Noordnederlandse Historiebijbel

31 capittel

Doe seide Moyses tot den gemenen volc: "Ic ben 100 ende 20 jaer out. Ic en mach niet mit u uut- ende inreysen. God heeft mi geseit dat ic over die Jordaen niet comen en sel. Daerom sel u God voirgaen als Hi u geseit heeft. Ende Hi sel u vianden doen als Hi Zeon ende Og, die 2 coninghen, dede. Ende als gi daer int lant coemt, soe doet als ic u geseit hebbe ende en weest niet vervaert."

Doe seide Moyses tot Yosue: "Weest starc van moede. Gi selt dat volc leiden in dat lant dat u God beloeft heeft. Ende dat sel gi hem delen. Ende God sel mit u wesen ende en sel u niet afterlaten. Daerom, en ontsiet u niet ende en versaecht u niet."

Doe seide God tot Moyses: "U sterfdach is u bi. Roept Yosue ende gaet in die tabarnakel." Ende daer sprac God hem toe uut die

[fol. 79va]

wolken ende seide tot Moyses: "Siet, gi selt rusten mit uwen vaderen. Ende dit volc sel verkeren ende afgoden anbeden in dat lant daer Icse in brengen sel. Ende si sellen Mi laten. Ende dan sel Ic mijn toorn op hem wreken. Ende Ic selse laten ende keren mijn aensicht van hem. Ende op hem sel comen alle quaet ende verdriet. Ende in dien dagen sellen si seggen: Voerwaer, God en is niet mit ons. Daerom, scrijft in enen psalm mijn geboden ende dat verdriet dat hem toecomen sal. Ende leert dat den kinder van Ysrahel, opdat sijt in haer memorie houden sellen ende mit den monde singen. Ic selse in dat lant brengen dat Ic hem geloeft hebbe, mer si sellen hem keren tot vreemden goden ende die dienen. Ende als hem dat verdriet toecomt, so sel hem dien psalm andwoerden, want Ic kenne al haer gedachten." Doe seide God tot Josue: "Weest sterc ende onversaecht. Gi selt die kinderen leiden in dat lant ende Ic sel mit u wesen."

Doe Moyses die wet ende die geboden Gods gescreven hadde in enen boec, doe gaf hi den boec den priester van den levyten ende liet hem dien

[fol. 79vb]

boec leggen in die arke Gods. Ende hi beval hem tot elken 7 jaren, dat is in dat Jaer van Blijscappen, dien boec voer al dat volc openbaer te lesen, opdat si die geboden Gods mochten houden ende verstaen ende daerna leven. "Want ic weet wel dat si lichtelic van Gode sceiden, want ic sach, doe ic levende bi hem was, dat si God menichwerven lieten. Ende als ic doot bin, so sellen si Gode lichtelic laten."

Doe seide Moyses: "Vergaert al dat volc van Ysrahel voir mi, mannen ende vrouwen. Hoert dat ic u toespreken sel ende onthout dat, want ic kenne dat gi na minen doot sonden doen selt ende haest van den wech Gods sceiden ende doen jegen sijn geboden." Doe seide Moyses tot die kinder van Ysrahel: "Hoert allegader desen psalm van den beghin ten eynde ende onthouten ende leerten ende sincten alle dage over, opdat gi in den wech Gods moecht bliven."