Noordnederlandse Historiebijbel

37 capittel

Jacob of Ysrahel die bleef wonen int lant van Canaan ende hadde 12 knechten ende een dochter. By Lya, sijn eerste wive, hadde hi Ruben, Symeon, Levy, Judas, Yzachar, Zabulon ende Dyna. By Rachel hadde hi Joseph ende Benyamin. By Zelpha, Lyen dienstmaecht, had hi Gad ende Azar. By Balan, Rachels dienstmaecht, hadde hi Dan ende Neptalym.

Doe Joseph 16 jaer out was, doe plach hi mit sinen jongen bruederen die scapen te bewaren. Ende hi plachse te beruspen van groter quaetheit die si deden. Jacob die minde Joseph boven al die kinderen, omdat hi hem in sijn outheit gewonnen hadde. Ende daerom so maecte hi hem sonderlinge cleder. Ende doe die bruederen sagen dat haer vader Joseph minde boven hem allen, daerom benyden si hem. Ende hi en mocht niet spreken dat hem genoechde, want hi plach dromen te exponeren. Daerom hateden hem sijn brueders voel temeer. Op een tijt doe seide hi tot sinen bruederen: "Hoert minen droem, die ic gesien hebbe. Mi docht dat wi elc een garf bonden in den acker. Ende doe mijn garf stont, doe quamen u garven ende anbeden mijn garve." Doe andwoerden die bruederen ende seiden: "Sel gi onse coninc wesen

[fol. 22va]

ende sellen wi onder u macht wesen?" Ende om dier dromen willen so benyden hem sine brueders temeer. Daerna doe sach Joseph noch enen droem ende die vertelde hi sinen bruederen ende seide: "Ic sach in minen droem, recht of die sonne ende die maen ende 11 sterren mi anbeden." Doe beruspede hem sijn vader ende seide: "Wat meen gi daermede? Meen gi, dat ic ende u moeder ende u brueders u sellen anbeden op der aerden?" Doe beniden hem sijn brueders noch meer. Mer sijn vader sweech ende overdocht dat in sijnre herten. Jacob hadde sijn kinder gesent in Scychem om daer die beesten te weyden.

Op een tijt doe seide sijn vader tot hem: "Ju bruederen sijn in Scychem. Coemt, ic sel u daer senden om te besien wat si doen." Joseph seide: "Ic ben bereit." Doe seide Jacob: "Gaet ende siet hoet mit uwen bruederen is ende coemt weder ende sect wat si doen." Joseph ginc van Ebron tot Scychem waert. Ende daer hi ghinc dwalen in den acker. Daer quam een man ende vraechde hem wat hi socht. Joseph seide, hi socht sijn broederen. Voert seide hi: "Wijst mi doch, waer dat si haer beesten weyden." Doe seide die man: "U bruederen sijn van hene gegaen. Ende ic hoerde dat si seiden, dat si wouden gaen in Dothaym." Doe volgede Joseph

[fol. 22vb]

sijn bruederen in Dothaym. Ende doe sijn bruederen hem van verre sagen comen, dochten si dat si hem doden wouden. Si spraken heymelic ende seiden: "Siet, hier comt die dromer. Laet ons hem doden ende worpen in een ouden cysterne ende seggen dat hem die wrede dieren verscoert hebben. Dan sel men sien wat hem sijn droem gebaet heeft." Doe Ruben dat hoerde, doe docht hi dat hi Joseph verlossen woude uut haren handen ende seide: "Laten ons niet doden, want het is onse brueder. Daerom, laet ons sijn bloet niet storten, mer laten ons worpen in enen cystaern hier in der wildernis." Mer dat seide hi daerom, omdat hi hem van sijnre bruederen handen verlossen woude ende tot sinen vader brengen. Doe ghingen si haestelic tot haren brueder ende togen sijn overste cleet uut. Ende si worpen hem in een diepe cystaerne sonder water. Doe ghinc Ruben vandaen, want hi meende Joseph uut den put te verlossen. Mer sijn ander bruederen die ghingen daer sitten eten. Ende doe sagen si wandelaers comen van Galaad ende waren Ysmaliten. Die quamen mit camelen ende brochten cruden ende ander guet om te vercopen in Egipten. Doe seide Judas tot sinen bruederen: "Wat soudet ons baten dat wi onsen brueder doden ende wi sijn bloet storteden? Het is beter dat wien

[fol. 23ra]

vercopen desen Ysmalyten: so en besmitten wi onse handen niet, want het is onse bloet ende onse vleis." Doe togen si haren broeder uut der cystaern ende si vercoften die coepluden ende gaven hem om 30 penningen. Ende die coepluden die leden Joseph in Egipten.

Ende die 30 penningen en woude nyement van den bruederen hebben, mer Judas nam dat gelt ende offerdet ter stede daer men op die tijt God anbede. Ende also quamen die 30 penningen daerna in den tempel. Ende om die 30 penningen wort Jhesus Cristus daerna vercoft.

Doe quam Ruben totter cystaerne ende meende Joseph daeruut te nemen, mer hi was wech. Doe scoerde hi sijn cleder van rouwen ende seide: "Och, dat kint en is hier niet. Waer sel ict soken?" Doe ghinc hi tot sinen bruederen. Die seiden hem dat si hem vercoft hadden ende dat hi te Egipten waert was. Doe doden die bruederen een geyt. Ende sy namen Josephs rock ende scoerden ende wentelden in dat bloet. Doe ghingen si also mit dien rock tot haren vader. Ende doe seiden si tot haren vader: "Desen roc hebben wi gevonden. Besiet of dit Josephs, uwes soens, roc is of niet." Doe Jacob dien roc sach, doe seide hi: "Het is mijns kints rock. Och, die alrewreetste dieren die hebben Joseph, minen soen, verscoert." Ende Jacob die scoerde sijn clederen van rouwen. Ende

[fol. 23rb]

hi toech haren clederen an ende bescreide Joseph lange tijt. Doe quamen die kinderen tot haren vader ende wouden sinen rouwe wat verlichten. Mer Jacob seide, hi en woude niet getroest wesen, mer hi soude al screyende varen in der hellen tot sinen soen. Ende hi bleef screyende. Ende die Madyaniten die vercoften Joseph in Egipten enen, genoemt Putifer, ende was coninc Pharo meesten ridder ende hi was gelubbet. Daer bleef Joseph in des conincs hof dienende.