Nieuwe Testament (Zuidnederlandse vertaling)

XXI

Ende besiende sach hi die rike, die hare ghichten worpen in gazophilacium. Ende hi sach ene arme weduwe werpen II eerne vierlinghe, ende hi seide: Ic segghe u waerleke: Dese arme weduwe warp meer dan alle die. Want si worpen alle van dien, dat hen overvloeide, in de ghichten Gods, maer dese warp van dien dat hare gheberst alle hare noet torst, die si hadde.

Ende selke seiden, dat de tempel gheciert ware met goeden steennen ende met husen, ende hi seide hen: Dit, dat ghi siet: die daghe selen comen, dat niet ghelaten en sal werden deen steen op den anderen, hi en sal ghedestrueert werden. Ende si vragheden hem, segghende: Ghebiedere, welc tijt sal dit sijn ende wat tekene sal sijn, alse dit sal beghenen te werdene? Ende hi seide: Siet, dat ghi niet ver\leidt

[fol. 180v]

en wert. Want het salre vele comen in minen name ende segghen: Ic beent, ende: De tijt sal naken. Daeromme en wilt hen niet na gaen. Ende alse ghi siet stride ende vechtinghen, en sijt niet vervaert. Want dese dinghe behoren tierst te gheschiene, nochtan en comt te hant dat inde niet.

Doe seide hi hen: Deen volc sal op staen jeghen dander ende deen rike jeghen dander, ende grote beweghinghe der erden sal sijn dore de stede, ende plaghen ende honghere ende vele vreseleker dinghe, ende grote tekene selen sijn van den hemele. Maer vore alle dese dinghe selense hare hande ane u slaen ende persequeren u ende leveren u indie synagogen ende trecken u met hoeden vore de coninghe ende vore die rechteren om minen name. Ende dit sal u gheschien in ghetughe. Daeromme en set niet in u herte te vorpeisene, hoe ghi antwerden selt. Want ic sal u gheven mont ende wijsheit, die si niet en selen moghen wederstaen noch weder segghen al uwe adversarise. Want ghi selt werden ghelevert van uwen ghebareren ende van

[fol. 181r]

uwen bruederen ende van uwen vrienden ende van uwen maghen, ende si selen u bringhen ter doot, ende ghi selt werden ghehaet van allen menschen om minen name. Ende een haer van uwen hoefde en sal niet verderven, ende in uwer verduldecheit seldi besitten uwe sielen.

Ende alse ghi siet ommelegghen Iherusalem met heerre, dan wet, dat sine destructie naket. Die dan in Judea sijn, vlien ten berghen, ende die in midden der stat sijn, scheden danen, ende die in anderen riken sijn, en comen daer niet, want dit sijn die daghe der wraken, op dat vervult werde alle dat ghescreven es. Wee dan dien, die kint draghen ende die kindere voeden in dien daghen! Want het sal sijn grote perse op der erden ende toren desen volke, ende si selen vallen vore de swerde ende si selen werden gheleidet ghevaen in allen den volken, ende Iherusalem sal daer neder werden gheworpen van heidenen lieden, tote dat vervult werden de tide der gheboerten.

Ende het selen sijn tekene inde sonne ende in de mane ende in de sterren, ende inder erden perse den lieden om die confuse der lude van der see ende van haren vloeden, ende de menschen selen

[fol. 181v]

droeghen van vresen ende van beidene der dinge, die overcomende selen sijn in den ommerinc der werelt. Want die crachte der hemele selen beweghet werden. Ende dan selense sien smenschen sone comen in eere wolken met groter mogentheit ende met groter macht. Ende alse dese dinghe beghennen te gheschiene, dan scouwet ende heft op uwe hoevede, want dan naket uwe verloessinghe.

Ende hi seide hen een ghelikenesse: Siet ane den vigheboem ende alle boeme. Alsi saen vrocht ute hen bringhen selen, so wetti, dat de somer bi es. Also alse ghi siet dese dinghe gheschien, so wetti, dat trike Gods bi es. Amen segghic u, dese gheboerte en sal niet overliden vor dien, dat alle dese dinghe gheschiet selen sijn. Hemel ende erde selen overliden, maer mine waerde en selen niet overliden.

Wacht u, dat uwe herten masschien niet verswaert en werden van overtolleghen etene ende van dronkenscape ende van sorghen des lives, ende dat die dach niet haesteleke op en co\me

[fol. 182r]

in u. Want hi sal comen als een strec op alle, die sitten op danschijn alle der erden. Waect dan alle tijt bedende, op dat ghi werdech wert te vlienne alle dese dinghe, die toecomende sijn, ende te stane vore smenschen sone.

Ende hi was in dien daghe lerende in den tempel, maer snachts ghinc hi ute ende bleef in den berch van Oliveten. Ende al tfolc begherde te hem te comene in den tempel ende hem te horne.