Nieuwe Testament (Zuidnederlandse vertaling)

XXIV

Ende uteghegaen Ihesus vanden temple ghinc hi. Ende sine jongheren quamen, op datse hem wijsden de ghestichten dies tempels. Ende hi seide hen antwerdende: Siedi alle dese? Amen segghic u, hier en sal niet werden ghelaten de steen op den steen, die niet ghedestrueert en sal werden.

Ende hem sittende op den berch Oliveti quamen de jongheren heimeleke te hem, segghende: Segghet ons, wanneer selen dese gheschien ende wat sal teken sijn dijnre toecoemst ende der volbringhinghen der werelt?

[fol. 69v]

Ende Ihesus seide hen antwerdende: Siet, dat u niemen en verleide. Want het salre vele comen in minen name, segghende: Ic ben Christus, ende si selenre vele verleiden. Want ghi selt horende sijn stride ende opinien der stride. Siet, dat ghi niet gheturbeert en wert, want dese moeten ghescien, maer nochtan en es niet dat inde. Want dat volc sal op staen te gadere jeghen dat volc, ende dat rike in dat rike, ende het selen sijn plaghen ende honghere ende beroeringhen der erden dore de stade. Ende alle dese sijn beghenne dies rouwes. Dan selense u leveren in tribulacien ende selen u doden, ende ghi selt sijn in hate allen menschen overmids minen name. Ende dan salre vele werden ghescandelizeert ende si selen leveren onderlinghe ende si selen in hate hebben onderlinghe. Ende vele valsche propheten selen op staen ende selenre vele verleiden. Ende want de quaetheit overvloeyen sal, so sal vercouden de caritate veelre. Ende die volsteet tote in dinde, hi sal behouden sijn.

[fol. 70r]

Ende dat ewangelium dies rikes sal ghepredect werden in al de werelt in ghetughe allen menschen, ende dan sal comen de volbringhinghe.

Daeromme alse ghi siet de onmenschelecheit dies mestroests in de heileghe stat staende - diet leset hi verstaet - die gheseghet es van Daniele den prophete, die dan in Judea sijn, vlien ten berghen. Ende die in den dake es, hi en ga niet neder, wech te doene iet van sinen huus, ende die in den velde es, en kere niet weder, wech te doene sinen roc. Ende wee den drechteghen ende den voedenden in dien daghen. Ende bedet, dat uwe vlocht niet en werde in den wentere ochte in den sabbato. Want dan sal groete tribulatie sijn, hoe ghedane noeyt en was van beghenne der werelt tote nu noch sijn en sal. Ende en waren de daghe niet ghecortet, al vleesch en worde niet behouden, maer omme de ute vercoerne selen die daghe ghecortet werden. So wie u dan seghet: Siet, hier es Christus, ochte: Al daer, en willes niet gheloeven. Want het selen

[fol. 70v]

op staen valsche christi ende valsche propheten ende gheven grote tekene ende ghescienessen, alsoe datse in gheleidet werden in doellinghen, ware dat gheschien mochte, oec de utevercoerne. Siet, ic hebdt u voreseghet. Daeromme, eest datse u segghen: Siet, hi es in de woestine, en wilt niet utegaen, siet, in den steen roken, en willes niet gheloeven. Want alsoe de blixeme utegheet van orienten ende oppenbaret tote in occidenten, alsoe sal sijn de toecoemst dies menscen soens. Soe waer de lichame sal sijn, al daer selen vergadert werden de are.

Ende stappans na de tribulatie diere daghe sal de sonne werden verdonkert ende de mane en sal hare licht niet gheven ende de sterren selen vallen van den hemele ende de viertute der hemele selen werden beroeret. Ende dan sal oppenbaren dat teken smenschen soens in den hemel ende dan selen claghen alle gheslechten der erden ende si selen sien smenschen sone comende in de wolken dies hemels, met vele virtuten ende mo\ghentheiden.

[fol. 71r]

Ende hi sal senden sine inghele met eere bosinen ende met groter stemmen, ende si selen vergaderen sine utevercoerne van den IV wenden dies hemels, vanden hoechsten der hemele tote haren inden.

Vanden vighe boeme leret ene parabole: Alse sijn telch stappans weec es ende de lovere gheboren, dan wetti want de somer bi es, ende alsoe alse ghi alle dese siet, so wet want het es bi ende in den doren. Amen segghic u, want dese gheboerte en sal niet vergaen vore datse alle gheschien. De hemel ende de erde selen over liden, maer mine woerde en selen niet vergaen.

Ende van dien daghe ende uren en weet nieman, noch de inghele der hemele, dan allene de vader. Ende alsoet was in den daghen Noe, alsoe sal sijn de toecoemst smenschen soens. Want alsoe si waren in dien daghen vore de diluvie, etende ende drinkende, huwende ende te huweleke leverende, tote in dien dach in welken Noe in ghinc in de aerke, ende si en bekindens niet, tote dat de diluvie quam ende droechse alle, ende alsoe

[fol. 71v]

sal sijn de toecoemst smenschen soens. Dan selen sijn si II in den velde, de een sal werden ghenomen ende de ander sal werden ghelaten, in ene molen selen sijn malende si II, de ene sal werden ghenomen ende de andere sal werden ghelaten, twee in den bedde, de een wert ghenomen ende de ander wert ghelaten. Daer omme waect, want ghi en wet niet welke ure uwe Here comende sal sijn.

Ende wet dat: Want wiste de vader der familien welke ure de dief comende soude sijn, hi soude waken ende en soude niet laten dore graven sijn huus. Ende daeromme sijt ende ghi ghereet, want welke ure ghi niet en waent, es smenschen sone comende.

Wie es, waendi, een ghetrouwe knecht ende vroet, dien sijn here setten sal boven sine familie, op dat hi hen spise gheve in den tide? Salech es die knecht, dien sijn here venden sal alse hi comen sal aldus doende. Amen segghe ic u, want hi sal hem setten boven alle sine goede. Ende eest dat die quade

[fol. 72r]

knecht beghent te segghenne in siere herten: Mijn here maect merringhe te comene, ende beghent hi te slane sine medeknechte ende etet hi ende drenket metten dronkenen, de here dies knechts sal comen in welken daghe hi niet en hopet ende in welke ure hi niet en bekint, ende hi sal hem deilen ende hi sal sijn deel legghen metten ypocriten, daer weeninghe sal sijn ende ghecrisel der tande.