|
| |
Hoe die soudaen van Damast eyschte des conincx van Cecilien
dochtere, ende hoe hi tlant van Cecilien destrueerde, ende den coninck vinck.
BInnen desen selven tijde dat Oriande ende Malegijs dus ghescheyden waren, soo
wasser een coninck Iambersant van Cecilien dye een schoon dochter hadde dye
Aurora hiete. Van dese Aurora ghinck al dye werelt door de maere dat si dye
schoonste was daermen af wist te spreken. Doen wasser in Damast een soudaen
Ferdelant, dye welcke eenen schoonen sone hadde, die Absolon hiet, om zijnder
schoonheyt wille. Dese soudaen seynde ambassaten aenden coninck Iambersant, oft
hem soude willen ghelieven zijn dochter te gheven te huwelijck sinen sone
Absolon. Doe die coninck van Cecylien hoorde tversoeken vanden soudaen van
Damast, soo nam hy raet met sinen heeren ende met zijn dochter, mer nyemant en
wilder in consenteren. Doen seyde dye coninck van Cecilien totten ambassaten.
Ghy heeren segt uwen soudaen dattet nyet behoorlijcken en is datmen een kersten
dochter gheven soude eenen hont, hem waer beter datmen hem gave een hondinne,
alsulcke als hi is. Dye ambassaten zijn wech ghereyst nae Damast, ende hebben
dit dien soudaen vertelt. Dye soudaen dit hoorende vanden ambassaten wert soo
seer ghestoort, dat hy dye vlechten wt sinen baerde track, ende swoer dat hijse
met crachte halen | |
| |
soude, ende al dye heeren swoeren dier gelijcken,
ende si gingen haer ghereeschap maken. Van dese dochtere vernam Crisiole Spiets
moeder, dye dachte in haer selven dat si dat kint selve hebben wilde, ende
datter noch profijt af comen soude, ende soe is si nae Cecylien ghereyst om
tkint te nemen. Dye vader van dese dochter hoorende datter alsulcken heyr met
den soudaen quam om zijn dochter te crijgen soo heeft hijse met twee heeren wech
ghesonden nae Pruysen. Dese alvinne Crysiole quam desen heeren te ghemoete, maer
met eenen rinck soo ghinck si invisibel dat dye heeren haer niet en saghen ende
daer hoorden si den heeren segghen van Aurora alsoo dat si wel hoorde dat dit de
selve maghet was dye si begheerde te hebben. Doen nam si eenen rinck ende
staecken aen des maghets hant, soo dat dye heeren niet en wisten waer dat si
bevaren was. Dese ionghe maghet sach die vrouwe terstont dye haer den rinck
aenghesteken hadde, ende si vraechde haer waerom dat si dat dede. Doen antwoorde
Crisiole dat si verhoort had dat die Turcken haer begheerden te hebben tot eenen
wijve, ende om dat ick wel wiste dat u die soudaen soude ghewonnen hebben, soo
quam ick u halen, want ick sal u doen hebben eenen schoonen ionghen kersten man
daer ghy een machtighe vrouwe worden sult. Doen dese ionghe maghet dat hoorde
soo wert si seer weenende ende seyde. O lieve vrouwe sal mijn vader zijn lant
ende zijn goet verliesen om mijnen wille, dat sal mi seer berouwen, ende
Crisiole vertrooste haer alsoo si best mochte, ende zijn also tschepe ghegaen.
Doen dye soudaen van Damast zijn heyrcracht vergadert hadde, soo quam hi in dat
lant van Cecylien barnende ende destruerende dye kercken ende cluysen, tot dat
si quamen voor dye stadt daer die coninck in was, ende die stadt beleyden si
.xix. weken lanck, alsoo datter nyemant wt noch | |
| |
in en mochte. Doen
en mochten zijt niet langher maken by ghebreke van victalie, ende si ordineerden
dat si hen liever doot vechten wilden dan van hongher te sterven. Ende si zijn
terstont wt ghereyst, ende vochten teghen dye Sarasinen seer vromelijck, daer si
menighen Sarezijn versloeghen. Mer ten lesten werden si verwonnen, ende die
Turcken staken dat vier in dye stadt ende verbrandense, ende leyden den coninck
ghevanghen te Damast.
