Liedboek van Kathryn van Hatzfeldt

[fol. 15r]

XVI.

Aen dich kan ich
niet freuwen mich,
synt du mich hais vmfangen,
streng fast behafft,
vnd all myn krafft
hertz moit ind synnen durch hangen
myt steder lieffd dat ich dich biede,
myt flyß zo dyr zo komen,
dat mir mach syn
der wylle dyn
hais dů gar waell vernomen.

Vff dieser erd
geyn hoger swer
hayn ich yn mynem hertzen
freůd ind lust
ist gar vmb ssůst
wendestů nyet myr mynen smertzen
darvmb jonffraůw
gedenck ind schaw
haeff flyss yn vnsen sachen
vnd schryff myr zo want ich hayn geyne růh
wyll myr wat freuden machen.

O Edell frucht
verlanges zucht
nym hyn ind do ydt behende
aen dich alleyne
sust anders geyne
Jch bydden mir mynen smertzen wende
want ich dienen dyr
mit gantzer begyr
dyr alle tzyt zo gefallen
yn steder treůw
ewich aen allen reůw
schryff ich dyn gůed vůr allen.