Den Bybel met groter neersticheyt ghecorrigeert (Liesveltbijbel 1542)

Hier beghint die Epistel Pauli tot Titum

¶ Die Apostel leert Titum hoe hi bisscoppen ordineren sal, ende dat die quade te berispen sijn

Dat eerste Capittel

1

PAulus een knecht Godes, mer een Apostel Ihesu Christi, te prediken dat ghelooue der wtuercorenen Gods, ende die kennisse der waerheit, die totter Godsalicheyt leyt, ⁺ tot hope des eewigen leuens,

+ A vers 1

2

welc belooft heeft die onlogenachtige God voor die tijden der werelt,

3

mer dien hi heeft geopenbaert tot sijnder tijt, sijn woort, door die prekinge die mi betrouwet is, na dat beuel Gods ons salichmakers

4

Tito mijnen soon van aerde, na dat gemeyn geloue genade, barmherticheyt, vrede van God den vader ende den HEERE Iesu Christo onsen salichmaker.

5

Daeromme liet ic v tot Creten, op dat ghijt voort soudt volbrengen, daer ict ghelaten hadde, ende besetten die steden stadt bi stadt, ⁺ met priesters oft met ouders so ict v geordineert hadde.

+ B vers 5

6

So wie onstraffelic is, een der vrouwen man, die geloouige kinderen heeft, niet beruchtich, met gulsicheyt oft ongehoorsaemheyt.

7

Want een bisscop sal wesen onstraffelic, als een huyshouder Gods, niet groots van hemseluen houden, niet toornich geen wijndrancker, niet bijtich, niet gierich na scandelijc gewin,

8

mer een ontfanger der vreemder, goedertieren, manierlijc, rechtueerdich, heylich, cuysch

9

ende behouden vast die leeringe des getrouwen woorts, op dat hi machtich si te vermanen door die salige leeringe, ende te straffen die wedersegghers.

10

Want daer sijn veel wederspannighe ende onnutte clappaerts ende verleyders, ⁺ sonderlinge die wter besnijdinge sijn,

+ C vers 10

11

denwelcken men moet den mont stoppen die daer geheele huysen verkeeren, ende leeren dat nyet en dooch, om des scandelicx gewins wille,

12

Het heeft een wt haer lieden geseyt, haer eygen propheet Dye Creten sijn altijt logenaers geweest, quade beesten, leghe buycken,

13

Die getuychnis is waer. Om die sake wille so straftse scerpelic, op dat si gesont sijn int ghelooue,

14

⁺ende niet en achten op die Iootsche fabulen, ende der menscen gheboden, die die waerheyt afkeeren.

+ D vers 14

15

Den reynen is alle dinck reyn, maer den onreynen, ende ongeloouighen en is niet reyn, maer onreyn sijn si alle beyde, haer gemoet ende conscientien.

16

Si seggen, si kennen God, mer metten wercken loochenen sijt, want si sijn, van welcken God walghet ende niedt en willen hooren, ende sijn tot alle goede wercken onbequaem, ende onnutte.