Nederrijns moraalboek
(1987)–Anoniem Nederrijns moraalboek–
Auteursrechtelijk beschermd
[pagina 78]
| |
En min vrint heuet mi gebeden dat ic vome endeel guoder worde geue inscrigte dar hi bi leren mogte vmoe seluer inde ak ander luode. Jnde vomb dat. dat man sculdig is te helpene den vrinden. so wil ic minen vrinden helpen mit diesen worden. so wie sose wel verstain wille. Jnde behoiden in sir herten. hie mager sere miede geholpen wesen. Mar iet sin viele lude al so gesiet Al horen si viele guoder wort. dat sire in vor herte niene behoiden. dat is verloren pine dat man sulken luden seget. Want die wis is. die behoitse in sin herte. Jnde huot vome vuor alle quatheit inde duot alle duogde. Jnde diese wort wil ic setten so cuortste mag. Want die wise man seget aldus. Al dat du spreks dat sprek cuortelik. Want des minschen herte verstait bat die kurte rede dan die lange. Want en is gen dink alte hastig der herten. dat man gerne hort Kastie den gienen den du beteren muoges mit dinen kastien. mit dien dat du vome lers so lers du die seluer. | |
[pagina 79]
| |
Vrint huot di vuor scande. Want scande duort langer dan armuode. Man sal wirken inde vfenen. dar man al den luden wale miede behagen mag. Man sal vontsien dat in der auenturen hant stat. Want man wet nit. wat ende die sake niemen sal. Jnde man sal vome ak nit laten bedriegen mit quader hope. also als die visg duot. die vom lait vain mit der angelen. Vombe die hope die hie heuet ten ase. Jnde die gigte van der auenturen die wagten den minsche. Jnde die sieker wesen wille. die duo vome vtergigte van der auenturen. Die giene die niemet die mag wel plediren. die nit en nimt den is swar. dar vombe valt dicke. als lange als man wel helpen mag so heuet man vrinde gnuog. Jnde als man nit mer en mag. so verlis manse Die arm is die is al ene. dan besuokt die man sinen vrint. Mar man vinder dan luttel. Want si vlin den armen. Jnde dar vombe en ist gene regte | |
[pagina 80]
| |
minne. Want geregte minne is al suolk int tinde als int beginsel. Jnde mit din sal du kinnen regte vrint. Mint hie di vomb die seluer of vomb din guot Mint hie di vomb din guot dan is gene minne mer komenscap. Jnde hie wille dat du sine minne kops En gene sake vontbrikt den wisen al is dat sake dat hi viele bedarf. Jnde die duombe die en bedarf nit te hebene Want hie gene sake te regte setten en can. Dat die minsche heuet dan genuogt vome nit hie en si wis. Want den duomben den enbehagen sine saken nit. Leue in sulker maniren mit den luoden of die got altois sage. Jnde bidde in sulker maniren te gode of di al die lude horden, dat is te | sechene. dat du nit gode bidden en soldes duo ne wils dat al die lude horden Er du begins te werkene so berad di Die wise man seget ic pine mi min guot vonder mi te lechene. nit mi vnder min guot | |
[pagina 81]
| |
He heuet verloren al guot inde heuet die dugde gelaten die altois pinst vomb guot te gaderen. Duo salt wesen stark inde fir tegens die felle sake Jnde tegens die guode willig En is nit gnuog te versiene die saken die man vuor sin ogen siet. Mar man sal sien. dat te kuomen is. Want vorsinigheit mait tinde van der saken Sint dat du so quade ogen heues dat du dine quaitheit nit siin en muges. Wo sies du dan so clair dat du wel sies die quaitheit van dinen naburen Die gude minsche huot vome van sunden duor die minne van vonsen here. Jnde die quade vomb den angst den hie heuet dat his vontgelden sal Wwo mag it den gienen gelouen die en gen tit vom seluer en hoit in enre gedagte Duo sols merre herscap heben mogts du din herte verwinnen inde | |
[pagina 82]
| |
setten te reden. dan of du twedel van der werelt heddes vonder. di inde du din herte nit bedwingen en cuonstes. Julius cesar die keiser die en wainde nit gedan heben als lange als hi iet te duone hadde Man sal sinen vrint als sere minnen in sir armuode als in sir richeide Die gemint wil wesen die minne. Die sin sculdig te siene vop den guoden minsche. Jnde | te volgene vor werke. Jnde te wirkene gelik of si vons altos sagen Die dugede is so bequamelik dat ouer mits huore so kint die quade minsche die guode sake. Want en is nieman so quait hiene wilde te regte heben gewonnen dat hi tuonregte heuet Dat regt van geuene dat is sulik dat di giene die gieuet die sals tehans vergeten heben. Jnde die niemet die sals altois gedinchen. Din ogen sin sculdig te gane vor dine vuotstap. dat is te sechene din rait is sculdig te gane vor dine werke. | |
[pagina 83]
| |
Uorsig die in allen steden sluots du dine porte vor dinen viant. sig dat dine dure agter di nit opene en si Engene verradenisse en is so grot als die giene die man duot in gelikenis van dinste Man mag nit sikers wieten. wan er ens minschen herte wel tegemake is. bi den gelate. van den ansigte nog bi sinen worden die hie sprekt Die giene is wel behindig die kan vorsiin in sir herten. wat vome tuo kuomen mag. Jnde wat hi duon sal als vome die sake geuallen is Wine sin in diese werelt nit al ene vomb vons Mar vomb dat. dat manlik anderen helpen sal Die giene die is salig die so enen anderen vontsiit dat vomb die gedinchenisse die hie heuet van den gienen den hie vontsiit. dat hie vome scone hait inde | |
[pagina 84]
| |
vruodelik weet dat die giene die also vntsit. die sal vomb lang vontsiin wesen inde geert. Jnde dar vombe sal man enen man kiesen. wes | sieden inde wes leuen die wel behagen. Jnde dat si guot sin inde erlik sine sieden die sal sin din spiegel. Jnde na vome salt du din leuen setten. Want niemeer dan man mag ene cruombe sake hiene sie inde merke wo die guode minsche leuet Die giene is salig inde gestadig in vome seluer die die tit die te kuomen is siekerliken beidet inde dir vome niene vontsiit. Die nit gepruouet en is van der saken hiene mag nit harde kuone sin. Mar die giene die gepruuet inde besuogt is die magt kuonlik. uonderstain. Want his gewone is. inde gewonte helpet tallen dingen. Uiele saken verueren vons die noit en gescie Jnde wi pinen vons mer vomb dat. dat wi wanen dan dat wieten. Jnde dar vombe en sal man nit vonsalig sin vor tit. dat is te sechene dat man nit verueren en sal. vor die tit dat | |
[pagina 85]
| |
