stadt wel te crijgen mits dat ghise dicwils soudt bestormt hebben, mer ic sie
wel ic had u lieden wel mogen houden bi mi tot dat ic selver gecomen had. Daer
op die coninginne seyde. Edel heere coninc waer soude ic gereyst hebben, want
also geringe als ick hier int lant quam soo is mi den arbeyt aen gecomen, also
dat ick niet voorder reysen en mocht, so heb ic mijn tenten hier neder
gheslagen, ende ben hier verlost van deser vrucht bider gracien onser goden.
Ende doen seynde ic twee ruesen na Lyons, oft si Gautier betrapen souden mogen,
mer si hebben so lange wech geweest, dat ic mi selven laet duncken datse Gautier
beyde vander werelt geholpen heeft. Die coninc dit hoorende, was seer verstoort,
vermalendidende zijn goden dat si aldus hadden laten mineren ende verderven die
stercke giganten, want mijn beste vrienden verlies ic altijt van die
onghevallige kerstenen, alst wel blijcte voor Rootsefluer, want coninc Antenor
mijn oom wert daer verslaegen. Ende om dit te wreken so reysde coninc Glutifax
mijn vader om die stadt te raseren ende te verderven (twelc hi dede), mer eer hi
wech geraken conde was hi vermoort van eenen kersten tovenaer Malegijs geheeten,
ende hy sliep by mijn moeye Iolente, ende daer om liet haer Mamet vanden paerde
vallen daer si den hals brack, in wrake dat si bi eenen kersten geslapen had:
ende boven dien heeft hi Bertelute van Perssen mijn grootvrouwe ooc aen deen
side geholpen, och als ict over peyse soo wil mijn herte van rouwe bersten. Doen
die heydenen gehoort hadden die clachte dye hem lieden die coninc dede, ende
siende sijn verstoortheyt die hi bedreef, so seyde daer een ammerael. Heer
coninc stelt u selven te vreden, want dien selven Malegijs daer ghi af segt
hebben wi hier gevanghen. Die coninc dit hoorende was seer blide, danckende zijn
goden dat si haer gracie getoont hadden dat hi hem
Auteursrecht onbekend