Noordnederlandse Historiebijbel

4 capittel

Doe Ysboseth hoerde dat Abner doot was, doe was hi bedroeft ende alle die van Ysrahel mit hem. Doe waren daer twee princen van den rovers. Die een hiet Banaa ende die ander hiet Rechab. Die quamen in Ysboseths hof ende die poortwachter sliep. Doe hoerden si dorschers staen dorschen tarwe. Si ghingen daer\toe

[fol. 132rb]

ende slogen die doot. Doe ghingen si voert in Ysboseths sael ende si vonden sijn camer ongesloten staen. Ende Ysboseth lach op sijn bedde ende sliep van den middach. Ende Rechab ende Banaa die slogen Ysboseth sijn hoeft of ende ghingen uten hove ende namen dat hoeft mit hem ende ghinghen al den nacht ende brochten Ysboseths hoeft in Ebron tot coninc David. Doe seiden si tot coninc David: "Here coninc, siet, hier is dat hoeft van Ysboseth, Sauls soen, die u viant was ende geerde u te doden. Ende God heeft u huden wraec gegeven van uwen viant." Doe seide David tot Rechab ende tot Banaa, sijn brueder: "Leeft God, die mi bewaert heeft van allen anxt ende vresen mijnre vianden, diegene die mi die boetscap brocht dat Saul verslegen was, hi waende guede giften te ontfangen, mer ic dede hem doden in Syceleg. Dat was sijn loen. Ende nu coem gi, onsalige mannen, ende hebt een onnoesel mensche gemoert in sijn huys ende in sijn bedde. Ic sel sijn bloet op u wreken ende doen u van der aerden." Doe gheboet David dat men hem die handen

[fol. 132va]

ende die voeten ofhouden soude ende dan haer lichaem hangen. Ende dat wort gedaen. Ende David dede Ysboseths hoeft begraven in Ebron bi Abner.