man wel weet dat die sake gescien sal. Want man vontsiit viele sake die nummer en gescin. nuo si also dat geualle als du vontsies. sone helpt di din druuen nit. vor die tit dat die sake geuallen is. Jnde dan alr irst so cuomps du tide gnuog als die sake geuallen is. Iet is ene lelike sake den minsche dat hie leert te leuene in sin odere. Want hi soide ouer lang tit geleert heben. Die giene dient te viele saken die den ligame dint Jnde die vontsiit den ligame. tergeren. Jnde die al duot dat hie duot. duor den ligame Wi sin sculdig te leuene nit vomb den ligame. Mar als die giene die nit leuen en muogen suonder ligame. Die arm is. die gait sieker ouer al. Quatheit inde wretheit diene mag nit so hoge climmen. die | name van den wisen en si guot inde erlike. Die giene en mag gen guot leuen heben. | |
[pagina 86]
| |
die vome altebiesig makt mit sinen guode. Want hie penset altois. Wo hie sin guot merren mag. Jnde hie wuort knegt van din dar hie sculdig af war here te wesene Wat so du duos kuomp hastelik wieder tuot dir gedagte. Jnde lait die werke van den ligame. Jnde duo die werke van der sielen. Alte grote richeit gegadert duot den minsche alte sere sorgen Die nit en dreget die mag kuonlik gain vonder die dieue. Luottel geualt dat sconheit inde suouerheit te gader bliuen. Man screit verlis van sine guode mit waragtighen tranen. Dat man gespart heuet mit groten pinen dat huotman alrebest Die giene en is nit arm die alse viele heuet dar hie miede lieden mag Alte spade begint te sparne die giene die an dinde van sine guode kuomen is Iet is en groit sin inde wel getempert als die minsche gestadig is in vome | |
[pagina 87]
| |
seluer inde hie nit al en toget sin herte. Als du lesis in en buk pinse dat dar gen valgs inne sta. nog gen dink dat di vonstade maken mag. Die ouer al is die en is nirgen. Die sake die man hort mit der liede die verstrekt luttel. | als die spise die man niemet. inde die man wieder vot wuorpt En gene en is so sere tegens die gesunde van den minsche. als dicke te verwandelen sin leuen. Die giene die is rike die vome wel gehelpen kan mit dien dat hie heuet. Want die luttel heuet inde vome genuogt die en is nit arm. Mar die giene die mer begeert dan hie heuet. inde vome niene genuogt die is arm. Wat mag man ruken wo viele guder hie heuet. sint dat hie nit en telt dat guot dat hie gewonnen heuet Manire van richede so is dat man hebe dat man bedarf. Jnde dan dat vome genuoge dat hie heuet | |
[pagina 88]
| |
Wetstu dat die man din vrint is. geloues du vome nit als wale als die seluer duo misduos. Ak mis duot die giene die sine vrint bid vuor di lude. Jnde diene pruouen wil ouer eten. dar en is man nit sculdig te pruuene. Mar ter noit dar salmanne pruouen. Die behuuege man die bedruokt is mit sinen guode. hiene | heuet gene so grote beswarnisse dat hie vrint waint heben dar hir nit en heuet. Jnde dar vombe heues du enen vrint du bist sculdig mit huome te sprekene. Jnde bi sinen rade te wirkene. Mar dat du gepruoft heues alr irst dat hie die mint. na der minnen salt duos gelouen dat man mint. Mar te vuoren salt duos wanen Als kuonlik sprek tegegen dinen vrint als tegen die seluer Leue in sulker maniren dat du di seluer niene geloues. Iet is ene lelike sake dat man nieman en gelouet. Jnde iet is dwasheit al den luden tegelouene. Nogtan is sconre dat man al gelouet. Mar | |
[pagina 89]
| |
iet is tsiekerste dat man nieman en gelouet Du haddes grote blitscap duo man di die kledere van dinre kingsheide af dede. Jnde man di gaf mans kledere. nog bistu sculdig merre blitscap te hebbene. heues du gelaten kingsche sieden. Jnde dat du genuomen heues. wiser lude sieden. Mar it is swar te duone. Want man vint der lude viele dar iuogt nit al ene in vome en is mer kingsheit. dar vombe duot guot laten die kingsheit. Want man vint bescrieuen die wisheit van den oden, van den iungen en vinde wi nit dan dwasheit En gene richeit en helpt den gienen diese so lif heuet dat hiese nit verliesen en dar. Jnde dar vombe wils du te regte leuen. so sette din herte inde dinen sin dar tuo. dat du al gedogen muoges dat gescin mag. Want dauenture die en brinkt nieman so hoge. sine settene wieder alse nieder alsi vor vombe kirt. Jnde dar vombe sone salmere gene sieker hope vop heben in diese werelt. Want gelike dat die see groit wuort inde vor dicke | |
[pagina 90]
| |
verruort Jnde en gene scadigheit en heuet also en duot die auenture W[i] sin sculdig te leuene inde te hebene beter leuen dan die gemente van den luden. Jnde nit tegens die gemente te leuene. dar vombe dat wi die giene die wi trechen willen te guoden leuene. vom van vons nit en vontverren. vmob dat wi endeel anders leuen dan si Die in ens ander mans huos kuompt. hie is sculdig mer te | merkene inde te siene. vop den here dan vop dat. dat in den huos is Want die giene is wis. die also hauegslike dient inde duot dienen in erdenen vaten. als en andere in silueren vaten. Jnde den gienen en sal man nit mispreken. die nit meer en agt vop die silueren vate dan vop derdene Iet is groit armuode van herten als die minsche sin richeit nit gedogen en kan. Jnde sinen muot bedwingen Iet vordert sere en ende te hebene van girigheide dat man den angst den man heuet. in din dat man tguot wint. dat man dien van vome duo. Want | |
[pagina 91]
| |
die wise man spriekt aldus. duo girigheit van di. inde angst sal die laten Iet guot dat man al ene heuet dat en dogt niergen tuo. en | si dat man gesellen dar tuo hebbe Iet is ene harde guode sake dat man nieman bidden en darf. | Jet is ak ene grote sake dat en minsche so vol is inde so bouen van sinen guode dat hi nit beiden en darf na die werke van der auenturen Iet guot van dieser werelt dat is vergangelik. Jnde nit gestadig. Jnde war si gestadig si soiden dog ienege tit des minschen herte vollen. Mar huor nature is suolik so mer meer heuet somer meer begert Iet is merre meisterscap dat man wel hoit dat guot dat man gewonnen heuet dan te hebbene in sir gedagte dat man wel duon sal Man is sculdig harde sere dar tuo te pinene. dat die guode wille gebragt si te werke Die begerte die bi naturen is. die heuet en ende. Jnde die tegens reden inde | |
[pagina 92]
| |
tegens nature is diene heben nit war in si ende nieman muogen Want dat valgs is dan heuet nit. war in dat ende niemen mag. Want ende van valsheide dan is nit. Regte also als wi sien enen man gain den regten weg hie gait dar hie gain wille. Jnde die giene die den crumben weg gait. die gait inde gait Jnde en wet war hi gait. Jnde en kan ten ende van sinen wege nit geraken Richeit is swar te lerne inde te hebene. Want si makt den minsche alt vonmuotig. Mar armuode is vri inde gestade. Jnde dar vombe wil tu dinen sin vri inde ledig heben, so mak di arm of gelik den armen Man is viele siekerliken rike als man niene weet wo swar dink armuode is Wil tu wel leuen in dir richeit so pins dat du wel leuen muoges suonder huor. Jnde pins ak dat richeit is ene sake. die den minsche nit bliuen en mag. Muogs du so vontiedi van dieser werringen van dieser werelt. Jnde en muoges du di nit vontien. so so duo die seluer alte male dar vot. | |
