Volksboek van Margarieta van Lymborch (1516)

(1952)–Anoniem Limborch, Roman van Heinric en Margriete van– rechtenstatus



[pagina 97]
Hoe margrieta van lymborch het còninckspeel ordineerde. daer sy vele schoone raetselen wt gaf.
Dat. XCIIIJ. capittel. O Herte verhuecht baert nu ioyhuesheyt Want die soete roose amoruesheyt margrieta met ionstigen douwe behangen Suldy nu hier schouwen Baert ghi vogelkens melodieusheyt Ende sayt den guer der preciuesheyt Ghi bloomkens dies ic mach troost ontfanghen Mijns liefs vol trouwen Ic sie die weerste boven alle vrouwen Violetkens plucken ende ooc kersouwen Om een verhoghen der princieren Die hier versaemt sijn Van vruechden willet therte verflouwen Mer ic moet een vasticheyt in mi houwen Al verandert natuere in vele manieren Oft ic soude beschaemt sijn Gods gracie die laet mi ongeblaemt zyn Margrieta. Sijt willecome mijn vruecht ende ooc mijn troost Etsijtes. Danc hebt die betert al dat mi noost Die mi verlost wt allen weene Ghy besluyt in uwen persoon alleene Al sidy cleene een zee vol gracien Margrieta. Etsijtes coninc van daden reene Comt en verhuecht u bi ons gemeene In dit prijeel vol iubilacien Wy sullen tot eender recreacien Van duechden om een volmaect acoort Hier wat ghenoechlicx bringhen voort Die coninc lodewijc van vrancrijc Comt etsijtes edele coninc fier In desen rosier Ende hoort die soete vogelkens singen Nu margrieta reen maget goede cier Wat mochten wi hier Van amoreusheden vruechdelicx voort bringhen Dats daer die herten na hebben verlingen Margrieta. Wilt u handen deen op dander leggen Aldus verscheeden dan sal ic u segghen Hoe wij solaesheyt sullen verwecken Wie dat die tienste hant sal wt trecken Die so sal coninc van desen spele sijn Ende elc die moet tot sinen bevele sijn Wanneer hem die coninc te hove daghen sal Ende vander questien die hi hem vragen sal Moet elc responcie ghevene u saen Oft tot des conincx correctie staen Wat seg dijs wildy u hier aen houwen Ghy heeren ghi princen Alle die heeren. Jae wy in trouwen Margrieta. Nu elc trecke sijn handen met herten blije Ic salse tellen dats een twee ende dats drije Viere vive sesse sevene dat is tsinste Heyndric. Achte negen ou margrieta is de tienste Dus es sy die coninginne van ons allen Margrieta. En lacen moestet emmer mi gevallen Demofoen. Iaet fortune hevet u ghegheven Coninghinne te wesene Margrieta. Vruecht moeter aen cleven Her coninc van vrancrijc comt dan te hove Die coninc van vrancrijc lodewijc. Hier ben ic tuwen dienste ende tuwen love Vrou coninginne in alder manieren Margrieta. Wat condy maken Die coninc lodewijc. Aen bosschen rivieren Vlieghen iaghen nae wilde dieren Wimpele bemueren. te velde stellen Ende ons vianden ter neder vellen Daer wi in eeren bi u verschoont sijn Margrieta. Dat sal u noch hogeliken geloont sijn Als dat ghi ons allen bevrijt van thorne Op den ban beveel ic u taen horne die questie de u van mi wert gevraecht
[pagina 98]
Oft een schoon suverlike maecht Hadde. in amoruescher daet Drie minnaers hem thonende sulc gelaet Dat een yegelic waende die werste wesen Ende si werden alle namaels gheware van desen Ende begeerden van haer te weten puerlic Wie si meest minnen mocht natuerlic Daer si te samen droncken ende aten die maecht antwoorde in deser maten Ic sal die liefste een teken van minne togen Sy aen sage den eenen met soeten oghen ende den tweesten doude dese maget vroet Metter hant. den derden si op die voet Terde. doet nu die waerheit bekinnen van drien. twelc tscoonste teken van minne Es. daermen eere af mach scriven Die coninc lodewijc. Ic soude bi den soeten gesichte bliven Boven die teekenen van handen ofte voeten Want een herte mach sijn lijden versoeten In liefs gesichte met ionsten crachtich Margrieta. Ghi sijt verdoelt her coninc machtich Die oghen sijn dicwils Ioghenachtich Want der oghen soetheit drayt wel op den eenen. Daer dooghen int herte eenen anderen meenen. Mer tvoetken te tredene dats donbetaemlicste Voor suver maechdekens en dalder schamelicste Waer scamelheit van lieve creech volle vloet. Ende tarde noyt minnaer op den voet. Ende wiet doet die tuycht secreet al stille. Cloeckelic liefs herte staet nu te wille Als die nae tgebruycken ter hant gheset sijn. Ghelijc die voeten het versmaetste ledt sijn. Ende duyterste dat aenden lichaem mach wesen. Metter hant te nemene dat is gepresen. Voort scoonste teeken her coninc verheven. Want die handen die mogen die belofte geven Tvelc die oghen niet gedaen en connen Noch ooc die voeten. Die coninc lodewijc Ic gheve my verwonnen Jae metter hant te duwene is dat best Dat moet ic onthouwen Margrieta. Nu ghi hebt ghemest Die questie te solveren dies u correctie Sal wesen her coninc van reender sectie Dat ghi niet eten en moecht noch drincken Voordat liefs oochskens op u vlincken van siliadone die ionstich int betrapen