Nieuwe Testament (Zuidnederlandse vertaling)

XIII

Ende alse hi soude gaen uten temple, seide hem een van sinen jongheren: Meester, besiet hoe ghedane steenne ende hoegedane ghestichten! Ende hi seide hen antwerdende: Siestu alle dese groete ghestichten? Steen en wert niet ghelaten op steen, die niet en wert ghedestrueert.

Ende alse hi sat in den berch Oliveti jeghen den tempel, vrageden hem besondere Peter ende Jacop ende Jan ende Andries: Segghet ons, wanneer selen dese werden ende wat tekene sal sijn, alse alle dese selen beghennen vervult te werdene? Ende Ihesus began hen antwerdende te segghene: Siet, dat

[fol. 115r]

u nieman en verleide. Want vele selen comen in minen name, segghende: Want ic beent, ende si selenre vele verleiden. Ende alse ghi horen selt vechtinghen ende opinien van vechtinghen, en seldi u niet ontsien, want dit moet ghescien, maer nochtan stappans niet dat inde. Want het sal op staen volc op volc ende conincrike op conincrike. Ende het sal sijn beroeringhe der erden dore de stade ende honghere. Dit sijn beghenne der droefheide.

Ende besiet u selven, want si selen u leveren in den raden, ende ghi selt gheslaghen werden in den synagogen ende ghi selt staen vore coninghe ende rechteren omme mi, hen in ghetughe. Ende in allen lieden moet tierst werden ghepredect de ewangelie. Ende alse si u leiden leverende, en wilt niet vorepeisen wat ghi spreken selt, maer dat u in die ure ghegheven wert, dat seldi spreken, want ghi en sijt niet sprekende, maer de heileghe gheest. Ende de brueder sal leveren den brueder in de doot ende de vader den sone, ende de sonen selen op staen in de ghebarende ende selense doot begheren.

[fol. 115v]

Ende ghi selt sijn ghehaet van allen omme minen name. Ende die volsteet tote in dinde, hi sal sijn behouden.

Ende alse ghi siet onmenschelecheit van mestroeste staende, daer hi niet sculdech en es, diet leest hi verstaet, dan selen vlien die in Judea sijn in den berghe. Ende die boven dat dac es, en sal niet nedergaen in thuus noch hi en salre niet ingaen, op dat hi iet wech doe van sinen huus, ende die in den velde sal sijn, en sal niet wederkeren achterwert sijn cleet wech te doene. Maer wee den drechteghen ende den voedenden in dien daghen! Daeromme biddet, dat dese niet en gheschien in den wentere. Ende die daghe der tribulatien selen sijn soeghedaen, hoe ghedane niet en waren van beghenne diere creatueren, die God maecte, tote nu, noch werden en selen. Ende en hadde de Here de daghe niet ghecortet, al vleesch en ware niet behouden, maer om de vercoerne, die hi vercoes, cortte hi de daghe. Ende soewie u

dan seghet: Siet, hier es Christus, siet daer, en gheloeves niet. Want het selen opstaen pseudo Christi ende pseu\do

[fol. 116r]

propheten ende gheven tekene ende geschiennessen, te verleidene oec de vercoerne, eest dat ghescien mach. Daeromme besiet ghi. Siet, ic hebbe u alle dinc voreseghet.

Maer in dien daghen na die tribulatie sal de sonne verdonkert werden ende de mane en sal haren schijn niet gheven. Ende de sterren dies hemels selen sijn nedervallende ende de viertute, die inde hemele sijn, selen beruert werden. Ende dan selense sien smenschen sone, comende in de wolke dies hemels met groter viertuut ende glorien. Ende dan sal hi senden sine inghele ende sal vergaderen sine vercoerne vanden IV wenden, vanden oversten der erden toten oversten dies hemels.

Ende leret ene parabole vanden vigheboeme: Alse stappans sijn telch weec es ende sine loevere gheboren sijn, so bekindi, dat de somer es in dnaeste. Ende aldus, alse ghi selt sien dese dinc gheschien, so wet, dat in dnaeste es, in den doren. Amen segghic u, want dese gheboerte en sal niet vergaen vore dat alle dese gheschien. Hemel ende erde selen overliden, maer

[fol. 116v]

mine woerde en selen niet overliden Maer van dien daghe ochte der uren en weet nieman, noch de inghele in den hemel noch de sone, dan de vader.

Siet, waect ende bedet, want ghinc wet wanneer de tijt sijn sal. Want gelijc dat de mensche, die pelgrimage voer, sijn huus liet ende sinen knechten macht gaf elkes werkes, ende den dorewerdere gheboet hi, dat hi waken sal. Daeromme waect, want ghine wet, wanneer de here des huus comt, dies avonts ochte te middernachte ochte ten sanghe dies hanen ochte smaerghens, dat hi u niet slapende en vende, alse hi comt onversienleke. Ende dat ic u segghe, dat segghe ic hen allen: Waect!