Doen dye alvinne Crisiole des coninckx dochtere ontschaeckt hadde, so zijn si
tschepe ghegaen, ende zijn gheseylt door dye wilde zee, so verre dat si een
schip saghen comen sonder seyl ende sonder stuerman, ende si sijn nae dat schip
gheseylt. Als dese schepen by een waren soo vraechde Crisiole. Oriande waer
wildy henen met desen schepe sonder seyl ende stuerman. Doen Oriande dit hoorde,
verwonderde si haer seer, wie dat was die haer kende ende seyde. Vrouwe by
orloove ghevraecht wie sidy dat ghi mi dus kent, want ick en weet niedt dat ick
u oyt mijn daghen ghesien hebbe. Doen seyde Crisiole. En ghedenct u niet dat ghi
in voorleden tijden ontnaemt mi den cleynen Spiet, daer ick af gheleghen was op
een fonteine daer ghi te passe quaemt, is u dit vergheten. Doen Oriande dit
hoorde so seyde si. Sijt ghi Crisiole Spiets moeder dien ic op die fonteyne
groot leet dede, twelcke my leet is, niedt te min tis uwen sone gheluckich
gheweest, want hi ghetrout heeft Maleghijs moeye die schoone Ysane, daer hi een
man van, eeren mede geworden is, daer op Crisiole antwoorde ende seyde. Lieve
Oriande dat weet ic wel. Ooc weet ic wel dat ghi Malegijs u lief lange gesocht
hebt, die buyten Eggermont is tusschen twee berghen daer alle die heren versaemt
sijn, ooc soe weet ic wel dat ghi derwaerts reyst, want in sinte Patricius
valleye was u gheseyt dat ghi hem daer vinden soudet, | |
| |
ghelijc ghy
ooc doen sult. Doen Oriande dit hoorde was si blide ende seyde. O Crisiole wilt
mi vergheven die misdaet die ic tegen u misdaen heb, aengaende tstelen van uwen
sone, wat ghi daer voor begeert dat sal ick gheerne doen. Doen seyde Crisiole.
Oriande ick en begheere gelt noch goet, maer gheeft mi dien wilden man, ic
vergheef u alle misdaet ende hout Spiet tot uwen wille. Doen Oriande dit hoorde
so seide si. Gheminde vrouwe dien wilde man die gheef ic u gheerne, ende noch
gheef ick u ter eeren van u ende van uwen sone Spiet dese merminne ende den
zeeridder, van welc Crisiole haer seer bedancte. Doen vraechde Oriande wie die
schoone maget waer die si bi haer hadde, want si noyt schoonder maget ghesien en
had. Crisiole antwoorde. Het is des conincx dochter van Cecilien, die nu
iammerlic gevangen is vanden boosen Sarasinen, ende dese schoone ionge maget
soude hebben moeten trouwen eenen ongheloovighen hont. Ende als ic dit oversach
dat dese schone magt soude moeten comen onder die honden, so docht ic dat beter
waer dat ickse haelde, op avontuer oft die fortune noch keeren wilde dattet lant
comen mochte onder die orie. Ende op hopen dattet soude geschien, so sal ic
desen wilde man geven der dochtere van Cecilien, want het dunct mi wesen een
cloeck ende een schoon man. Oriande seyde. Dat is warachtich, want ick heb hem
sien een boomken wter aerden trecken daer hi eenen grooten drake mede verwan,
maer hi hevet een gebrec dat hy niet spreken en can. Hi is ooc van edelre
afcoemsten want hi heeft eenen gouden rinc aen sinen hals ende die in dat eylant
(daer ick hem gehaelt hebbe) ringen dragen die zijn van edelder afcoemsten.
Crisiole seyde. Dat hi niet spreken en can, dat coemt bijder spanader die hi
heeft die hem noch niet gesneden en is gheweest, maer wildi mi helpen | |
| |
ic sal u wel maken dat hi aen sijn sprake comen soude. Ende doen
namen si den wilde man ende sneden hem van dye spanader ende mettien began hy te
spreken. Doen die vrouwen dit hoorden, so seyden si tegen malcanderen dat dese
dochter aen hem seer wel besteet soude zijn. Ende Oriande seyde. Laetse
malcanderen trouwe geven ic sal den wilde man also veel gouts gheven als dat
conincrijc van Cecilien half weert is. Doen seyde Crisiole tot des coninckx van
Cecilien dochter. Wel schoone maghet wat segdy, soudy desen wilde man wel willen
trouwen tot eenen man, ic verseker u dat ghi hem eer twee iaren van desen daghe
sult sien sitten als geweldich coninc van tgeheel lant van Cecilien, ende ghi
als coninginne, ende ic salder toe helpen. Doen dit die maget Aurora hoorde, so
seyde si. Lieve vrouwe ick stelle mi al geheel in uwen wille, ende die ionc man
staet mi wel aen, ende met dien ringhe gheef ic hem mijn trouwe. Ende doen de
wilde man dat sach so nam hijse vriendelicken, ende hi nam den rinc van sinen
hals, ende bracken in twee stucken, ende gaf haer deen helft seggende. O mijn
alder liefste dyen ic wtvercoren hebbe hier mede so gheef ic u mijn trouwe. Doen
gaf Oriande den wilde man drie vanden langen stocken gouts, elcken stoc alsoo
lanc als eenen cubytus van eenen grooten man, ooc gaf si hem een hondert vanden
clootkens die si daer gevonden hadde die ooc veel goets weert waren, ende ooc
gaf si hem een deel costelijcke steenen, seggende. O vrouwe Crisiole doet doch
tbeste met dese twee, ende ic wil varen nae Eggermont, ende wildy uwen sone
Spiet iet ontbieden ic sal die bootschap ter lieften van u seer geerne doen.
