reyken, tot eenderley geloue ende kennisse des sone Gods een volcomen man werde, die daer sijn inder maten des volcomen ouderdoms Christi. *

14

Op dat wi niet meer kinder en zijn ende ons waeyen ende beweghen laten van alderley winden der leeringen door scalcheyt der menscen, ende loosheyt daer si ons mede aengaen om te verleyden.

15

⁺Laet ans oprecht sijn inder liefden, ende wasschen in alle stucken aen dyen die dat hooft is Cristus,

+ D vers 15

16

wt welcken dat geheele lichaem te samen gheuoeghet is ende een lidt aen malcanderen hanghet, door alle tsamenuoeginge, waer door deen den anderen hantreykinge doet, naden wercken eens yegelijcken lidts, in zijnder maten, ende doet dat dat lichaem wasset tot sijns selfs beteringhe, ende dat al inder liefden.

17

† Daerom so segge ic dat, ende getuyge inden HEERE, dat ghi niet meer en wandelt, ghelijc die ander Heydenen wandelen in ydelheyt haers sins,

18

die verduystert sijn in haer verstant, ⁺ ende sijn verureemt vanden leuen dat wt Godt is, door die onwetentheydt die in haer is, door die blintheyt haers herten,

+ E vers 18

19

die bedoruen sijn, so hebben si haer seluen ouergegeuen der wellusticheit op dat alderley onreinicheyt haer werc in hen hadde metter giericheyt,

20

mer ghi en hebt Cristum niet alsoo geleert *

21

ist dat ghi anders hem gehoort hebt, ende in hem geleert sijt, hoe dat in Cristo een oprecht wesen is.

22

⁺So legt nv van v af, na der voorledene wandelingen den ouden mensche, die door lusten der dolinghen verderft.

+ F vers 22

23

† Vernyeut inden geeste ws ghemoets,

24

ende doet aen den nyeuwen mensce, die na god ghescapen is, in oprechter gerechticheyt ende heylicheyt.

25

Daerom legt af die logenen, ende spreect die waerheit, een yegelic met sinen naesten, want wi onder malcanderen leden sijn,

26

wert toornich ende en sondicht niet, laet die sonne niet ondergaen ouer v gramscap,

27

geuet ooc niet plaetse den lastere.

28

Wie gestolen heeft, die en stele niet meer mer hi arbeide ende wercke metten handen wat redelicx op dat hi hebbe te geuen die behoeftighen. *

29

Laet geen vuyl geclap wt uwen mont gaen mer wat oorbaerlijc totter beteringe is, daert noot doet daert salich si v te hooren,

30

Ende en bedroeft niet den heiligen geest Gods, daer mede ghi geteekent sijt inden dage der verlossingen,

31

Alle bitterheyt ende verbolgentheit ende gramscap, ende geroep, ende lasteringe si verre van v, met alder boosheyt te samen,

32

Mer sijt onder malcanren vriendelic, hertelic, ende vergeuet die een den anderen gelijc v Godt vergeuen heeft in Cristo.