Noordnederlandse Historiebijbel

10 capittel

God seide tot Moyses: "Maect twee sulveren trompetten daer gi dat volc mede tesamenropen moecht, als gi reysen selt. Ende als gi die trompetten eerst doet blasen, so sellen voir u comen alle die princen ende die hoeftluden van al den scaren van Ysrahel. Ende als men die trompetten lange blaest, so sellen in roer wesen alle die an dat oesteynde van den tabarnakel sijn. Ende als men anderwerven blaset, so sellen si an die suutsyde van die tabarnakel alle in roer wesen. Ende so voert, waent al dat volc vergadert is. Ende Aaron, des priesters, kinderen die sellen die trompetten blasen. Ende dat sel gi houden voir een wet onder u geslacht. Ende als gi te stride selt gaen jegen uwe vianden, so sel gi die trompetten blasen ende denken om God ende bidden Hem dat Hi u bescermen wil van

[fol. 58va]

die handen uwer vianden. Ende als gi worscapt of hoechtijt hout, so blaset die trompetten. Als gi sacrificie doet, denct dan om uwen Here, uwen God.

In dat ander jaer ende in die ander maent op den 20sten doe hief die wolken op van die tabarnakel. Ende men blies die trompetten. Doe was al dat volc in roer om te reysen, elc onder sijn prince, ende die levyten, elc in haren dienst.

Doe seide Moyses tot Odab, sijns wijfs broeder: "Trecket mit ons tot den steden die ons God geven sal. Wy sellen u vrientscap doen." Doe seide Odab: "Ic en wil niet mit u gaen, mer ic wil trecken int lant daer ic geboren ben." Doe seide Moyses: "En wilt ons niet laten, want gi kent die woestijn ende gi weet best, waer wi die tabarnakel setten mogen. Daerom, weest onse leider. Ende ist dat gi mit ons reyst, van dat beste dat ons God ghift, dat sellen wi u mededelen."

Doe hieven die levyten die tabarnakel op ende reysden. Doe seide Moyses: "Here, staet op ende vervaert uwe vianden, opdat si vlien van uwen aensicht, die U haten." Doe togen si drie dachvaerden van den berch Synay. Ende daer setten si die arke

[fol. 58vb]

neder. Doe seide Moyses: "Here, keert weder tot die scaren uwes volcs van Ysrahel."