Crysiole seyde. Ick en weet hem niet te ontbieden dan dat ghi hem doet
vriendelijck grueten in mijnen name, ende aldus scheiden si van malcanderen.
Ende Crisiole Spiets moeder reysde met | |
| |
haren wilde man ende met dye
maghet Aurora nae den Alvenberch, ende daer soe wert hem thaer vanden lijve
gheschoren, ende doen wast dye schoonste man diemen sien mocht, ende hi wert
ghedoopt ende wert Ian gheheeten, ende men hielt die bruyloft inden Alvenberch
wtnemende seer costelijck. Ende Crisiole die alvinne haelde den ouden coninck
Iambaersant met consten wter ghevanghenisse in sijns dochters bruloft ende si
vertelde den coninc die avontuere dye henlieden was ghebuert, ende si toochde
den rijcdom dye den ionghelinck toe behoorde. Terstont ghinck die coninck daer
gelt af slaen, ende huerde mannen van wapenen, ende reysde met dien volcke nae
tlant van Cecilien ende wan die stadt van Cecilien, ende veriaechde alle die
Turcken wter stadt, ende liet dye stadt van Cecilien schoonder op timmeren dan
si te voren was, alsmen noch sien mach. Dit willen wi hier laten ende verhalen
weder van Spiet.
Doen Spiet in zijn beste feeste ende in zijn meeste ghenoechte vander bruloft
was, so en wilde coninc Karel niet langer bliven, ende seide. Heer bruydegom den
tijt verdriet mi hier dus lange te bliven, aldus heb ic voor mi genomen dat ic
vertrecken wil, want ic en weet niet hoe dattet in mijn hof staet, ende niemant
en weet waer dat ick ben. Spiet dit hoorende seide. Heer coninc wildi dus
geringe wech gaen, wy souden noch vruecht bedriven. Aldus bid ic u ootmoedelick
ende vriendelic dat ghi noch vier dagen hier blijven wilt, dan sal ick met u
reysen waer ghi wilt, consenteert mi doch dese bede hoe wel ic u nemmermeer en
sal connen voldancken van die groote eere die ghy my bewesen hebt. Doen seyde
die coninck. Heer bruydegom die ionste, die ic u gedaen hebbe die gonne ic u
wel, ende ooc dancke ick u der vrientschappen die ghi mi bewesen hebt, aldus so
laet ons nu scheyden, want nu tis tijt, ende ooc | |
| |
mede het moet eens
gescheyden zijn. Doen Spiet hoorde dat die coninc niet bliven en wilde, so seyde
hi. Heer coninck na dien dat ghi immer wech sijn wilt, soe consenteerdt mi een
bede costeloos, scadeloos ende niemant te na gedaen, mer wt rechter liefden,
twelc hem die coninck consenteerde op die condicie voorseyt. Doen Spiet consent
hadde, soo seyde hi. Heer coninck so en is mijn bede niet meer dan dat ghi uwen
wille stelt in den wille van u genoten want ic stelle mijnen wille ook in haer
lieden. Die coninc dit hoorende seyde al lachende. Ay loos Spietken hoe subtijl
sidy, maer die bede weder segghe ic want ic weet wel, stont dat in mijn ghenoten
dat si alle ghelijck souden seggen dat wi souden hier blijven, ende aldus
wedersegge ic de bede. Doen quamen daer ten aenganghe die ghenoten die alle dese
questie ghehoort hadden, ende seyden wt eenen ghemeenen monde. Heer coninc ghi
en sult u woort niet achter ghaen, dat ghesproken is dat blijft ghesproken oft
anders u dinghen en waren nyet, ghy hebt een bede gheconsenteert, ende dye en
moechdy nyet weder segghen, laet ons vry segghen, wy sullent so segghen dattet u
nyet berouwen en sal. Die coninck dit hoorende, wert lachende ende seyde. Ghy en
dorft daer om nyet seer te rade gaen, want ick weet wel al dat ghy segghen sult,
als dat wi hier blijven souden. Dye ghenoten seyden. Heer coninck ghy en moecht
nyet badt raden, ende heer coninck blijft hier noch dese drye oft vier daghen,
hebben wy dye feeste begonnen laetse ons doch volbrenghen. Doen dye coninck dit
hoorde vanden ghenoten soo seyde hy al lachende. Ick sie wel, seyde hy, dat ick
hier nu ymmers blijven moet wantet nu die ghenoten also belieft. Doen waren alle
dye heeren te samen wtnemende seer blijde, ende die tafelen werden gedect, daer
dye heeren seer eerlick ghedient waren elck nae sinen state. Ende | |
| |
Malegijs bedreef veel nieuwer consten, alsoo dat hy daer mede sinen pays aen
coninc Karel creech.
|
|
Auteursrecht onbekend