Den Bybel met groter neersticheyt ghecorrigeert (Liesveltbijbel 1542)

¶ Die Apostel seyndt Timotheum om te vertroosten die van Thessalonica, ende stelt tprofijt van sijnder wedercoemst, biddende altijt voor haer lieden.

Dat .iij. Capittel

1

⁺DAerom en hebben wijs niet meer willen verdraghen, ende hebben ons laten welbehaghen ons alleen tot Athenen te blijuen,

+ A vers 1

2

ende hebben Timotheum ghesonden onsen broeder ende dienaer Gods, ende onsen medehulper inder Euangelien Christi, om v te stercken ende te vermanen om ws gheloofs wille,

3

op dat niemant cranck en werde in deser tribulatien, den welcken (ghi weet) dat wi begeuen sijn,

4

⁺Ende doen wi bi v waren, seyden wy te voren, wy moesten tribulatie hebben, ghelijc alst ooc gheschiet is, ende ghi wetet,

+ B vers 4

5

daerom en heb icx nyet langher verdraghen, ende heb wt ghesonden dat ic bekennen soude v gelooue, op dat v billicx niet en temptere dye tempteerder, ende onsen arbeyt niet te vergeefs en werde.

6

Mer nv als Timotheus tot ons van v ghecomen is, ⁺ ende ons vercondicht heeft v gelooue ende liefde, ende dat ghi onser ghedenct, alle tijt ten besten, ende verlanghet na ons te sien, ghelijck oock ons nae v,

+ C vers 6

7

Daer sijn wi lieue broeders ghetroost in geworden, om v in alle onse tribulatie ende noodt, door v ghelooue,

8

Want nv sijn wi leuendich, ter wilen ghi staet inden HERE,

9

† Want wat danc connen wi God weder geuen voor v, voor alle dese vruechde, die wy hebben van v voor onsen God,

10

wi bidden dach ende nacht dat wi sien moghen v aensicht, ende veruullen soo wat ghebreect aen v ghelooue.

11

⁺Mer hi God onse vader ende onse HERE Iesus Cristus, scicke onsen wech tot v,

+ D vers 11

12

Mer v vermeere die HERE, ende late die liefde vol werden onder malcanderen, ende teghen alle menschen (ghelijc wy ooc sijn tegen v)

13

om uwe herten te stercken sonder clachte inder heylicheyt voor God onsen vader, ende in die toecoemst des HEREN Ihesu Christi met allen sinen heylighen.