Liedboek van Kathryn van Hatzfeldt


XV. Die eirste freůd die ich ye gewan, ys myr zo trůren komen, dat vngeůall is widder mich, hait myr myn freůd benomen, des mois ich trůren bis vff eyn zyt bis myr myn schones lieff freude gyfft, kan myr wael kummer wenden.
[Folio 14v]
Och lest mael do ich by yer was fruntlich myt yer zo kosen, do machte sy mir eyn krensselyn van fiolen, vnd ouch van Rosen, dat machte sy mit yrer sne wysser hant, yer trew gaff sy myr zo eynem pandt van myr wold sy nyet wychen. Dat nesselen krůyt dat sy myr boid, dat west yn yerem garden, sy spielde mit myr ind jch myt yer, dry schantzen vff eyner karten, die eirste schantz die ich gewan dat was vůrwair yer mundelyng roit alle zyt zo mynem besten. Och meetgen wat hait dyr der rocken gedayn dat dů nyet me machs spynnen, du sůyst jn oeuer die nesselen an recht wolstů myt eme ryngen, o meetgen nů lais dyr wael die weil dat dich der rocken neyt oůer eyl och grůetz myr myn spynnerynnen. Och moder ich haůen eyn eydt gesworen, dat jch nyet me mach spynnen, Jch haůen eynen lantzknecht lieff ind wert, licht mir yn mynen synnen, hey drinck so gerne den kolen wyn hy sleyd mich yn syn blancke armelyn den auent zu dem morgen.