[pagina 93]
| |
Wruotscap leert den minsche swigen inde nit spreken. Sig dat din leuen nit anders ensi. dan du den luden leeres. Want iet is grote gebrekenisse van sinne als des minschen leuen nit en volget sinen worden Regte vruotscap is dat man altos wille die guode sake inde die regte sake Jnde dat man die quade niene wille Armuode die leert den minsche des hie nuommer en wiste nog en pinsde en ded armuode Man is sculdig armuode te minnen. al wairt anders nirgen vombe dan dat si duot vrinde kinnen Iet is ene harde grote sake. als die minsge nit bedregen en is mit richeide. Jnde diese dan wel hoiden kan Iet is ene harde lelike sake enen manne sin ere te latene. Wi steruen inde hebbens beguonnen sint dat wi irst geboren wuorden. | |
[pagina 94]
| |
Jnde dat is vonse nature. Want en is nieman die sechen mag ic hebe dirtig iar of virtig. of min of mer. Mar die doit heuetse vop vons gewonnen. Jnde hine gaues vons nit weder vomb al dat guot. dat wi geleisten muogen. duos en heb wi nog iar nog dag Nieman en agt vop guot leuen. Mar al die lude agten vop lang leuen. nogtan sal elk minsche wieten so wie so wil die mag guot leuen heben. Mar lang leuen dat en mag nieman heben. Man sal begeren dat guot is inde erlik. Want die begerte inde die girigheit. van den guoden minsche. die is sieker inde vaste. in guoder | conscientien. inde bi erliken rade Iet sin harde luttel luode. die von seluer inde vor guot berigten mit guoden rade Ic vinde viele lude die dan alr irst leren leuen \ als si steruen sulen. Jnde dandre latent leren als si beginnen sulen. | |
[pagina 95]
| |
Die is dol die tuot sinen argste hast. Want iet kuomet alte tide. Ak en is die giene nit vruot die die tit. die hi heuet verlist. vomb den angst den hie heuet van der tit die kuomen sal. Iet is en stark dink ene starke stat te verwinnene. Mar iet | is viele starkere den doit te verwinnene. Jnde dar vombe is man sculdig den doit tuontsiene dat man geen dink der doit gelik maken en mag. Iet is en lelike sake dat man seget inde vertelt die worde van den wisen luden. Jnde man vore werke niene volget. Iet is ak en lelik dink. dat man ene sake pinset. inde en ander seget. Jnde nog is lelieker dat man seet in gescrigte saken die nit war en sin Die den anderen mint hiene sal vome nit vontsien. hiene | suol vome sechen dat vome erlik is. Duo al dat du duos gelik of tuot vuor al den luden dedes. | |
[pagina 96]
| |
Iet is en harde guot dink den minsche dat hie en \ huode sette sir herten. Jnde dat hie enen minsche kiese. Wes werke den luden wel behagen Jnde hie vome dar na pine te wirkene Dan is gen scade of dat vergait dat sculdig is te vergane. Jnde dat saken wieder tuot vorre naturen kuomet Duo van di den wain want si sin valgs inde nit gestade Die doit die beid vonser altos als wel den iungen als den | oden. Jnde dar vombe si wi vor sculdig te beidene in allen steden inde altos | suol wi vorsiin wesen tegens huor Merke dine iare inde teelsei so soits du heben scande. dat nu te willen dat du woits duo du en kint wers. Duo of du muoges in ieneger maniren dat die sunden inde die quaitheit in di versteruen er du verstirues Die guode pinsinge die en is nit geret nog te kope. Jnde war si te kope man vuonde nieman diese kogte. Mar die quade pinsinge die is dik | |
[pagina 97]
| |
gekogt Man is sculdig te wandelen sinen muot inde nit sin lant. Want al vars du ouer see dar vombe en laten di die sunden nog die quaitheit nit duone vuorse mit di. Jnde dar vmbe soits duo se alr irst van di duon Jnde di seluer wandelen Jnde dan sal di genuogen. in wat steden so du bist. Want als die minsche in guden leise is sin lant is ouer al Vonuersiin doit kuompt gerne den gienen die lange wenen leuen. Jnde in dien hope vome laten te beteren. Jnde dar vombe sal man alle die dage die kuomen setten gelik den lesten dage Die guode worde sal man prisen nit vomb den gienen diese seget, mar vomb vor duoget Rade inde lere di seluer alr irst inde dan enen anderen Hebbe vriede tegens die lude inde vegte tegens die sunden inde die quatheit | |
[pagina 98]
| |
Diegiene die duol is in enre saken die waint ak dat al dandere duol sin in der seluer saken. Nieman die dine quaitheit weet salt du als sere vontsiin als die seluer. Want enen andere mogts du vontgain inde nit die seluer Sig dat du dine kragt inde dine magt lieuer besuks in diin dat du dinen vrinden helps in duogden. dan duo seluer dedes tuonregt vop dinen viant Andermans misdat die bistu sculdig gerne te vergeuene. Mar dine misdait die du misduos die ne sols du nit vergeuen. Mar duo | sols altos gedinchen. vomb dat. dat du di tebat huden suols in misdat te vallen. Die wis is dan alr irst leuet hie teregte. als hie pinset wat tegesciene is. Jnde dat hi alle saken priset na vren werde. Jnde na vorre naturen Die wise man die is sculdig te horne viele raits. Jnde dar vot dat beste te niemene. Jnde vome te huodene dat hie niene valle in valschen rait. mit ligtelik tegelouene. | |
[pagina 99]
| |
Idel pinsinge inde die nit wesen en muogen dar en sols du nit vop pinsen. Want makstu din herte vonmutig dar miede. du sols druoue werden als du al gepinst heues. vomb dat. dat du dine pinsinge nit | volbringen en muoges. Drag vorkunde ter warheit inde nit ter vrinscap Duo sols wesen van drie tiden tegens die quaitheit. sette | die sake te regte die tegenwordig is. du sols gedinchen die giene die gelieden is Jnde vorsig die giene die te kuomen is Pinse in dir herten die duogde inde die quatheit die gesciin muogen. dar vombe dat du die duogede muoges maten inde die quaitheit gedogen Die wise man die en is geen tit ledig. Want hie haist die saken die trag sin. of hie vontwirt die bewuorren saken. of hie swont die harde saken inde die grote. die swair sin te duone. Jnde aldus vorsiit hi vome van den groten saken tuot den klenen. Jnde van dien dat klair is tuot dien dat duonker is. | |
[pagina 100]
| |
Jnde van dien dat nuo is. tuot dien dat nog kuomen sal Duo sols besiin wat luden du wel behages nit wo viele luden du wel behages En sette die seluer nit in so groten dinchen dat du bieuen muots inde angst heben dat du vallen suols Iet is ene harde erlike wrake inde engrote dat man vergeuet. Die gene die is kuone. die niene begert den angst als die duombe man duot. nog die nit vontsiet als die arm man duot. En gene sake en makt den minsche so blode als sine conscientie diene begript van sinen quaden leuene Duone sols ak nit versmain armuode nog guodertirenheit Heues du luttel wagte dat du dar vombe nit vrek en siis. mar milde. Want man mag wel milde wesen van klenen guode En clage nit. nog en screie din armuode nog en beger nit ander mans richeit | |
