Nieuwe Testament (Zuidnederlandse vertaling)

XI

Ende alse hi naecte Iherusalem ende Bethanien ten berghe van Oliveten, sent hi II ute sinen jongheren ende seide hen: Gaet int casteel, dat jeghen u es, ende stappans ingaende seldi aldaer venden een jonc ghebonden, op welc noch nieman der menschen en sat; ontbendet ende bringhet dat. Ende sowie u iet seghet:

[fol. 110r]

Wat doedi? segghet want den Here ees noet, ende hi laettene stappans herwert. Ende wech gaende vonden si dat jonc, ghebonden buten vore de dore in de wegheschede, ende si ontbondenne. Ende selke vanden staenden aldaer seiden hen: Wat doedi, ontbendende dat jonc? Die seiden hen alsoe hen de Here Ihesus gheboden hadde, ende si lietenne hen. Ende si leidden dat jonc te Ihesum ende leiden op hem sine cledere ende hi sat op hem. Ende vele spreidden hare cledere in den wege ende andere sloeghen lovere vanden boemen ende stroeidense in den weghe. Ende die vore ghinghen ende die navolgheden, riepen segghende: Osanna, ghebenedijt die comt in den name ons Heren, ende ghebenedijt Davids rike ons vader, dat comt, Osanna inden hoechsten!

Ende hi ghinc in te Iherusalem inden tempel. Ende alse hise alle ommesien hadde ende het saen avontstonde soude sijn, ghinc hi ute in Bethanyen metten XII.

Ende alse si dies anders daghes ute ghinghen van Bethanyen, hongherde hem. Ende alse hi sach enen vigheboem van verren, lovere hebbende, quam hi

[fol. 110v]

, ochte hi bi avonturen iet vonde in hem. Ende alse hi te hem quam, en vant hi niet in hem dan allene lovere, want het en was niet tijt der vighen. Die seide hem: Saen en sal niemen voertmeer in ewecheit vrocht eten van di! Ende sine jongheren hoerdent.

Ende si quamen te Iherusalem.

Ende alse hi in ghinc in den tempel, began hi ute te werpene die vercochten ende cochten inden tempel, ende de tafelen der wisseleren ende hare setele die duven vercochten, keerde hi omme, ende hi en ghedoegede niet, dat iemen een vat droeghe dore den tempel; ende hi lerese segghende: En es dat niet ghescreven: Want mijn huus sal heten een huus der bedinghen? Ende ghi hebbet ghemaect een hol der morderen. Alse dat hoerden de princen der priesteren ende de scriben, sochtense hoe sine verliesen mochten, want si ontsaghenne, want al de scare verwonderde op sine leringhe. Ende alst avont was ghemaect, ghinc hi ute vander stat.

Ende alse si smaerghens leden, saghen si den vigheboem droeghe ghemaect van den wortelen. Ende Peter bedachte hem ende seide hem: Rab\bi,

[fol. 111r]

siet, de vigheboem, dien ghi vermalediet, es verdroeghet. Ende Ihesus seide hen antwerdende: Hebt Gods trouwe. Amen segghic u, want sowie seide desen berghe, dat hi hem op hieve ende worpe in de see, ende niet en twifelde in sijn herte, maer gheloevede, so wat hi seide, dat hem gheschien soude, het sal hem gheschien. Daeromme segge ic u, alle dinc so welke ghi eyschet bedende, gheloevet dat ghise ontfaen selt, ende si selen u toecomen. Ende alse ghi staet te biddene, ochte ghi yet hebbet jeghen iemene, verlatet, op dat uwe vader, die in den hemel es, u verlate uwe sonden. Eest dat ghi dat niet en verlaet, noch uwe vader, die in den hemel es, en sal u uwe sonden niet verlaten.

Ende si quamen anderwerf te Iherusalem. Ende alse hi wandelde in den tempel, ghinghen te hem de overste priesteren ende de scriben ende de oude ende seiden hem: In wat machte doedi dit ende wie hevet u dese macht ghegheven, dat ghi dit doet? Ende Ihesus seide hen antwerdende: Ende

[fol. 111v]

ic sal u een woert vraghen; antwerdt mi, ic sal u segghen, in wat machte ic dit doe. Antwerdt mi: Was Jans doepsele van den hemele ochte van den menschen? Ende si peisden te gadere segghende: Eest dat wi segghen: Vanden hemele, hi sal segghen: Waer omme en gheloevedi hem niet? Eest dat wi segghen: Vanden menschen, wi ontsien dat volc, want si hadden alle Janne alse enen ghewareghen prophete. Ende si seiden Ihesum antwerdende: Wi en weten. Ihesus seide hen antwerdende: Noch icken segghe u niet, in wat machte ic dit doe.