Den Bybel met groter neersticheyt ghecorrigeert (Liesveltbijbel 1542)

¶ Die Apostel trect ons tot een gheestelijc leuen, ende wanneer wi dat hebben, sullen wijt voortspreyden in onsen naesten, ende dat door gheestelijcke wandelinge, ende leertse die tot ouderdom ghecomen sijn.

Dat .ij. Capittel.

1

⁺HIer om soo legt nv af alle boosheyt, ende alle list, ende gheueynstheyt, ende benijdinghe, ende achterclap,

+ A vers 1

2

ende weest begeerich na dat verstandich ongeualst ^a melc,

a melc dat is hier dat suyuere woordt Goods. Esa. li.a

3

als die nyeu gheboren kinderen, op dat ghi door dat selfde opwasset,

4

ist dat ghi anders gesmaect hebt dat die HERE vriendelic is, totten wecken ghi ghecomen sijt als totten leuendighen steen, die vanden menschen verworpen, mer voor God wtuercoren ende costelijc is,

5

ende ooc ghi, als die leuendighe steenen, ^b tymmert v tot eenen gheestlijcken huyse, ende tot een heylich priesterscap, te offeren gheestelijcke offerhanden die God aengenaem sijn, door Iesum Christum.

b opten steen getimmert sijn, is alle onse hope setten op cristum alleen. i.co. iiij b Esaie. xxviij.d

6

Daerom so ist inder scriftueren begrepen. Siet ic legghe eenen wtuercoren, costelijcken hoecsteen in Sion,

7

Ende wie hem ghelooft, die en sal niet beschaemt werden V nv, ghi die ghelooft, is hi costelijc. Maer den ongeloouighen, ⁺ is die steen, dien die wercklieden verworpen hadden, tot eenen hoecsteen gheworden,

+ B vers 7

8

tot eenen steen des aenstootens, ende tot een keye des schandalisacien die hen stooten aen dat woort, ende en gheloouen niet daer aen, daer si opgeset sijn.

9

Maer ghi sijt dat wtuercoren gheslachte, dat coninclike priesterschap, dat heylighe volc, dat volc des eygendoms, dat ghi vercondigen sult die duechden des ghenen dye v gheroepen heeft vander duysternisse tot sinen onuerwandelijcken lichte.

10

Ghi die in voorleden tijden geen volck en waert, ⁺ maer nv Gods volc sijt, ende sijt geweest, ouer welcken hem God niet en heeft ontfermt, mer nv ontfermt heeft. *

+ Ozee. ij

11

⁺† Lieue broeders, ic vermane v als die vreemde ende pelgrims, onthout v van die vleeschelike lusten, die tegen die siele vechten,

+ C vers 11

12

ende leyt een goede wandelinge onder die heydenen, op dat die van v achterclap doen, als van misdaders, v wercken moghen sien, ende God prijsen, alst nv aen den dach comen sal.

13

Weest onderdanich alre menschelijcken oordinancie om des HEREN wille, het si den Coninc als den ouersten,

14

oft haren stadthouders, als den ghesonden van hem, tot der wraken der misdoenders, ende tot loue den goeden.

15

Want dat is den wille Gods, dat ghi met wel doen verstoppen sult die onwijsheyt der sotter menschen,

16

als die vrije, niet als oft ghi die vrijheyt hadt tot een decsel der boosheyt, maer als die knechten Gods.

17

Sijt eerbiedich teghen alle man, hebt lief die broederschap, vreest God, eert den Coninck.

18

Ghi huysknechten, ⁺ weest onderdanich met alre vreesen den heeren, niet alleen den goeden ende beleefden, maer ooc den quaden onbeleefden,

+ Titi. ij c eph. vi a ro. xij.c.

19

Want dat is ghenade, * ⁺ ist dat yemant om der conscientien wille tot God droefheyt verdraecht, ende lijdet met onrecht, Want wat prijs is dat, ist dat ghi om misdaets wille slagen lijdt?

+ D vers 19

20

Mer als ghi om weldoens wille lijdt ende verdraecht, dat is genade bi god

21

Want daer toe sijt ghi gheroepen. † want Christus ooc gheleden heeft voor ons, ende ons een exempel ghelaten, dat ghi soudt nauolgen sijn voetstappen,

22

dye welcke geen sonde ghedaen en hadde, daer en is ooc geen bedroch in sinen monde gheuonden

23

welc doen hy versproken wert, niet weder en versprack, niet dreygende doen hi leet, Mer hi gaft op, hem die daer recht oordeelt,

24

die welcke onse sonden selue geoffert heeft, aen sijn lichaem aenden houte, op dat wi der sonden vry sijn, ende der rechtueerdicheit leuen, door wiens wonden ghi sijt ghesont gheworden,

25

Want ghi waert als die dwalende scapen, mer ghi sijt nv bekeert tot den herder ende bisscop uwer sielen.