[pagina 101]
| |
En minne nit vonsuouer worde. mar du sols minnen die worde die vruomelik sin Jnde dar du gebetert bi muoges werden Uorsig dat dine houisgheit nit en si vonerlik ensi. Mar si sal sulk sin. dat si al den luden wel behage Duo sols wesen alse druoue bistu gepriset van den quaden. als of man die prisede vomb ene quatheit. Iet is en harde guot dink dat man den smekers van huome duot. Want dar si sin. si trechen des minschen herte an huon. mit huoren smekeliken worden. Wagte dies dat du mit vertrechingen niemans vrintscap en winnes Want minne die en wil gene trekhinge Huot di van houerde inde van dolre kuonheide. Mar du sols wesen omuodig. Jnde di nit alte lage maken. mar in omuode sal man mate haden Duo sols die dugede leren inde wisen. inde castien | guodertirenlik die quatheit. | |
[pagina 102]
| |
Duone sols den harden worden nog den houerdigen worden nit vontsiin. Mar der smeker worde die sols du vontsiin Duone sols nit nawe besuken ander mans vongeual nog sine quatheit. nog duone sols ak nit alte wredelik castien. nog duone sols den minsche nit verwiten sine quaitheit indien dat duone casties. Mar toge vome scone gelait in din dat duone casties. Duo sols swigen inde horen den gienen die sprekt Jnde vrag man di iet. so antwerde so dat die giene versta, dar du wieder spriks. Jnde vontcuommer di van den gienen die nit en wil mer werringe als man vuor huome sprikt Mak al die lude gelik die seluer. so dat du niene versmais | mit houerde die giene die lager sin dan du bist. Nog vont sies ak den gienen die houerdiger is dan du bist. aldus mag du alrebest geregt wesen Duo sols guodertiren wesen tegens al die lude Jnde huot di dat du nit en smeks Jnde du sols spilik wesen tegens al die lude. | |
[pagina 103]
| |
Duo sols wreder wesen in delne dan in sprekene. inde in dinen leuene dan in din ansigte Du sols di huoden dat du din lof. Jnde dinen pris nit vort en segs. Heues du lof du en salt en genen nit heben. vop enen anderen dat hiet heuet Dat du weets inde dat du kuons. dat sal du en anderen gudertirenlik Jnde dat du niene k\244ns. dat salt du gerne leren. Jnde gebare oft duos niene kuons. Regten inde regtigheit wart vuonden bi naturen. vomb te helpene die gemente van den luden Geregte dait inde geregt loin. is als die minsche sin saken wel duot. Want en gene sake en dog. en si dat manse duo in duogden Die dwasheit inde ouermuot van den houerdiegen. die duon dicke dat die gutertiren te gedogen heuet | |
[pagina 104]
| |
Nieman en mag en dink lange trechen dat in valsgheide gedain is. Mar dat man in duogden duot dat waist altois Iet is als grote wretheit al te vergeuene als nit te uergeuene. Jnde dar vombe sal man reden inde siin. lude dat en stark dink is. dat [.....] dik getempert is. dar vombe si wi vons seluer sculdig te bogene. ter guodertirenheit. als die sake bouen reden gedain is. Engene sake en vuoget so wel den groten here als guodertirenheit Iet regt van guoden heren dat is. dat man den luden wel behagen sal Jnde dat man gudertiren si. Jnde dat man versma die lelikheit die man vome duot. Jnde dat man nit en scelde . Jnde dat man sinen toren nit en volge. Want dat is manire van wiuen. Die bihen die sin fel inde vegten gerne Jnde laten vor angen in die wonde die si steken. Mar vor kuoninc dien si heben die en heuet en gene ange. Jnde die nature heuet so geseet. dat die kuoninc suonder wapen sal wesen. | |
[pagina 105]
| |
Jnde dat is en groit exempel. den kuoningen inde den groten heren. Want als viele als vor toren mer scaden mag dan di toren van den kuoninc. van den bihen So is sculdig huor sin inde huor muot. bet getempert wesen dan ander luden Die giene misduot. die waint dat sins heren magt gait. dar sin here nit en heuet. Guodertirenheit duot den kuoninc mit gemake leuen. Jnde duot. dat hi wandelen mag ouer al. Die vaste buorg inde die beste die en here heben mag. dat is dat hie gemint si van sinen magen Jnde van sinen mannen. Iet en is gene so guode sake den here. als dat dat al die lude sin lang lif begeren. Misduot man enen groten here. hie is sculdig magt te hebene ouer sinen muot. Jnde te temperne die pine van den gienen die vome misdan heuet. tuot den male. dat hi wieder tuome seluer kuomen is. Jnde | is sculdig | |
[pagina 106]
| |
ligteliker te vergeuene. dat man vome misduot. dan dat man anderen luden misduot. Want also als die giene. die van ander luode guode eweg geuen die en sin nit milde nog houesg. Mar die dat huore eweg geuen. die sin houesg. Also so en is nit guodertiren die ander lude misdait vergeuet. Mar die vergeuet dat man vome misduot die is guodertiren. Die pine die man sinen vrinden duot. die duonkt viele merre dan en andere Iet is also lelike sake enen here dat hi viele pinen inde viele martilien duot den gienen die vordelt sin ter doit. alst is den arseteren die sinen sieken viele wonden maket Man hort inde duot viele lieuer des giens wille die gudertirenlik gebudet. Want die nature is dicke wiederwerdig. Mar als manse guodertirenlik leid so volgt si gerne Iet is regte verwotheit van den minsche. als hie vome verblidet van ander mans bluotsturten Jnde van ander mans vongeval. Jnde die dat duot die lait minsglik nature. Jnde niemet die nature van den wilden diren | |
[pagina 107]
| |
Iet is viele betere dat man sinen here torne mit wair sechene. dan dat man huome wel behage mit smekene Uonder ander quaitheit so ist ene grote quaitheit. als man genen dank en wet van den guode dat man gedain heuet. Ine wet wilk sake leliker is of te missakene dat man gelouet heuet. of wider tescene dat man gegeuen heuet Wi vinden viele lude die en genen dank en witen. van den guode dat man huome gieuet. Jnde dat is dicke vons egen scoit. Want wit vome dicke verwiten vuor ofte na. Ak en wet mans genen dank. als man gieuet houardelik. Jnde gelik of man dar nit vombe en gaue. Jnde ak als man druomb tornt als mant gieuet. of dat man so lange dar vombe gebeden heuet dat mant gieuet duor vrinde wille. Want wieso aldus gieuet. of lange merret mit sinre gigte. die heuet dicke inder gedagte gewest dat hie nit geuen en solde | |
[pagina 108]
| |
