Den Bybel met groter neersticheyt ghecorrigeert (Liesveltbijbel 1542)

Die Apostel spreect hier van dat woort, hoe dat woort menschelick gheworden is, ende hy spreect van valsche propheten, ende van Antechrist.

Dat .iiij. Capittel

1

⁺ALder liefsten, gelooft niet eenen yegelijcken gheest, mer proeft die gheesten, oft si van God sijn, want het sijn veel valsche propheten wtgegaen inder werelt.

+ A vers 1

2

Daer aen bekent den geest Gods, Een yeghelijc geest die daer bekent dat Iesus Cristus gecomen is in dat vleesch, die is van God.

3

Ende een yegelic geest die daer niet en belijdt dat Iesus Cristus is gecomen in dat vleesch, ⁺ die en is niet van God, Ende dat is dye gheest des ^a Antecristes, van welcken ghi ghehoort hebt, dat hi coemt, ende is nv ter tijt in die werelt.

+ Ioan. iij f

a Antechristus sijn alle die gene die qualic leeren tegen dye leeringe Christi. ij.Tes. ij

4

Kinderkens ghi sijt van God, ende hebt den ghenen verwonnen, want die in ons is, is grooter dan dye inder werelt is.

5

Si sijn vander werelt, daerom spreken si vander werelt, ende die werelt hoortse,

6

Wy sijn van God, Ende wie God bekent die hoort ons, ende wie niet van God en is, die en hoort ons nyet, Daer aen bekennen wi den gheest der waerheydt, ende den geest der dolinghen.

7

⁺Ghi beminde, laet ons onder malcanderen lief hebben, wandt die liefde is van God, Ende wie liefheeft, die is van God gheboren, ende kent God,

+ B vers 7

8

Wie niet lief en heeft, die en kent God niet. † Want God is die liefde,

9

Daer aen is geopenbaert die liefde Gods, ⁺ dat God sinen eenigen geboren sone gesonden heeft in deser werelt, dat wi door hem souden leuen,

+ Io. iiij.b

10

daer in staet die liefde, niet dat wi God lief gehadt hebben, maer dat hi ons lief gehadt heeft, ende heeft ghesonden sinen eenigen sone, tot een versoeninge van onsen sonden.

11

Alder bemintste, heeft ons God also lief gehadt, so sullen wi ons oock weder onder malcanderen lief hebben.

12

⁺Nyemant en heeft God ye gesien, Ist dat wy ons onder malcanderen lief hebben, ⁺ soo blijft God in ons, ende sijn liefde is volmaect in ons,

+ C vers 12

+ Ioan. i.b

13

Daer aen bekennen wi dat wi in hem blijuen, ende hy in ons, dat hy ons van sinen geest gegeuen heeft.

14

Ende wi hebbent gesien, ende getuyghen, dat die vader den sone gesonden heeft, tot eenen salichmaker der werelt,

15

Die nv belijt dat Iesus Gods sone is, in dyen blijuet God, ende hi in God, Ende wi hebben bekent ende gelooft die liefde die God in ons heeft.

16

⁺God is die liefde, ende wie in die liefde blijft, die bliuet in God, ende God in hem,

+ D vers 16

17

Daer aen is dye liefde volmaect bi ons, op dat wi een hope hebben inden daghe des oordeels, want gelijc hi is, so sijn wi oock in die werelt.

18

Vreese en is nyet inder liefden, maer dye volmaecte liefde driuet die vreese wt, want die vreese heuet pijn, mer wie vreest, die en is niet volcomen inder liefden.

19

Laet ons hem lief hebben, want hi heeft ons eerste lief gehadt,

20

Ist dat yemant seyt, ic heb God lief, ende haet sinen broeder, die is een logenaer, Want wie sinen broeder niet lief en heeft, dien hy siet, hoe can hi God lief hebben, dien hi niet en siet?

21

Ende dat gebot hebben wi van hem, dat soo wie God lief heuet, dat die ooc sinen broeder lief hebben sal. *