Noordnederlandse Historiebijbel

Van Abram ende van Zaray. 12 capittel

Op die tijt doe anbeden al die werelt afgoden als sonne, mane ende planeten ende sterren, dat vuer, of beelden, of ander gescepen dingen, sonder Abrahams geslacht: die en wouden geen gescepen dingen anbeden, mer si anbeden den scepper alre dingen. Doe docht Abram, dat die God een machtich moghende God was, die alle dinghen regiert, want Hi verlicht den dach mitter sonnen ende den nacht mitter manen ende mitten sterren. Die bomen die winterdages dorre staen, die doet Hi somerdaechs groeyen, bloeyen ende vruchten voertbrengen. Ende dese gedochten waren Abram in den syn, nacht ende dach, also langhe dat God tot hem seide: "Abram, Abram." Doe hoerde Abram die stemme ende seide: "Here, hier ben ic. Wie sidi?" Doe seide God: "Ic ben dijn Heer ende dijn God, die di ende alle dinghen gescepen heeft ende

[fol. 8va]

die alle dingen regiert."

Doe seide Abraham: "Here, wat wil Gi dat ic doe?" Doe seide God tot Abraham: "Gaet uut dat lant daer gi in woent, ende uut u geslacht ende uut uwen huse, ende coemt in een lant, dat Ic u wisen sal. Ic sel u een heer maken over veel volcs. Ende Ic sal u gebenedien ende uwen naem groet maken. Ende die u gebenedijt, die sel gebenedijt wesen. Ende die u vermaledijt, die sel vermaledijt wesen. Ende van u sel gebenedijt wesen dat geslacht der aerden."

Abram dede als hem God bevolen hadde. Hi nam Zaray, sijn wijf, ende Loth, sijns brueders soen, ende al sijn huysgesin, ende al dat guet dat hi voeren mocht, ende ghinc int lant van Canaan ende quam tot Sychem. Daer openbaerde Hem God Abram ende seide: "Dit lant sel Ic u geslacht geven." Ende aldaer maecte Abram een outaer ende anbede daer den naem Gods. Ende vandaen toech hi wonende tusschen Hay ende Betel. Dat was daer nu Jherusalem staet. Aldaer maecte Abram een outaer ende anbede daer den naem Gods.

Ende doe Abram daer woende, doe quam daer een groet duerte van coren, sodat daer groten honger int lant was. Doe toech Abram wonen in Egipten. Doe Abram bi den lande van Egipten quam, doe seide hi tot sinen wive: "Gi sijt

[fol. 8vb]

een scoen suverlic wijf. Ende als u die mannen van Egipten sien ende weten dat ic u man bin, so sellen si mi dootslaen, omdat si u behouden mogen. Daerom, bid ic u, sect, dat gi mijn suster sijt, opdat ic mijn lijf mach behouden ende ons gracie mach gescien van u." Doe Abram quam in Egipten ende die mannen van Egipten dat scone wijf sagen, doe boetscapten si dat coninc Pharo, haren heer. Doe sende coninc Pharo om dat scoen wijf ende si wort hem in sijn hof ghebrocht. Doe vraechde die coninc of Abram haer man was. Si andwoerde ende seide: het was haer brueder. Doe hieltse die coninc bi hem ende Abram wort wel ontfangen om haren willen, want hi hadde veel scapen, ossen, ezelen ende kamelen, ende knapen ende dienstmaechden. Ende doe Saray in des conincs hof quam, doe plaechde God Pharo mit groter siecte ende weeten, ende al sijn huusgesin mit hem, sodat si alle onvruchtbaer bleven. Ten laetsten doe sprac God Pharo in sinen slaep toe ende seide, dat hem die siecte angecomen was, omdat hi Abram sijn wijf genomen hadde. Doe ontboet Pharo Abram ende seide: "Waerom heb gi dit gedaen? Waerom en seit gi mi niet, dat Saray u wijf was? Wat is die saec, dat gi seit dattet u suster was ende het is u wijf? Ende ic namse tot minen

[fol. 9ra]

wive. Daerom ben ic geplaecht. Bidt voir mi, ende neemt u wijf ende al u gesin ende al u beesten, ende trect daermede int suyteynde van minen lande ende woent daer mit vreden." Ende Pharo geboet dat hem nyement misdoen en soude.

Doe toech Abram mit al sijn gesin ende mit sijn beesten, daer hem die coninc wijsde, ende woende daer een tijt. Doe wort die coninc ende al sijn gesin vruchtbaer ende gesont.