Man vint bi naturen. dat man die misdait inde die quatheit hoge trekt dan die duogt. Jnde meer af sprekt. Jnde nogtan sieman dicker die duogt. Mar die quatheit gedink man langer Die giene verlist sine duogt inde sine gigte die se gieuet dar hi waint dat si hastelik verloren sal wesen Iet en is en gen so hart herte nog so vergeten. is dat man vome dicke gieuet man krige sine vrinscap dar miede. Man is sculdig te leerne den gienen die gerne niemet gerne te geuene. Jnde man sal nit geliken al ene den gienen die dat vor eweg geuen Mar man salse verwinnen mit gigte inde mit houisgheide Die gigte die man gieuet die en is so viele nit te prisene als die guode wille is. van den gienen diese gieuet. Want die guode wille makt die clene gigte groit. Jnde die quade wille makt die grote gigte clene. Jnde weet ak dat | |
[pagina 109]
| |
viele bequameliker is die clene gigte. die man ligtelik inde gerne gieuet dan is die grote gigte die man swarlike inde node gieuet Die prouinde en is gens danks wert die lange merret in des giens hant diese gieuet Die gigte is man sculdig sere te prisene die man hastelik gieuet. Jnde dar en gene trechinge ane en is. van den gienen diese gieuet En gene sake en cost so duore den scamelik minsche. als die | sake die hie verdint mit biddene. En gene sake en is so swar. so wieder te biddene die sake die man te vuoren georloft heuet Al guodertirenheit die hast. dat ist regt van den gienen die die sake gerne duot dat hiese hastelik duo Als man gieuet man sal mer siin. vops giens vruome den man gieuet. dan | |
[pagina 110]
| |
vop sinen wille. Want die gigte die man duot vomb quaden. wille te volbringene. die en sin nit te prisene. Jnde die en sal man nit geuen. Iet sin suome lude die dank sechen van der duogt die man huome duot. hemelik en des en sal man nit duon. Want iet war als guot dat man der houisgheide missakte. Mar man salse dancken openbare Engene sake en genuogt den dollen verwainden. Want si wanen altos mer verdint heben dan man huome gieuet Iet en is geen so clene gigte die houisg is inde guot. hiene make die gigte groit. nog gene so grote gigte die quait is hiene makse klene. Die wel sine prouinde gieuet die duot almuossen. Jnde | die giene die dar gigte af waint heben die is en wokerer. Iet is en lelik scade als man qualik te staden gieuet. Want iet ware beter dat man die sake niene hadde gehait. dan dat manse qualike gieuet | |
[pagina 111]
| |
Iet is beter dat man den quaden hilpt. vomb den guoden. dan dat man den guoden deert vomb den quaden Wat die wise man sprikt. dat sal sin vaste inde gestade. Jnde dat en sal man nit begripen of hie tegens dat. dat die sake wandelt. dat hie ak sinen rait wandelt Iet sin suome luode als man huome ene sake sindet. dat si tehans ene sake wieder sinden. dat en sal man nit duon. Want dan is anders nit dan gewesselt Die giene die guot heuet die is egen des guots. Want hie hoit inde huot als die egen man duot. sinen here. Mar als hiit eweg heuet gegeuen. so is hiis alr irst here. Want hiene huodets niemer als eigen. Iet is grote quatheit dat man die gigte niene prist. vmb dat. dat die man dar af nit en armt diese gieuet Die werelt en satte nieman in so grote herscap. hine muot enen guoden vrint heben die vome hilpt dat hi stainde bliuet | |
[pagina 112]
| |
Die arbeit die vuot den minsche Jnde dan is nit mans dait. dat man vontsiiet den sweet Iet is en grot del van duogden. als die minsche wil guot werden. Sig dat dine werke inde dine worde al eens sin. Jnde dat si alle sin geslagen in ene vorme Want des minschen herte en is nit geregt als sine dait sinen worden niene volgen. Man sal gereiden in sir iuogt. dat man vfenen sal in sin odere. Des gins sin inde sin muot. is gestadig inde gemakelik die | vome en geen tit en verwandelt Mar hie is altos in enen puonte. is dat | vome richeit inde herscap tuo gait. is dat si vome vontgait. Die doit die wi vontsiin die en bederft die sile nit al. Mar si maktse nie. Want wi leuen sunder ende na der doit. Die alle sine saken vonder vome duon wille hi sal vome setten vonder | |
[pagina 113]
| |
reden. want is dat di reden berigt. du sols van manigen minsche berigt wesen. Jnde si sal di ak wisen wat du begripen sols inde | in wilker maniren. Iet is ene harde lelike sake als die minsche vom seluer nit leiden en kan. Mar dat manne leiden muot Die worde die sin harde guot. die altos wassen ins minschen sinne. Jnde man heuet ak nit te duone viele worde. Mar worde die bederflik sin Die nature van den edelen sinne is suolik dat hie pinsen sal erlike sake. inde groit. Jnde die duoget sal hi merren Als die minsche verhart is in sir quatheit. so en is dar gen wieder keren an Die rede die man seget in alte kuorten worden die is dicke qualik \ verstain Die rede die waragtig is die sal guodertiren wesen inde openbare Gelik dat gestade ganc vuoget wel den vruoden man. so vuogen ak gestade | |
[pagina 114]
| |
worde inde vor gepinst. Jnde dar vombe leert die wise man dat man trag si in sprekene. God heuet vons gegeuen ene siele in vons Jnde die is huder van der duget inde van der quatheit die wi duon. Jnde in sulker maniren als wise hoiden so hoit si vons. Dustu saken die erliken sin. die en darf dar nit vombe wesen. oft al die lude wieten. Jnde duos du ak saken die vonerliken sin. huod di dat nieman en wiete. Jnde mindere ak dine misdat nit vomb dat. dat nieman en weet dan du Want hi is harde duol die versmait dat orkunde van sinre conscientien Leue in sulker maniren mit den gienen die quade di sin. als du wilt \ dat si mit di leuen Inde als dicke als du pins wat magte du bouen huom heues. so pinse dat got viele merre magt bouen di heuet. Die giene is regte dwas die en part kopen wil. inde besiet den bredel inde den sadel. Jnde nit de sceppenis van den parde. inde sine sieden. also is die giene en dwas die den minsche priset vomb sine cledere inde vomb | |
[pagina 115]
| |
sin gelait Jnde nit vomb sine vruotscap. Minne inde vruotscap makt alle dink gemene. dar vombe die guoden vrint heuet hie sal vome al sin dink maken gemene Wi sin sculdig te vline die quaitheit. Want si en heben in huom nog ende nog manire. Dune bis nit sculdig te verblidene. vomb den lof van den gienen den du nit louen en muoges. dat sin die giene die des loues nit wert en sin. Lof duot gerne minnen den gienen den man louet. Den gienen den dromt die en sal dar nit vop pinsen Dat is dait van groten meisteren dat hie al begript in klenen saken. En gene ruste en is guot si en si mit reden gedain Engene sake en wandelt de muot van den wise manne. nog gene | |
[pagina 116]
| |
