Josue ende deden an oude, lappede scuenen ende versleten clederen, ende lueden ezelen mit ouden vaten mit water ende mit hert, verdroecht broet. Doe quamen si tot Josue, die doe was in Galgala. Ende si seiden tot hem ende tot den gemenen volc: "Wi comen uut enen verren lande tot u om vrede mit u te maken." Doe seiden die kinder van Ysrahel: "Woen gi int lant dat ons God heeft beloeft te geven, so en moghen wi gene vrede mit u maken." Doe seiden si tot Josue: "Wi sijn u knechten." Doe seide Josue: "Waen sie gi gecomen?" Doe seiden si: "Van enen verren lande. Wi sijn tot u gecomen als knechten in den naem Gods. Wy hebben gehoert van die grote macht die gi hebt ende wat gi gedaen hebt in Egipten ende oec wat gi den twee coninghen gedaen hebt over die Jordaen: Zeon, die coninc van Ebeson, ende Og, den coninc van Basan. Doe onse heeren dit vernamen, doe seiden si tot ons: Neemt spijs ende dranc mit u, omdattet verre in vreemden lande is, ende trect tot die kinder van Ysrahel ende verworft ons vrede. Ende doe wi uut onsen lande togen, doe waren onse clederen nyeu ende die sijn nu versleten. Onse scuenen die waren nyeu; die sijn nu gelappet ende versleten. Onse vaten mit den dranc die waren nyeu; die sijn nu out ende ver\weert.
Auteursrechtelijk beschermd