Den Bybel met groter neersticheyt ghecorrigeert (Liesveltbijbel 1542)

Die Apostel leert die van Philippis vander eenicheydt des geloofs, van warachtighe ootmoedicheyt, ende van warachtige heylicheyt, Ende om haer lieden noch meer te leeren, soo seynt hy haer lieden boden.

Dat .ij. Capittel.

1

⁺IS nv onder v eenighe vermanighe in Cristo, is daer eenigen troost der liefden, isser eenighe gemeynscap des geests, isser eenige hertelijcke liefde ende bermherticheyt, soo veruult

+ A vers 1

[p. *]

mijn vruecht,

2

dat ghi eens gemoets ende sins sijt, gelijcke liefde hebt,

3

niet en doet door twist, of door ydel eere, mer door ootmoedicheit, rekent v onder malcanderen die een des anderen ouerste,

4

ende een yegelijck en sie niet op dat sine, mer dat des anders is.

5

† Een yegelic si gesint, so Cristus Iesus ooc was,

6

die welcke, hoe wel hi in Godlijcke gedaente was, heeft hijs niet een roof geacht Gode ghelijc te sine,

7

maer heeft hem seluen ^a vernyet, ende die gedaente eens knechts aengenomen, ende is geworden ghelijc een ander mensce, ende in gelate als een mensce gheuonden,

a vernyet, dat is hem verootmoedich, ende heel ouergegeuen Math. xvi.d. he. ij.b.

8

ende heeft hem seluen vernedert, ende is gehoorsaem geworden totter doot, ia totter doot des cruyces.

9

⁺Daerom heeft hem Godt oock verhoocht, ende heeft hem eenen naem ghegheuen, die ouer alle namen is,

+ B vers 9

10

op dat inden naem Ihesu hem buygen alle knyen, die in hemel, ende op aerden, ende die onder der aerden sijn,

11

ende dat alle tonghe soude belijden, dat Iesus Cristus die HERE si, tot prijs Gods des vaders.

12

Also mijn alder liefste, gelijc ghi altijt gehoorsaem sijt geweest, niet alleene in mijnder tegenwoordicheyt mer nv ooc veel meer in mijnder absentien, volsterct uwe salicheyt, met vresen ende beuen,

13

Want God is die nv werct, beyde dat willen ende volbrengen daerom dat hi een welbehaghen in v heeft. *

14

⁺Doet alle dinghen sonder murmureren ende verwerringe,

+ C vers 14

15

op dat ghi sijt sonder berispen, ende puer, ende Gods kinder onberispelijc, onder den ongestichten ende verkeerden geslachte, onder welcken ghi scijnt als een lichte sterre inder werelt,

16

dat leuende woort inhoudende, mi tot een glorie in den dach Cristi, als ic die niet vergeuelic gelopen, noch vergeuelic gearbeit en hebbe,

17

Mer al ist dat ic geoffert werde, op dat offer ende Gods dienst ws geloofs,

18

so verblijde ic mi met v allen, desgelijcx verblijt v ooc, ende verblijt v met my.

19

Ic hope inden HERE Iesu, dat ic Timotheum eerlanc tot v sal seynden, ende op dat ic ooc goets moets si als ic weet hoet met v staet.

20

Want ic en hebber geen die so geheel mijns sins si, die soo van aert voor v sorget

21

Want si soecken al dat hare, ende niet dat Iesu Cristi is

22

Mer ghi weet dat hi beproeft is, want gelijc een kint den vadere, heeft hi mi ghedient inden Euangelio

23

Den seluen hope, ic, sal ic seynden van stonden aen, wanneer ic onderuonden hebbe, hoet met mi staet,

24

Ic betrouwe inden HERE, dat ic ooc selue cortelinc comen sal

25

Mer ic hebt voor noot aenghesien, den broeder Epaphroditon tot v te seynden, die mijn hulper ende medestrijder, ende uwer Apostel ende mijnder behoeflijcheyt dienaer is,

26

Want hi ooc na v allen verlanghen hadde, ende was hogelic becommert, daerom, om dat ghi gehoort hadt dat hi cranc is geweest,

27

Ende hi was voorwaer doot siec, mer Godt heeft sijnder ontfermt, ende niet alleen sijnder, mer ooc mijnder, op dat ic niet deen droeffenisse op die ander en soude hebben

28

Ick hebbe hem daerom te haester ghesonden, op dat ghi hem siet, ende weder te vrolijcker werdet, ende ic ooc te weyniger truericheits hebbe,

29

Hier om soo ontfanct hem nv inden HERE, met alle vruechde ende hebt sodanigen in eeren,

30

want om des wercx Cristi wille is hi den doot so nae gecomen, Daer hi sijn leuen cleyn bedacht, op dat hi v ghebrec aen mijnen dienst veruullen soude.