blitscap en beneemt huome sine pinsinge. Wi en sin en geen tit in enen puonte. Want wi en sin huden nit dat wi gisteren waren. Want alle dink dat leuet. dat lopt inde lwliet . Jnde nogtan begere wi die sake die in diese werelt sin gelik of si altos duren solden. Jnde wi altois leuen. Die sake die meest benempt hogen luden. vruotscap. dat is | dat si wis wanen wesen. Jnde in dien behagen si von seluer. Jnde en willen nieman gelouen. Jnde dat is die ouerste dwasheit. Al die lude willen heben blitscap inde en wieten war vombe. Jnde die wis is die en is gen tit suonder blitscap. Want hiene wandelt | sinen muot nit. vomb en gene sake die vome tuo kuomet. Jnde hie vorsiit wisliken sine saken. Jnde al blitscap kuompt van duogden. En clene busg so genuogt viel diren. Jnde en clene weide vuot wel enen | |
[pagina 117]
| |
osse. Mar die minsche wuort gevuot van der erden. Jnde | van der see, inde van der luogt. nogtan en genuogt vome nit Al die wile dat man iunc is so is man sculdig te leerne weil te leuene. Jnde als man oit is wel te steruene. Man mag versmain al dat in die werelt is. Mar man mag nit heben al dat drinne is. Jnde dar vombe die kuortste weg rike te wesene die enig is. dat is dat man richeit versma Verlis du dinen vrint din ogen en sulen nit droge sin. Nog duone sols ak nit altos screien. Mar wi sin sculdig dat die gedinchenisse van vonsen vrient. den wi verloren heben dat si vons sin spil inde blitscap. Jnde wi ak sins gedinchen. Want die enen guoden vrient heuet. hie wet wel dat hie vome altos nit duren en mag. Jnde iet si dat \ ak dat die giene die sinen vrint screiet. hie waint dat ander luode wanen. dat hiene nit en minde. Jnde dar vombe wil hie togen mit sinen tranen. dat hiene minde. Jnde dat en sal man nit duon | |
[pagina 118]
| |
In groit man gait wel vter enen clenen huse. Jnde en groit sin is wel in enen clenen ligame. inde in enen leliken. dar vombe en is die grote man die quader nit. dat hie vter enen clenen huse gait. Jnde die grote sin die gait vter den klenen ligame. den en sal man nit versmain. vomb den klenen ligame dar hie inne is. Want die ligame die niemt sin ere van den guoden sinne Alle duget is in maniren te hebbene. Want gene duget en dog sunder manire Al ere inde alle houisgheit die is willig, Jnde is si nit willig so is si mit kragte gedain Jnde dan heuet geen ere nog gene houisgheit Iet is meerre vruotscap van den guode dat lanshem tuo | kuompt. dar vombe te sorgene Jnde dat te gewinnene. dan is die sake te punte te settene. die te winsche kuompt. Jnde dar vombe en is gen so guot guot. als guot dat | |
[pagina 119]
| |
lanshem tuo kuompt. Jnde dat gewonnen is mit cragte Jnde mit vegtene tegens auenture Man sal die tormente niet begeren. Jnde is dat manse gedogt. so sal manse gedogen mit starken herten. Iet is en dwaislik begerte dat man begeert ledig te wesene Die giene is duol die nit en agt vop die sake die hie vor huome siit Jnde die el nit en begeert dan tuonderuindene ander lude rait. Jnde huor hemelikheit Iet is ene manire van houerde dat man is altebedekt Jnde dat | man vome vontuirt van den luden Man is nit sculdig sin ledigheit te dorheit te kirne Jnde te duone dat die lude van huome spreken. Mar die minsche is sculdig tegen | vom seluer te sprekene. Jnde vorsiin in huome seluer wat guot gedain is. Jnde dat te duone. En gelik van wandelbaren sinne is dat. dat man lange nit gemerren en | |
[pagina 120]
| |
mag vop enre stat Jnde dar vombe die sinen sin. in enen wesene hoiden wille. die sal alr irst sin ligame hoiden in enen wesene. Gedinghenis van voren ende. sone mag nit tit kuomen. den | gienen die en geen ende en maken van vorre girigheit Nieman en is vonsalig anders dan bi vome seluer Die rede dar wi sunde vomb duon. dat is dar vombe dat wi lange wanen leuen. Want pinsde wi vomb die doit. wi soiden vons huoden van suonden Die giene en is nit so guot. die guot is mit guoden luden. als die giene die guot is vonder al den luoden Iet is regt dat al die tit vonse si Jnde dat wier nit verliesen. Jnde dan muoge wi nit duon. en si dat wi mit vons seluer sin. so. dat vons nieman en hindere Die girigheit van maniegen minsche die en is nit an enre saken. Want | |
[pagina 121]
| |
heuet die auenture enen minsche gegeuen guot. vome en genuogt niet. Mar hie siit te hants vomb en andere. regte als die huont duot, den man en stuk vlesg wuorpt. Jnde hie vome hast dat hiet in slint Jnde te hants lopt hie vom en ander. Mar dat en duot die wise man nit. Mar vome genuogt mit dien dat hie heuet. Jnde kuompt vome en beter dat niemet hie Huod di van nide. Want die nidege en heuet so grote blitscap nit. van den vongeual van viele luden. als hie groten rowe heuet van den vuordel van enen manne En is gen wonder dat en minsche begert te gode kuomen. Want got kuompt ten minsche. Jnde en is gene guode pinsinge. si en si | van gode of mit gode. Iet scient wale dat dit guot hir nieder geen guot en is. Want got en duot dar nit miede. nog hi en agt vop geen richeit. nog vop geen sirheide. Mar tregte guot dat is mit huome. nogtan beger wi meer dat guot hir benieden dan tguot van hir bouen. Mar dat duot dat wis nit gesmakt en heben. | |
[pagina 122]
| |
Die wise man en torn vome nit vomb doit van sinen kinderen. nog van sinen vrinden. Want als vruodelik gedogt hi vren doit. als hi der sinre beidet. Dine rede en sal nit sin bequamelik mer bederflik Die meste dorheit die enig is. dat is dat man nit leren en wil. des man niene weet. Want als lange als man leuet so is man sculdig te leerne war bi dat man leuen mag. Iet is ene harde guode sake dat en minsche reden in huome heuet. Want in dien is hie bouen anderen diren inde volget gode Minne inde torn inde girigheit die duon dat man den angst nit vontsiit Wils du guot wesen so gedog gudertirenlik al dat gescien mag Wi sin bina alle in den gedagte. dat wi den minsche niene ordelen tegens dat hi is. mar na sinen clederen inde na sinen gelate. Jnde | |
[pagina 123]
| |
dar vombe wil du den minsche te regte ordelen . so pins dat hie al nakt si. inde dat hi nit en heuet. Jnde dan besig sinen sin. inde sine sieden. inde dan alr irst so mag tuone kinnen. Die slag die en noset so sere nit. den gienen die en siit kuomen. als den gienen die vome dar vuore nit en huot. sone duon die saken. die geuallen den gienen die dar vop gepinst heuet. als den gienen die dar vop nit en agt Duo en wets nit wat en vrint wert is en si dat du wets wo viele du den gienen gieues den du dine vrintscap gieues. Want du gieues vome ene sake die vaste is inde gestade ter werelt. Jnde die meer gebrikt dar manse meest waint heben. Iet is dorheit dat man vontsiit die sake die man nit scuowen en mag. Iet duot guot steruen. Want man leuet altois na der doit sunder angst te hebene van steruen Iet is groit lof den minsche als hie den quaden qualik behaget | |
