Den Bybel met groter neersticheyt ghecorrigeert (Liesveltbijbel 1542)

¶ Hier wort wtgesloten die valscheyt der ketters, ende die Apostel verclaert haer lieder quaetheyt ende correctie

Dat .ij. Capittel

1

⁺DAer sijn ooc gheweest onder den volcke valsce propheten, als oock onder v sullen wesen valsce leeraers, die beneuen inbrengen sullen verderffelike secten, ende versaken den HEERE dyese gecocht heeft, ende sullen ouer haer seluen brengen een haestighe verdoemenisse,

+ A vers 1

2

ende veel menscen sullen nae volghen haer verderuen, door welcke sal dye wech der waerheyt verlastert werden,

3

ende door ghiericheyt met versierden woorden sullen si van v comenschappen, ouer welcken dat oordeel nv van langhen tijden niet versumelijc en is, ende haer verdoemenisse en slaept niet

4

⁺Want nv God die Engelen, die gesondicht hadden, niet gespaert en heeft, maer heeftse met ketenen der duysternissen ter hellen ghestooten, ende ouer ghegeuen, dat si totten oordeel ghehouden souden worden,

+ B vers 4

5

Ende en heeft niet ghespaert die voorleden werelt, ⁺ mer bewaerde Noe den prediker der rechtueerdicheit sijn achster, ende leyde die diluuie ouer die werelt der ongerechtigher menscen.

+ iob iiij.d

6

Ende heeft dye steden Sodoma, ende Gomorra tot asschen gemaect, omgekeert ende verdoemt, hier mede een exempel gesedt den genen, die toecomende onsalich sullen sijn, ⁺

+ Gene. vij.a

7

ende heeft verlost den rechtueerdigen Lot, dye oueruallen was van die oneerlijcke conuersatie der quaden,

8

Want om dat hi rechtueerdich onder hen woonde, dat hi sien ende hooren moeste, so quelden si die rechtueerdige siele van dage te dage, met haren onrechten wercken,

9

Want die HERE die weet die goede ende salige menscen wt der tentatien te verlossen, dye quade ende onrechtuaerdighe te behouden, ⁺ tot den dach des oordeels te pijnighen.

+ C vers 9

10

Maer alder meest die daer wandelen na den vleessche, inder wellust der onsuuerheyt, ende die ghene dye die heerschappie verachten, stout ende hooch van haer seluen houden, ende en ontsien hem nyet secten in te brenghen, lasterende,

11

Hoe wel nochtans dye Engelen, die stercker ende crachtigher sijn, niet en verdragen dat lasterlijcke oordeel vanden HERE tegen

[p. *]

haer,

12

Mer si sijn als onredelijcke beesten die natuerlic te verworgen ende te vangen geboren sijn, verlasteren dat ghene dat si niet en kennen, ende in haren worgen ende verderuen, sullen si verworget worden,

13

ende den loon der onrechtueerdicheyt daer af brenghen.

Si achtent voor wellust, dat tijtlic wel leuen, si zijn vlecken ende ander onreynicheyt, si leyden een wellustich leuen van uwer liefden, si brassen wel vanden uwen,

14

ende hebben oogen vol ouerspeels, haer sonde en is niet te keeren, si locken aen hen die lichtueerdige sielen, ende hebben een hert doordreuen met giericheyt, kinderen der maledidinge,

15

si hebben verlaten den rechten wech, ende sijn dwalende gegaen, ende hebben nageuolcht den wech Balaam des soons Bosor, die welcke lief hadde dat loon der onrechtuerdicheit,

16

⁺mer hi hadde straffinge sijnder ouertredinge. Dat stomme lastbaer dier sprac met menscheliker stemme, ende belette des propheten dwaesheyt

+ D vers 16

17

Dese sijn fonteynen sonder water, ende wolcken vanden winde ghedreuen, den welcken is bewaert een donckernisse tot inder eewicheit.

18

Want si spreken hoochmoedige woorden van ydelheit, daer niet na en volcht, ende si trecken door wellusticheit tot begheerlicheydt des vlees, den ghenen die eerst ontloopen waren, ende nv in dolinge wandelen,

19

ende belouen hen vryheit, hoe wel si selue knechten der verderuinge sijn, want van wien yemant verwonnen is, diens knecht is hi geworden,

20

Want ist dat si die onsuuerheit der werelt ontulucht sijn door die kennisse des HEREN ende des salichmakers Ihesu Christi, ende werden si weder in die selfde geulochten ende verwonnen, ⁺ so is hen dat laetste arger geworden dan dat eerste,

+ Iob. i.c.

21

Want het waer hen beter, dat si den wech der rechtueerdicheyt niet bekent en hadden, dan dat si hem kennen ende af keeren, van dat heylige gebot dat hen ghegeuen is.

22

Dat gemeen spreecwoort is hen gesciet. Die hont eet weder dat hi ghespogen heeft, ende die sueghe wentelt haer weder int slijc als si ghewasschen is.