staen Die coninc lodewijc. So mach ic dan wel hongerich slapen gaen Ende hebben cranc iolijt te seyse Margrieta. Hoort etsijtes coninc comt ten palayse Daermen solaesheyt mach vermeeren Etsijtes. Eerweerdighe coninginne vol eeren Al u beliefte wil ic volbringhen Margrieta. Wat condy maken Etsijtes. Dansen ende springhen Metter soeter amoruesen dieren Jo asteren tornueren alle manieren Diemen in venus pallays mach maken Margrieta. So suldi mi dienlic sijn ter saken Bericht mi her coninc met soeter spraken Dwelc so is die meeste vruecht Die den minnare meest verhuecht Ende dan in reender duecht Ghebueren mach sonder vilonije Etsijtes. Dat sal ic u segghen met herten blije Tis waar reen wtvercoren maecht Margrieta. In wat manieren Etsijtes. Dats wel ghevraecht Dat een minnaer die op sijn bedde lage Sijn alder liefste lief aen saghe Jonstich in liefde op hem verhit Haer ontcleede tot in haer hemdeken wit Ende hi niet en wiste wilt hier verstant wt rapen Dan datse bi hem soude comen slapen Ende si sette deen voetken op den cant Vander sponde. ende name dan bider hant Die deken of si int beddeken sou springen Ende si dan wederkeerde dat vierich verlingen
[pagina 99]
Ende wanen liefs liefde te gebruyckene Dats die meeste vruecht die men weet te beluyckene. Int herte met amoruesen daden Het reynich blivende Margrieta. Ghy hebbet gheraden Etsijtes coninc van herten coen Comt raschelic te hove her demofoen Demofoen. Hier ben ic eerweerdige coninghinne Margrieta. Wat condy maken Demofoen. Met blijden sinne So can ic dienen voor vrouwen ende heeren Onrecht met rechte te nieute keeren Ende wreken alle blamasije van vrouwen Margrieta. Dats goed herridder ghi wert onthouwen Te hove met heerliken state Nu berecht mi of u hertelic liefken sate Druckich gevangen als darme dwase In eenen torre van ghelase Sonder dueren oft vensteren ende ghi en mocht niet breken tglas. mer ghi mocht u lief wel spreken doort glas. ende saecht daer sulcken noot Wt breke van water dat sy die doot Soude moeten sterven terstont opter stat Hoe soudy oft ghi gheen water en hat Sonder water haer water connen geven Ende si u beminde boven alle die leven Segt mi daer af die rechte gloose Demofoen. Ic soude beyden tot dat seer vroose Verstaet wel die rede die ic vermane Tglas dat voechticheit weet tontfane Pleecht wt te slane. wanneer dat doyt Aldus sondtse water crijghen Margrieta. Dats alte beroyt dat en scrijf ic gheen sins in mijnen satere ghi most haer water geven sonder watere In den torre die al beslooten staet Demofoen. Ic en saechs niet te makene. Margrieta. So weet ic u raet Her ridder als ghijse in noode saecht So soudy vander schoonder maecht Begeren te sceiden. ende dat druckick woort Dat soudtse doen weenen rechte voort Want dijn woort luyende om haer vercleenen Soude haer door dogen water verleenen Nochtans en soudi gheen water bringen Van u selven Demofoen. Tsijn waerachtighe dinghen Elc minnare macher verhuecht in wezen Die questie taen horene Margrieta. Ter correctie van desen Dat u sciencie hier moet ghebreken So en suldy na desen tijt niet spreken Voor dat ysonija u lief begheert Ghesproken te hebbene Demofoen. Die questie is wel weert Margrieta. Nu heyndrick broeder comt raschelic voort Tot mijnen pallayse Heyndrich van lymborch. Ic gheefs accoort Eerweerdige coninginne muegende Margrieta. Wat condy maken Heyndric. Ic ben my verhuegende In vrouwen liefde princepalic En rovers vileyns mach ic so qualie Dat ic wilde dat si an bomen hinghen Margrieta. Na sulcken herten moet mi verlingen Dus vraghic u oft een roosken wit Suver van bladeren en ombesmit Haer selven van haren steelken brake staende in u camere. grondeert dese take alle den nacht tot haer de zonne verbaerde Ende dan dat roosken reyn van aerde Op haer steelken groide recht als voren Hoe soudi heyndric broeder vercoren Onder duysentich roosen dit roosken kinnen Op eenen roosboom
[pagina 100]
Heyndric. Nae mijn versinnen Sal ict u segghen wilt onverflout sijn den soeten roosboom soude nat bedout sijn Metten rooskens die crachtich van vermooghe sijn. Sonder het roosken alleene dat soude drooghe sijn. Dat in mijn camer des snachs hadde gestaen Daer soudict aen kinnen Margrieta. Ghy hebbet gheraen Heyndric. Heb ic dan voldaen Margrieta. Jae ghy ridderlic graen Die coninc lodewijc. Nu laet ons dan gaen. tes meer dan tijt In ons iolijt. tes dmeeste profijt Daermen int crijt hefc troost van lieve Ic ben hier te mijnen ongherieve In swaren meskieve. om dat ic die brieve Van venus questie niet en coste bedien dus moet ic zeledonie mijn lief gaen sien vruecht moets geschien. ic salder na spien Met soeten amoruesen treken Mer demofoen die en mach niet spreken Om dat hem ghebreken moste sciencie Dus gawy doen ons penitencie God geve elcken tot duechden influencie

Vorige Volgende

Dat. XCIIIJ. capittel.