Den Bybel met groter neersticheyt ghecorrigeert (Liesveltbijbel 1542)

¶ Die Apostel bethoont wat eenen Bisschop van noode is, ende tgheen dat hem van noode is, dat die Christus ghelijc is.

Dat .v. Capittel.

1

⁺DIe wijle wi dan eenen grooten hooghen priester hebben, Iesum Cristum den sone Gods, die inden hemel gheuaren is, so laet ons die kennisse houden,

+ A vers 1

2

Want wy en hebben niet eenen hoogen priester dye geen medelijden met onser crancheyt en can ghehebben, mer die ouer al ende door al ghetempteert is, nae die gelijckenisse sonder sonde.

3

Daerom laet ons toe treden met betrouwen, totten stoel der ghenaden, op dat wi ontfermherticheyt ontfaen, ende ghenade vinden, ⁺ in dien tijt, als ons hulpe van noode sal sijn. *

+ B vers 3

4

† Want een yegelike hooge priester die wt den menschen genomen wert, die wert voor die menschen tegen God gesedt, op dat hi gauen ende offerhanden offere voor die sonden,

5

die daer medelijden can ouer die daer onwetende sijn ende dolen, na dien dat hi ooc selue ombeuangen is met crancheyt,

6

waerom hy ooc voor hem seluen, gelijc voor dat volc soude offeren voor die sonden.

7

Ende nyemant en neemt hem seluen die eere aen, mer die ooc gheropen wert, ghelijc Aaron. ⁺

+ Psal. ij. psal. cix

8

Also ooc en heeft Cristus hem seluen niet gheclarificeert, om dat hy hooge priester soude werden, mer die tot hem gheseyt heeft. Ghi sijt mijn sone, heden heb ic v gebaert.

9

So hi ooc op een ander plaetse seyt, ghi sijt een priester inder eewicheyt, na die ordine Melchisedech. *

10

⁺Ende heeft inden dagen sijns vleeschs, met stercken roepen ende tranen, gebeden ende smeecken geoffert, tot den genen die hem vander doot mocht salich maken, ende is ooc verhoort, om dat hi God in eeren hadde,

+ C vers 10

11

Ende hoe wel hi Gods soon was, so heeft hi nochtans int ghene dat hi leedt, gehoorsaemheyt geleert,

12

ende daer hi is voleyndt, is hi geworden allen den ghenen die hem gehoorsaem sijn, een oorsake der eewigher salicheyt,

13

van Gode een hooge priester ghenaemt, na die oordinancie Melchisedech.

14

Waer af wi een groote ende sware reden hebben wt te leggen, om dat ghy traech geworden sijt om te hooren,

15

⁺Ende ghi die vander tijt wegen leeraers sout zijn, behoeft ghi wederomme datmen v dat eerste scoolrechte der godlijcker woorden leere, ende ghy sijt geworden die dat ^a melc behoeft, ende niet stercke spise,

+ D vers 15

a Melc dats simpele leeringe ende geen hooghe dinghen, dye welcke die Apostel stercke spijse noemt i.cor. iij a

16

Want een yegelijc die noch melc nuttet, die is onbesocht aen dat woort der gherechticheyt, Want hi is een ionc kint,

17

mer den volcomen, behoort stercke spise, die door ghewoonte, gheoeffende sinnen hebben, tot onderscheyt des goets ende des quaets.