Nieuwe Testament (Zuidnederlandse vertaling)

XVIII

In die ure quamen de jongheren te Ihesum, segghende: Wie es meerre, waendi, in den rike der hemele? Ende Ihesus toeroepende een kindeken sette hijt in hare middelt ende seide: Amen segghe ic u, en waerdi niet bekeret ende werdet alse kinderkene, ghi en selt niet in gaen int rike der hemele. Daeromme so wie hem oetmoedechde alse dit kindeken, die es meer\re

[fol. 55r]

intrike der hemele. Ende die aldus gedaen een kindeken ontfinghe in minen name, hi ontfeet mi. Ende die een scandelizeerde van desen alre mensten cleinen, die in mi gheloeven, hem ware orboerlec dat ghehanghen worde in sinen halse eens esels bordenne ende dat hi verdronken worde in den gront der see.

Wee der werelt vanden scanden. Want het es noet, dat de scanden comen, nochtan wee dien mensche, overmids wien de scande comt.

Ende eest dat di dine hant ochte dijn voet scandelizeret, snidet af ende werpet van di. Di es goet in te gane ten levene cranc ochte houtende dan II hande ochte II voete hebbende ghesendet te werdene int eweghe vier. Ende eest dat di dine oghe scandelizeert, stectse ute ende werptse van di. Di es goet in tegane in dleven met ere oghen dan II oghen hebbende ghewoerpen werden int hilsche vier.

Siet, dat ghi niet en versmaedt een van desen cleinen. Want ic segghe u, want hare inghele sien altoes in den

[fol. 55v]

hemel dat anschijn dies vader, die in den hemelen es. Want smenschen sone quam behouden dat verdorven was.

Wat dunct u? Ochte iemens waren c scape ende een ute hen doelde, en soude hi niet laten de XCIX in de woestine ende gaen die soeken, die doelden? Ende ochte dat ghevalt, dat hijt vendet, amen segghe ic u, want hi sal meer verbliden op dat dan op de XCIX, die niet en doelden. Alsoe en eest de wille niet vore uwen vader, die in den hemelen es, dat een verderve van desen cleinen.

Ende eest dat dijn brueder sondeghet in di, gaet ende berespene tusschen di ende hem allene. Eeest dat hi di horet, so bestu wennende dinen brueder. Ende eest dat hi di niet en horet, nemt met di enen ochte II, op dat in den monde tweer ochte drier ghetughen sta alle woert. Ende eest dat hi hen niet en horet, segghet der kerken. Ende eest dat hi de kerke niet en horet, sal sal hi di

[fol. 56r]

sijn alse ethnicus ende een publicaen.

Amen segghe ic u, soe welke ghi te gadere bendet op der erden, si selen gebonden sijn ende in den hemelen, ende so welke ghi ontbendet op der erden, si selen ontbonden sijn ende in den hemel. Noch segghe ic u, want eest dat si II ute u concenteren op der erden, van elker dinc so wat si eyschen van minen vader, die in den hemelen es, het sal hen gheschien. Want waer sij II ochte si III vergadert sijn in minen name, daer benic in harre middelt.

Doe seide Peter, comende te hem: Here, hoe dicke sal mijn brueder sondeghen in mi ende ic saelt hem verlaten? Tote sevenwerven? Ihesus seide hem: Icken segghe di niet tote sevenwerven, maer tote tseventechwerven seven werven.

Daeromme es dat rike der hemele ghelijc ghemaect enen mensche, enen coninc, die redene setten woude sinen knechten. Ende alse

[fol. 56v]

hi began redene te settene, es hem bracht die sculdech was X^M talenta. Ende alse hi niet en hadde, waer af hijt gelden soude, hietene sijn here vercopen, ende sijn wijf ende de sonen ende alle dinc die hi hadde, ende ghelden. Ende die knecht neder vallende bat hem segghende: Hebbet verduldecheit in mi ende alle dinc salic di ghelden. Ende de here es ontfaermt dies knechtes ende lietene ende liet hem de scout. Ende die knecht ute ghegaen vant hi enen van sinen medeknechten, die hem sculdech was C denarios, ende houdende versmachte hi hem, segghende: Gheldet dattu sculdech best. Ende neder vallende sijn medeknecht bat hi hem, segghende: Hebbet verduldecheit in mi ende ic sal di alle dinc ghelden. Ende hi en woude, maer hi ghinc ende senddene in den kerkere tote dat hi de scout ghelden soude. Ende sine medeknechte siende de welke gheschieden, sijn si herde sere bedroevet ende quamen ende boetscaepten ha\ren

[fol. 57r]

here alle de welke gheschiet waren. Doe riep de here dien ende seide hem: Scalc knecht, ic verliet di alle scout, want du bades mi. Ende en moesti daer omme niet ontfaermen dijns medeknechts also ic dijns ontfaermt ben? Ende sijn here vererret leverde hem tortoribus, tote dien tide dat hi verghelden soude alle scout. Ende aldus sal u mijn hemelsche vader doen, eest dat ghi niet en verlaet ieghewelc sinen brueder van sinen herten.