Noordnederlandse Historiebijbel
(1998)–Anoniem Noordnederlandse Historiebijbel–
Auteursrechtelijk beschermd
[Folio 52rb]
| |
in, dat niet geheilicht en was ende verboden was, ende wouden God sacrifici doen. Doe quam daer vuer van God ende verbarndese beide, Nadap ende Abyu, sodat si doot bleven. Doe seide Moyses tot Aaron: "God heeft geseit dat Hi daerin geheilicht is, dat men sijn geboden hout. Ende u kinderen hebben tegen die wet gedaen. Daerom heeftse God gedoot." Doe Aaron dat hoerde, doe sweech hi. Doe riep Moyses Mysael, Elsephan - Oziels kinderen - ende seide tot hem: "Gaet ende neemt u bruederen uut der Sanctuarien ende draechtse buten ende begraefse, als si daer leggen." Mysael ende Elsephan die ghingen haestelic ende namen die bruederen, als si gecleet lagen, ende drogense uut ende begruevense. Ende daerom begraeft men noch in kerstenheit biscoppen ende priesteren in ornamenten. Doe seide Moyses tot Eleazer ende tot Ytamar, sijn kinderen: "En wilt u hoeft niet ondecken noch u cleder scueren, opdat gi niet en sterft." Doe wort Eleazer ende Ythamer, Moyses kinderen, papen gewiet ende gesalvet. Doe seide God tot Aaron: "Als gi ende u kinderen in die tabarnakel selt gaen, so en drinct geen wijn noch genen dranc, daer men of drinken mach, opdat gi niet en sterft. Hout dat gebot tot in | |
[Folio 52va]
| |
der ewicheit. Ende hebt wijsheit ende verstant te ondersceiden dat heilich is ende dat niet heilich en is, ende dat reyn is ende dat onreyn is. Ende leert den kinderen van Ysrahel die wet, die u Moyses geopenbaert hevet." Doe hiet Moyses Eleazer ende Ythamer sacrifici doen, als die papen toebehoert. Ende si deden, als Moyses, haer vader, geboet. |
|