Nieuwe Testament (Zuidnederlandse vertaling)

III

In dien daghen quam Jan Baptiste predekende in de woestine van Judea ende segghende: Doet penitentie, want dat rike der hemele sal neken. Want dese es, van dien gheseghet es overmids Ysayam den prophete, segghende: Stemme des roependes in der woestinen, bereidet den wech ons Heren, maect rechte sine pade.

Ende hi, Jan, hadde een cleet van haren der kemele ende een vellen gurdel omtrent sine lendenen, ende sine spise was spelthanen ende honech der wildernessen. Doe ghinc ute te hem Iherusalem ende al Judea ende alt conincrike omtrent de Jordane ende worden gedoept van hem in de Jordane, beliende hare sonden. Ende siende vele der Phariseense ende der Saduceen

[fol. 22r]

comende te sinen doepsele, seide hi hen: Gheslechten der slanghen, wie hevet u ghewiset te vliene vander toecomender erscap? Daeromme doet werdeghe vrocht der penitentien, ende en wilt niet segghen binnen u: Wi hebben enen vader Abraham, want ic segghe u want God es mechtech van desen stenen te weckene Abrahams sonen. Want stappans es gheset de aecs ter wortelen sboems. Daeromme elc boem die niet goede vrocht en maect, sal werden ute ghesneden ende sal werden gesendet int vier. Seker ic doepe u in watere in penitentien, maer die na mi comende es, hi es starkere dan ic, wies ghescoeyten ic niet werdech en ben te draghene. Hi sal u doepen in den heileghen gheest ende in den viere. Wies waeyere in siere hant, ende hi sal dore suveren sinen vloer ende hi sal gaderen sine taruwe in sine scure, maer de palien sal hi verberren met onblusscheleken viere.

Doe quam Ihesus van Galylea in de Jordane te Janne, op dat hi ghedoept soude werden van hem. Ende Jan verboet hem, segghende: Ic ben sculdech ghedoept te werdene van di, ende du coms te mi? Ende Ihesus seide

[fol. 22v]

hem antwerdende: Ghedoeghet mi, want aldus behoeret te vervullene alle gherechtecheit. Doe liet hi hem. Ende Ihesus ghedoept ghinc haesteleke op vanden watere. Ende siet, de hemele sijn ontploken, ende hi sach den geest Gods nedercomende alse ene duve ende op hem comende. Ende siet, de stemme vanden hemelen segghende: Dit es mijn gheminde sone, in wien ic mi behaghede.