Den Bybel met groter neersticheyt ghecorrigeert (Liesveltbijbel 1542)

[p. *]

Hier beghint die eerste Epistel die Paulus sandt tot dien van Thessalonica.

Die Apostel danct God van haerlieder goeden beghinne, ende vander verspreyinghe haerder goeder wercken.

Dat .I. Capittel.

1

⁺PAulus ende Siluanus ende Timotheus.

Der vergaderingen tot Thessalonica, in God den va ende den HERE Iesu Cristo.

Genade si met v ende vrede van God onsen vadere, ende den HERE Iesu Christo.

+ A vers 1

2

Wi dancken God alle tijt voor v allen, ende ghedencken v in onsen gebeden

3

sonder ophouden, ⁺ ghelijc wi gedachtich sijn ws wercx, inden ghelooue, ende uwes arbeyts inder liefden, ende v lijdsaemheyt inder hopen, welcke is onse HERE Iesus Chrstus voor God onsen vader,

+ B vers 3

4

Want lieue broeders van Gode bemint, wi weten hoe ghi wtuercoren sijt,

5

dat onse Euangelium bi v geweest, niet alleen int woordt, maer ooc inder cracht, ende inden heylighen gheest, ende in groter volheyt, gelijc ghi weet hoedanich wi geweest sijn onder v, ⁺ om uwent wille.

+ C vers 5

6

Ende ghi sijt onse nauolgers gheworden, ende des HEREN, ende hebt dat woort ontfanghen onder vele tribulatien, met vruechden inden heyligen geest. *

7

Also dat ghi geworden sijt een voorbeelt allen geloouigen in Macedonia ende Achaia,

8

want van v is dwoort des HEREN wtgegaen, niet alleen in Macedonia ende Achaia, ⁺ mer in allen plaetsen is ooc v ghelooue in God wtgebroken, also dat gheen noot en is v yet te seggen,

+ C vers 8

9

Want si selue vercondighen van v, wat inganck dat wi van v gehadt hebben, ende hoe dat ghi bekeert sijt tot God vanden afgoden, te dienen den leuenden ende warachtigen God,

10

ende te verwachten sinen sone vanden hemel, welcken hi verwect heeft vander doot, Iesum, dye ons verlost heeft vanden toecomenden gramschappen.