Noordnederlandse Historiebijbel

30 capittel

"Ende als u opcomt dese maledictien of benedictien die ic u gheopenbaert hebbe, ende of gi verstroeyt wort onder die heydenen, so keert u weder tot Gode ende doet penitenci. Ende weest Gode onderdaen ende hout sijn geboden, als ic u geseit hebbe. Ende mint hem uut al uwer herten, uut al uwer sielen. God sel u dan verlossen uut der vangenissen ende sel uwer ontfermen ende vergaderen u weder in dat lant dat u voervaderen besaten. Ende Hi sel u weder gebenedien mit meerre gracien dan u voervaderen hadden, opdat gi Hem mint uut al uwer herten, uut al uwer sielen, so sel gi leven sonder verdriet. Ende alle die voerseide maledixien die sellen

[fol. 79ra]

comen op u vianden die u haten. Daerom, mint God ende hout sijn gheboden ende doet Hem sacrifici, als in dit boec gescreven staet.

Ende hout dit boec bi u. Ende en latet niet in den hemel vueren, opdat gi niet en segt: Wie sel ons dat boec uut den hemel halen ende lesent ons over, opdat wy weten mogen hoedat wi die geboden Gods sellen mogen volbrengen? Ende en laet dat boec niet over die see varen, opdat gi niet seggen en moget: Wie sel over zee varen ende halen ons dat boec ende lesent ons over, opdat wy horen mogen wat ons God geboden heeft ende dan dat volbrengen? Mer die geboden Gods sellen altoes wesen voer uwen ogen ende in uwer herten ende volbrenget die, want huden heb ic voir uwen ogen geset dat leven ende guet, of die doot ende quaet. Daerom, mint uwen Here, uwen God, ende wandert in sinen weghen ende hout sijn geboden ende weest rechtvaerdich, so sel gi leven ende vermenichvoudicht worden ende gebenedijt worden int lant daer gi in comen selt. Mer wort u hert van God gekeert ende wildi sijn geboden niet houden, mer anbeet ende dient afgoden, so seg ic u te voren: Gi selt verminderen ende jonc sterven. Ende des neme ic den hemel ende die aerde te tuge, dat ic u huden

[fol. 79rb]

voirseit hebbe dat leven ende die doot, guet ende quaet, die benedixie ende die maledixie. Daerom, kiest dat leven ende weest Gode onderdaen ende dient Hem, want Hi is u leven. Ende Hi is die lancheit uwer dagen, opdat gi dat lant besitten moecht dat God uwen vaderen beloefde te geven: Abraham, Ysaac ende Jacob."