Den Bybel met groter neersticheyt ghecorrigeert (Liesveltbijbel 1542)

Hier beghint die Epistel van Sinte Pauwels totten Philippensen.

Die Apostel danct God vanden goede dat den Philippensen gedaen is ontdeckende sinen staet ende onderscheyt die predicanten, den welcken hi vermaent tot verduldicheyt in tribulatie.

Dat .I. Capittel.

1

⁺PAulus ende Timotheus knechten Iesus Cristi

Alle den heyligen in Cristo Iesu tot Philippen, metten bisscoppen ende dienaren.

+ A vers 1

2

Genade si met v ende vrede van God onsen vader ende den HERE Iesu Cristo

3

Ic dancke mijnen God, soo dicke als ic uwer ghedencke

4

(welcke ic altijt doe, in allen mijnen gebeden, voor v allen, ende doe dat gebet met vruechden)

5

dat ghi totter gemeynscap des Euangelijs ghecomen sijt, van den eersten dage aen, tot nv toe,

6

† Ende ben des seluen in goeden betrouwen, dat die in v begost heeft dat goede werc, die sal dat ooc volbrengen tot inden dach Iesu Cristi,

7

gelijc alst mi behoorlijc is, dat ic in dyer maten van v allen houde, daerom, om dat ic v allen in mijnder herten hebbe, ⁺ als die met mi deelachtich sijn, der genaden in mijnen banden, in die verantwoordinge ende beuestinghe der Euangelien.

+ B vers 7

8

Want God is mijn ghetuyge, hoe mi na v allen verlanget van herten gront in Iesu Cristo,

9

Ende daer selue bidde ic om, dat v liefde ymmer ende meer rijckere worde in alderley kennissen, ende in alderley onderuindinge,

10

dat ghi proeuen moecht, wat dat best is, op dat ghi puer sijt ende sonder aenstotinge, tot den dach Cristi

11

veruult met vruechden der gerechticheyt die daer comen door Iesum Cristum tot prijse ende loue Gods *

12

Mer ic laet v weten, lieue broeders, dat hoet met mi staet, dat is meer tot vorderinge der Euangelien geraect oft geslagen,

13

also dat mijn banden openbaer geworden sijn inden geheelen rechthuyse, ende bi eenen yegelijcken mensce,

14

ende vele broeders hebben wt mijnen banden betrouwen totten HERE genomen, dye te stouter geworden sijn dat woort te spreken sonder vreesen,

15

Sommige voorwaer preken Cristum oock wt haet ende nijt, sommige wt goeder meyninge.

16

Die ghene preken Cristum wt twistinge ende niet puerlic, want si meynen, si willen een tribulatie toe keeren tot mijnen banden,

17

mer dese wt liefden, want si weten, dat ic ic tot verantwoorden der Euangelien hier ligge.

18

⁺Mer wat ist dan? op dat alleen Cristus vercondicht werde in alderley maniere, het geschie wt der waerheyt oft wt toeualle, soo verblijde ick mi doch daer in, ende sal my ooc verblijden,

+ C vers 18

19

Want ick weet dat mi dat selue coemt tot salicheyt, door v gebet, ende door hantreykinghe des geests Iesu Cristi, gelijc ick eyndelic verwachte ende hope,

20

dat ic in gheenderley stuc te scanden en sal werden, mer dat met alder vrijheyt ghelijc alst altijt, also ooc nv Cristus groot gemaect werde aen mijn lichaem, het si door leuen of door doot,

21

wandt Cristus is mijn leuen ende steruen, ende mijn ghewin.

22

Want int vleesch te leuen, ist dat mi dat vruchtbaer is totten wercken, en is mi niet cont welck ick kiesen soude

23

Want ic werde met tweederley gedrongen, ic heb lust af te sceyden, ende bi Cristo te zijn, welc ooc veel beter ware,

24

Mer het is meer van noode int vleesch te blijuen om uwent wille,

25

Ende in goeden betrouwen weet ic, dat ic blijuen, ende bi v allen sijn sal, tot vorderinge ende tot blijscap des geloofs,

26

op dat uwe beroeminge rijc werde in Cristo Iesu aen mi, door mijne toecomst weder tot v.

27

Handelt alleen weerdelicken nae dat Euangelium Cristi, op dat als ic come ende sie v, of hore van v in mijnder absentien, dat ghi gelijc wel staet in eenen geest, ende in eender sielen, ende te samen met ons kampet ouer dat geloue der Euangelien,

28

ende in geenen wegen v verscricken laten, vander wederpartijers, welcke haer is een bewisinge der verdoemenissen, mer v der salicheit, ende dat selue van God,

29

want v is gegeuen te doene, dat ghi niet alleene aen Cristum en gelooft, mer oock om hem te lijden,

30

ende hebt dyen seluen kamp, welcken ghi hebt aen mi gesien, ende nv van mi hoort.