Noordnederlandse Historiebijbel

6 capittel

Die arke Gods die was daer onder die Filisteen 7 maenden. Doe riep dat gemeen volc tot haren priesteren ende haer gokelaers ende haer waersagers tesamen ende seiden: "Wat sellen wi mit der arken doen? Segt ons hoe wise weder in haer stede mogen senden."

Doe seiden die papen ende die ander: "En sent die arck niet leech weder thuyswaert sonder giften, opdat wi van deser plagen mogen verlost worden." Doe seide dat volc: "Wat giften sellen wi daermede senden?" Doe seiden die papen: "Voer onse vijf steden so sel gi hem senden vijf gulden vingerlingen ende voer die plaech vijf gulden musen. Sent dat God van Ysrahel ende doet Hem eer, opdat Hi die plage van u ende van uwen goden hale. Ende maect enen nyeuwen wagen ende set die arke Gods daerop. Ende slaet daer 2 jonge koeyen in die nyeuwe wagen." Doe togen si dat ende si seiden: "Est dat si gaen jegen Bethsames, so is die arke die saec onser plagen.

[fol. 112ra]

Mer gaen si uut den wege, so ist een ander saec.

Die Philisteen deden also. Si setten die arke Gods op enen nyeuwe wagen ende slogen daer 2 jonge koeyen in ende leiden daer die gulden juweelen op. Doe ghingen die coeyen mit den wagen briesschen ende bellen recht jegen Bethsames toe.

Ende die van Bethsames die maeyden haer tarwe in den acker. Ende doe si opsagen, doe sagen si die arke Gods. Doe waren si verblijt. Ende si ontboden die Levyten ende setten die arke op enen groten steen die daer lach. Ende si slogen die wagen an stucken ende barnden die koeyen mit den wagen ende deden Gode sacrifici. Doe die van Bethsames quamen om die arke te besien die doe bloet ende ondect stont, doe versloech God daer 70 mannen van den oversten van Betsames ende bleven vlus doot. Ende daer bleeffer 50.000 doot van dat gemeentevolc. Doe screyden si gemeenlic, omdat si also geplaecht waren, ende senden boden tot die van Cariatharim ende seiden dat die Philisteen die arke Gods daer wedergesent hadden, dat si souden comen ende halense.