Nieuwe Testament (Zuidnederlandse vertaling)

XVI

Ende alse de sabbatum overleden was, Maria Magdalene ende Maria Jacobi ende Salome cochten crude, op datse comende Ihesum souden salven. Ende herde vroch een der sabbatorum comense ten grave, op ghegaen stappans de sonne. Ende si seiden deen ter andere

[fol. 123v]

: Wie sal ons herwentelen den steen vander dore des graves? Ende besiende saghense den steen herwentelt, want hi was herde groet. Ende binnen gaende in den grave saghense enen jonghelinc sittende in de rechte side, ghecledet met ere blickender stolen, ende si vergruwelden. Die seide hen: En wilt u niet vereysen. Ghi soect Ihesum Nazarenum, den ghecruusten. Hi es op verstaen. Hine es hier niet, siet de stat, daer sine leiden. Maer gaet, segghet sinen jongheren ende Petre, want hi sal u voregaen in Galilea, daer seldine sien, alsoe hi u seide. Ende die utegaende vloen vanden grave, want hen hadde bevaen bevinghe ende ancst. Ende sine seiden niemene niet, want si vreseden hen.

Ende op staende Ihesus vroech prima sabbati oppenbaerde hi hem tierst Marien Magdalenen, van welkere hi utegheworpen hadde VII duvele. Die gaende boetscapet dien weennenden ende den screyenden, die met hem waren. Ende si horende dat hi

[fol. 124r]

levende ware ende van hare ghesien ware, en gheloeveden sijs niet.

Ende na desen es hi vertoent in ene andere ghedaente tween wandelenden ute hen, gaende in een doerp, ende gaende boedscaepten sijt den anderen. Ende dien en gheloefden sijs niet.

Ende techterst hen XI sitten etende openbaerde hen Ihesus, ende hi verweet hen de ongheloevecheit ende de hertheit harre herten, want die hem saghen opverstaen sijnde en gheloefden niet. Ende hi seide hen: In al de werelt gaende predect de ewangelie allen creaturen. Die gheloevet ende ghedoept sijn sal, hi sal sijn behouden, maer die niet en gheloevet, hi sal verdoemt werden. Ende hen, die gheloeven, selen volghen dese tekene: In minen name selense utewerpen de duvele, si selen spreken met nuwen tonghen, si selen wech doen de serpente, ende eest datse iet vergheffenesses drenken, het en sal hen niet deren, si selen de hande op de sieke legghen ende si selen wel hebben.

Ende seker na dien dat de Here Ihesus hen toesprekende es, es hi op ge\

[fol. 124v]

nomen in den hemel ende sit ter rechter hant Gods. Ende die wech ghevaren predecten overal, den Here met werkende ende tsermoen confiermerende met na volghenden tekenen.