[pagina 124]
| |
Is dine pine clene so hebe ligte verdoldigheit Jnde is si groit so sols duos heben groten loin inde grote blitscap Bistu arm armuode en is di nit swar duone makse seluer swar. Want si is ligt inde blide. inde want nieman en heuet er nit Duo siis dat viele lude enen man volgen als duon die vligen den huoniege. Jnde die wolf den ase. also duon viele lude. die volgen manigen manne vomb sin guot Deues du din gelt verloren. du gais alse viele te ligter agter wege Jnde du bist ak te siekerre in der herbergen. Jnde also ist bie manieger saken dat en man waint dat vome quait is dat is sin geluok Heues du din guot verloren du heits di seluer vonsalig Jnde screies dar vombe be wilen dat is bi dinre dwasheit. en ander tit so si de vruodere. Want scade castiet den minsche Is dat di misvalt van dinen ogen en clagt nit te sere. Want die ogen sin | |
[pagina 125]
| |
geleren van der suonden. Die en is nit wis die screit den doit van sterfliken saken. | Want alle dinc muot wieder tuot sinre naturen. Uersuke dinen vrint in erliken saken. Jnde in duogden Jnde ak ter noit. inde nit ter tafelen. Want dar sait duor gnuog heben. Alle saken verliesen vore kragt mit vfeningen die man dicke dar tegen duot. Als girigheit is ins heren herte so is tregt in groten angste Dar vombe en sin die saken te dilder nit in vorre naturen | dat si scaden den gienen die dar qualik mit vfent Under ander geregtigheit die nature heuet so is die ouerste. dat si vons allen makt gelik ten ende. dat is ter doit Want nieman vontgaits Die cragt die die minsche heuet in huome die kuomet van guoden sinne. Jnde | |
[pagina 126]
| |
van vorsinigheide. die die minsche duot in naturliken werke Iet is ene clene sake van des minsche leuene. Jnde iet is en groit dink sin leuen te versmain. Jnde die giene die duot die is sieker van allen angste. Want huome en ruokt waner hie stiruet. Jnde dar vombe die sieker wil wesen die sal altos gereit wesen Die doit die ist tregt van naturen. Jnde tol van allen sterfliken saken. Jnde geneser van allen vongeluk. Alle die giene begerense | die wel leuen Uersma den doit. so sait du versmain al dat tuot der doit kuomet. ist volwig. ist angst van der see. Want alle dies saken en muogen anders nit duon. Mar sceden den ligame van der sielen. Jnde en is gene sake die dat benemen mag nog en geen gelukke. Jnde du bist verwuot en vontsiis du den doit nit mer alst duonrit. Jnde du wains leuen alst nit en duonrit. Want man muot vommer steruen als god wil | |
[pagina 127]
| |
In den minsliker saken duuerste die enig is dat is dat die minsche sinen muot inde sin herte sette bouen alle dregen. Jnde bouen al dat dauenture duon mag. Jnde wat so gesciit dat mant williken drage. gelik of mant wille dat also gesciede. Want man is sculdig te wilne al dat god vorsiin heuet En die ouerste sake van der werelt so is. dat die minsche stoten muot heuet inde stark tegens sine wiedersaken. Jnde tegens vonsuuerheide. Jnde dat hie nit en begere angst te hebene. Jnde dat hie en geen angst en hebe quaitheit wieder te stane. Jnde die ak maken kan sin gelukke. inde nit beiden Wan er dat iet kuomet. Jnde man sal ak nit vontsiin wat gesciit ist guot ist quait Iet is en stark dink duget te vindene. inde man muotse leren inde meister dar tuo heben. Mar die quaitheit leer wi bi vons seluer Vonsuuerheit die versmait die sake die man dicke gedain heuet. Jnde | |
[pagina 128]
| |
pinset alle dage. nihe sake. inde nihe scalkheit. inde nihe manire van suonden. En genuogt den minsche nit dat hie en vrait is mit den tanden. inde mit den munde. inde mit den buke. Mar hie is en vrait mit den ogen mit der girigheide Die geene die nit gedogen en kuonnen al ene. die begeren die geselscap van den luden Mar die giene die vruot is die vontbertse wel Want hie heuet blitscap in huome seluer Jnde also geualt dicke dat wi vons seluer pinen te minnen of vons seluer te wairne Iet valt selden dat wi al ene sin. Want wi vonsteken vonse | herte inde vonsen muot mit houerde. of mit girigheide. inde die vonsaligste sake die ienig is. so is dat wi en geen dit in vons seluer en sin Huod di dat du nit sere en volges den smekeren. Want si sin werklude | |
[pagina 129]
| |
die anders nit en pinsen dan wo si muogen bedriegen die | giene die bouen huome sin, inde in dien so dienen si mit smekene. inde mit | valgscer bedechtheit inde gebaren dicke of si dwase waren. inde si nit en cuonsten Saken dar man vmobe verbliden sal. dat is. dat man wieder kiere tuot der oder lude dait. Jnde dat man besie. dat man sin leuen betere. Engene sake is quader des minschen sinne dan vonkuosgheit | van wiuen. Want die behindigheit. van den iunchen minsche. wuort vol van den quaden sinne. nog hiene pient huome vomb en gene erlike sake. inde seet alle sinen sin in idel saken Wine die heben vonstade ansigt. sin gerne dol. inde huor muot is vonstade dar gebrikt nit ane mar besuken Die iunche minsche vonsuouer die duot suonde mar die ode die duot verwuotheit Dri saken die haiet got. dat is die iunge trage. inde den riken vreken. Jnde den oden vonsuouer | |
[pagina 130]
| |
Die guode vrowe is sculdig vor ogen nieder te dragen tegens die erde. inde si en is nit sculdig wekelik tantwerdene. den gienen die si | anesprekt. nog altesere te scamene. Mar si sal en deel grauelik antwerden. | also dat die giene die tegen vor sprekt en geen quait dar ane merken en mag. Jnde bit man vor vomb dwasheit. si is sculdig vterlik tuontsechene. Want man biddet node den gienen die gerne vontsegt. Deginsel van den sunden van den wiuen dat is girigheit Iet is ene wreder sake altois den doit tuontsiene. dan te | steruene Die giene is sculdig den scade te hebene van der saken. dar hi den vrom af heuet gehait Man heuet meerre begerte te kinnene inde te wietene. dat | man nit en heuet gewieten. dan dies te gedinchene dat man weet | |
[pagina 131]
| |
