Noordnederlandse Historiebijbel

10 capittel

Na Abymelech so quam een rechter, hiet Tola, ende was van Ysachars geslacht ende woende int gebercht van Effraym in een stede, hiet Sanyr. Ende hi regierde Ysrahel 23 jaer. Ende doe hi starf, doe wort hi in sijn stede begraven.

Ende in dier tijt wort Troeyen gedestrueert ende verbarnt ende verraden van enen, hiet Uliexes, ende coninc Priam verslegen mit sinen

[fol. 97va]

kinderen, Hector ende Parius, van den coninc van Griecken, Agamenon, ende Menelaus, sijn brueder. Ende Eneas, Hectors oem, die weeck uut Troeyen ende quam in Ytalien ende maecte daer een stede ende noemdse Alba. Ende daerna wanse Romus ende deetse bemueren ende hietse Romen, als si noch huden des dages hiet.

Daerna was Yair rechter van Ysrahel 22 jaer lanc. Ende hi hadde 30 kinderen; die maecte hi princen van 30 steden. Jayr starf ende wort begraven in sijn stede, Camon.

Doe sondichden die kinder van Ysrahel ende anbeden die afgoden Baal ende Astraoth ende die afgoden van Syrien ende van Sydonen, van Moab, van Amorreen ende van den Philisteen. Ende si lieten after den almachtigen God.

Doe was God op hem vertorent ende lietse dwingen van die handen der Philisteen 18 jaer lanc. Doe si alle aldus bedruct waren, - die van Juda, van Ysrahel ende over der Jordanen - doe riepen si an God ende seiden: "Wi hebben gesondicht, want wi hebben den almachtigen God aftergelaten ende hebben afgoden gedient." Doe sprac God tot hem ende seide: "Hebben die van Amorreen, van Amon, van Sydon, van Amelech, van Canaan ende die Philisteen u verdrucket ende gequelt, wat roep gi an My dat Ic u bescer\men

[fol. 97vb]

soude ende gi hebt Mi aftergelaten ende vreemde goden gedient? Gaet ende roept die goden an die gi vercoren hebt. Laet u die verlossen van uwen verdriet." Doe seiden die kinder van Ysrahel tot God: "Wi hebben gesondicht. Doet mit ons dat Gi wilt ende verlost ons. Wi sellen alle die afgoden uut den lande doen ende U alleen dienen."

Ende die van Amon die hadden haer tabarnakel geset in Galaad mit haren afgod. Doe vergaderden die van Ysrahel ende woudense verdriven. Ende si seiden onderlinghe: "Soe wie eerst anstrijt die van Amon, die sel onse hertoge wesen."