Den Bybel met groter neersticheyt ghecorrigeert (Liesveltbijbel 1542)

Hier beghint die Epistel van sinte Pauwels totten Collossensen.

¶ Die Apostel aenghesien hebbende die goetwillicheit der Collosenssen, trectse totter macht der Euangelien, ende wilt dat si die sterckelic geloouen.

dat .I. Capittel.

1

⁺PAulus een Apostel Iesu Cristi, door den wille gods ende broeder Timotheus.

+ A vers 1

2

Den heyligen tot Collossen ende den geloouigen, broederen in Christo.

3

^a Ghenade si met v, ende vrede van God onsen vader ende den HERE Iesu Cristo

a genade dats vergeuinge der sonden door cristum, vrede dat is dat in ons is te weten dat wi seker gelouen door cristum salich te sijn i.co. i.a.

4

Wi dancken God den vader ons HEREN Iesu Christi, ende bidden altijt voor v, na dien dat wi gehoort hebben van uwen ghelooue aen Christo Iesu, ende van uwer liefden tot allen heiligen,

5

om der hopen wille die v op geleyt is inden hemel, van welcken ghi gehoort hebt door dat woort der waerheyt inder Euangelien

6

dat tot v ghecomen is, gelijc ooc in alder werelt, ende is vruchtbaer, gelijc ooc in v, vanden dage aen dat ghijt gehoort hebt, ende bekent die genade Gods inder waerheyt,

7

gelijc ghi geleert hebt van Epaphra, onsen lieuen mede dienaer, welc is een getrouwe dienaer Cristi voor v,

8

die ons ooc geopent heeft v liefde inden geest

9

+ Daerom ooc wi vanden dage aen, dat wijt ghehoort hebben, houden wi niet op, voor v te bidden, ende begeeren dat ghi veruult wert, met kennisse zijns willens, in alderley gheestelijcker wijsheyt ende verstant

10

dat ghi weerdelic wandelt den HERE tot alle behagen, ende vruchtbaer sijt in allen goeden wercken, ende wasset inder kennissen Gods,

11

ende wert gesterct met alle crachten, na sijnder heerlijcker macht, in alder lijdsaemheyt ende lancmoedicheyt met vruechden. *

12

Ende dancsegget den vader die ons waerdich gemaect heuet, tot der erffenisse der heyligen int licht.

13

Welcke ons verlost heeft vander macht der duysternissen, ende heeft ons ouergheuoert in dat rijc des soons sijnder liefden,

14

aen welcken wi hebben die verlossinge door sijn bloet, namelijc die vergeuinghe der sonden,

15

⁺welcke is een recht beelt des onsienlijcken Gods der eerster geboorne voor alle creatueren. *

+ C vers 15

16

Want door hem ist al gescapen, dat in hemel ende op aerden is, dat sienlijc ende dat onsienlijc, het si thronen oft heerscappie, oft vorstdendom, oft ouerheyt.

17

Het is al door hem ende tot hem geschapen, ende hi is voor allen, ende staet al te gader in hem.

18

⁺Ende hi is selue dat hooft des lichaems, namelijck der kercken, welcke is dat beginsel ende die eerste gheborene, vanden dooden, op dat hi in allen dingen den voorganc hebbe,

+ D vers 18

19

want het is dat welbehaghen des vaders geweest, dat in hem alle volheit woonen soude, ende dat al door hem versoent worde tot hem seluen,

20

het si opter aerden of inden hemel, daer mede dat hi vrede maecte, door dat bloet aen sijn cruys, door hem seluen. *

21

Ende v die hier voortijts verureemt, ende vyanden waert, door dat verstant in quade wercken,

22

mer nv heeft hi v versoent met den lichaem sijns vlees, door den doot, op dat hi v daer stellen soude heelijc ende onberispelijc sonder lasteringhe voor hem seluen,

23

ist dat ghi anders blijft in dat geloue gegront, ende vast ende onbewegelijc vander hopingen der Euangelien, welcke ghi gehoort hebt, welc gepreect is onder alle creatueren, die onder den hemel sijn, des welcx ic Paulus dienaer geworden ben

24

Nv verblijde ic mi in mijn lijden, dat ic lijde voor v, ende ic veruulle dat ontbreken der tribulatien Cristi in mijnen lichaem, voor sijn lichaem, welcke is die vergaderinge

25

+ Welcker ic een dienaer geworden ben na des prekens ambacht, dat mi ghegeuen is onder v met volheyt wt te preken dat woort Gods,

26

namelic die verholentheden, die verborgen geweest sijn vander werelt aen ende vanden tijden aen,

27

Mer nv ist geopenbaert sinen heyligen, dyent God gewilt heeft cont te doen, welcke daer sijn der heerlijker rijcdom deser verholentheyt, onder den Heydenen (welc is Cristus in v) die daer is die hopinge der heerlicheyt, dyen wi vercondigen

28

ende vermanen allen menscen, ende leeren alle menscen met alder wijsheyt, op dat wi daer stellen eenen yegelijcken mensche volcomen in Cristo Iesu, *

29

daer aen ick arbeyde ende worstele nae die werckinghe des geens die in mi werct met cracht