Iet is ene swar sake dat man nit en mag screien. inde noit en heuet genen ewe. Want noit duot koplude varen vp die see. Jnde dwinchet die dollen mit vren guode. inde mit vren husen die man dar nieder wuorpt. Jnde aldus mag man wel siin. dat noit duot duon viele saken. Nieman en sal ligtelik gelouen die sake die vome dar na rowen mag Iet guot gelukke dat hastelik kuomet. dan heuet gene blitscap Die auenture spilt mit huorre gigte. Want si niemet den minsche dat si vome gegeuen heuet. Jnde gieuet vome bewilen dat si vome genuomen heuet En geen orkuonde en is so waragtig. so dat orkunde van den | kinderen. Want huor sin en heuet von niet gegeuen. dat si liegen kuonnen Iet is kinsheit als die minsche sinen sin inde sinen muot. niet bedwinchen en can als viele als du meer muoges. als viele sols du meer gedogen. | |
[pagina 132]
| |
Iet sware geboit en duot man niet geerne mar dat ligt is dat duot man geerne Die niene verbiet die quaitheit als hiet vermag. dat | scint dat hiese wilde. Iet is ene ligte sake en deel vernois te dogene. Mar iet is harde swar lange te dogene. Du en sols niet begeren dat kuonincrike dat vergangelik is. | Want die kuonincrike inde die dure cledere nog die grote huse mit goide gesirt. die en maken den kuoninc niet mar die giene is kuoninc die die quaitheit vontsiit. Jnde die kint dat lof van den luden Jnde die vome niene wandelt vomb en gene sake. inde die ak is in guden dinchen inde in | siekeren. inde pinst inde vorsiit alle dinc in vome seluer. Du salt des sieker sin dat dat grote gelait. Jnde dat fire gelait bevalt wel den valschen luden. Seneca die seide als lange als hie was in groter herscap. so vontsag hi vome. | |
[pagina 133]
| |
Jnde vome duogte dat altois en yseren ware gereit tuot sinre siden te stekene. Jnde dar vombe iest guot guodertiren wesen. tegens al die lude so mag man sieker wesen. Jnde iet is ak betere dat man tenre klenre tafelen guode spise eit Jnde die wel bereid. dan is tenre groter tafelen spise tetiene. die qualik bereid is inde mit angst tetiene. Jnde also. so geuallet dicke dat dat gelukke dat den man arm heldet beter is dan dat gelukke dat den man hasteliken rike makt Iet noist den man meer die angst den hie heuet van den vegten dant vegten duot En is geen so grote cragt so guodertirenheit. want si verwinnet alle sake Oinne die verait is. die hait gerne dat si gemint heuet Die giene en is geen tit vonsalig die vome nit vontsiit der doit. Die giene begert alte sere te leuene die nit steruen en wil. als hie siit dat die | |
[pagina 134]
| |
werelt tegait. inde hie ak Man mint dat man nit minnen en soide dat is dat en man al sinen wille duon mag Jnde als hiet duon mag. so duot hie dicke ouer reden. Jnde dar vombe so makt die auenture dicke den man teniete Die dolle man gelouet gerne dat hi begert. Die angst den man heuet van pinen te dogene duot dicke wel gelouen. En geen dinc en is swair den gienen die pinsen inde vorsiin. die blitscap van hemelrike. Iet is ene grote duogt. dat man vontsie dat al die lude sculdig sin tuontsiene Nieman en mag lange duoren die vome seluer seit in allen angst. Want vontgait hie vop sulke wile hie wuort te lest gerakt Als lange als die minsche pinset vomb die wereltlike sake. | sone mag hie nit ligtelik pinsen vomb die geistelik sake | |
[pagina 135]
| |
Wwo vonsalig dat die man is. dog is hie sculdig | te pinsene dat hie en man is Iet is ene suote sake inde ene huogelik. als die minsche pinset vomb sin gebrekenis. Die regte minne die kuompt altois wieder inde en merret nit Iet is ene harde grote swairnis. grote herscap mit scanden te hodene Die gemint wil wesen. die sal wesen milde inde houisg tegens den armen Duo sols versmain den lof van den luden Want si luttel der wairheide volgen Wagte dat dine worde vaste inde gestade sin. Want die blodeliken biddet die leert vontseggen Iet is ene dolle hope. dat man gelouet dat nit te gelouen is. Sconheit is ene sake. die nit lange en duort. inde die hastelik vergait. Iet is ene harde guode sake omuot. Jnde ene harde quade houerde. Want | |
[pagina 136]
| |
houerde wuort dicke geuelt mit ander houerde. Mar omuot en heuet des geen angst. regte also als man siit. dat die dunre lieuer veld vop die hoge huos. dan vop die klene. dat hoge huos vome narre sin. so en lait die ene houerdiege den anderen bi huome nit. Di noit. inde dat duos te duone heues. die duon di begeren die sake. die du behuoues. Iet en is nit guot dat man die quaitheit nit en kan. nog dat manre nit en kint. vomb dat. dat manre debait vuor huden mag Als ene manne dunket, dat die arsedie lelik is. sone geruokt vome nit te genese. also iest. als die vonlede enen man tuo kuompt. Jnde si den man nit wel en behaget. sone wil hiere nit wieten. Iet vertrechen van den pinen. makt die lude sieker Wil tu ieneger hande dink duon. so duose hastelik. inde | suonder viele worde. Want regtigheit haiet beiden. inde traigheit | |
[pagina 137]
| |
Pinse vomb dins selues sake. al die lude beiden dar na dat duot seluer duos Min die seluer. Want ander mans minne. sal di luttel en staden stain. is dat du di seluer nine mins Die sake die man nit dicke duon en mag die duot man ouer lang Die pine die is viele ligtere als manse maten mag mit rade Wils du di huden van mistruwen. so huod di van viel sprekene Altois duot man die quaitheit. mit bedecter quaitheit Waragtigheit inde trowe die en kuompt en geen tit binnen der heren duorpel. Want si is verkogt in verwonnen vomb penninge. Hie is harde vonsalig die giene. die vome seluer nit berigten en kan. als ter doit kuompt. dat sin die giene die nit steruen en kuonnen. | |
[pagina 138]
| |
Die giene die is alte wret. die den anderen kastien wil mit der doit. Want die giene sal ligtelik vergeuen. die te duone heuet dat man vome vergeue Duogt is ene sake die vons mag geuen ewelik leuen. inde die vons mag duon. geliken gode Du salt di seluer besiin. inde vergaderen die tiit. die man die genuomen heuet. inde vonttrekt. of die lieden is. Want die lelicste ruom die ienig is. dat is van idelheide. Jnde weet dat. nieman en mag gene sake prisen. tegens die tiit. nog geprisen en kan enen dag. Jnde wi en pinsen nit dat wi steruen alle dage. Jnde in dien sin wi bedrogen. dat wi nit | en siin vop die doit. Want en groit deel van der doit is nuo gelieden. Jnde al dat gelieden is van vonsen iaren. dat heuet die doit gewonnen tuot vren dele. Jnde in diin dat man sin leuen lingt so vliit die doit. Alle saken sin vons vremede suonder die tiit al ene. mar die is vonse Jnde | |
[pagina 139]
| |
in die hebenisse van dieser saken. die krank is inde vergangelik dar heuet vons nature in gesait. Geloues du den quaden manne iet. sig dat duot vome geues. nit vombe gigte. Mar vomb dine geloffenisse te quitene. Die wise man duot alle sine saken wislik inde is dat hie ak misduot. hi en is nit wis in. diin. dat hi misduot. |
|